റെ​ഗുലർ നിക്ഷേപകർക്ക് 9.1% പലിശ; മുതിർന്ന നിക്ഷേപകർക്ക് 9.6%; ‍എഫ്ഡിയിടാൻ വേറെ ബാങ്ക് നോക്കേണ്ട

അധ്വാനിച്ചുണ്ടാക്കിയ പണം സുരക്ഷിതമായി നിക്ഷേപിക്കാൻ ഇന്നും ഭൂരിഭാ​ഗം പേരും തിരഞ്ഞെടുക്കുന്നത് ബാങ്ക് സ്ഥിര നിക്ഷേപങ്ങളാണ്. പലിശ നിരക്ക് ഉയർന്നു നിൽക്കുന്ന ഈ ഘട്ടത്തിൽ സ്ഥിര നിക്ഷേപം ബുക്ക് ചെയ്യുക എന്നതാണ് ബുദ്ധി.

ഇന്നത്തെ പലിശ നിരക്ക് നോക്കിയാൽ 9.60 ശതമാനം വരെ പലിശ ഡിഐസിജിസി ഇൻഷൂറൻസുള്ള ബാങ്കുകളിൽ നിന്ന് ലഭിക്കും. സമീപ കാലത്ത് ലഭിക്കുന്ന ഉയർന്ന നിരക്കാണിതെന്ന് പറയാം. 2022 മേയ് മുതൽ വന്ന റിപ്പോ നിരക്ക് വർധനവ് തന്നെയാണ് നിക്ഷേപ പലിശ നിരക്ക് വർധനവിന് ആക്കം കൂട്ടിയത്.

സൂര്യോദയ് സ്‌മോള്‍ ഫിനാന്‍സ് ബാങ്കാണ് മേയ് അഞ്ചിനാണ് സ്ഥിര നിക്ഷേപങ്ങളുടെ പലിശ നിരക്കുയര്‍ത്തിയത്. 1വര്‍ഷം മുതല്‍ 5 വര്‍ഷം വരെ കാലാവധിയുള്ള, 2 കോടിക്ക് താഴെയുള്ള നിക്ഷേപങ്ങള്‍ക്ക് 49 അടിസ്ഥാന നിരക്ക് മുതല്‍ 160 അടിസ്ഥാന നിരക്ക് വരെയാണ് പലിശ ഉയര്‍ത്തിയത്. പുതുക്കിയ പലിശ നിരക്ക് മേയ് 5 മുതല്‍ നിലവില്‍ വന്നു. ഈ പലിശ നിരക്ക് വിശദമായി നോക്കാം.

ഉയർന്ന പലിശ നിരക്ക്

7 ദിവസം മുതല്‍ 10 വര്‍ഷത്തേക്ക് സാധാരണ നിക്ഷേപകർക്ക് 4 ശതമാനം മുതല്‍ 9.10 ശതമാനം വരെ പലിശ ലഭിക്കും. മുതിര്‍ന്ന പൗരന്മാര്‍ക്ക് ഇതേ കാലയളവിൽ 4.50 ശതമാനം മുതല്‍ 9.60 ശതമാനം വരെ പലിശ ലഭിക്കും. ഉയർന്ന നിരക്കായ 9.10%/ 9.60% എന്നി നിരക്കുകൾ 5 വര്‍ഷത്തെ നിക്ഷേപത്തിനാണ് ലഭിക്കുന്നത്. 

സൂര്യോദയ് സ്മോൾ ഫിനാൻസ് ബാങ്ക് പലിശ

* 1 വര്‍ഷത്തെ സ്ഥിര നിക്ഷേപത്തിന് 6.85 ശതമാനം പലിശ റെഗുലര്‍ നിക്ഷേപകര്‍ക്ക് ലഭിക്കും. മുതിര്‍ന്ന പൗരന്മാര്‍ക്ക് 7.35 ശതമാനമാണ് പലിശ നിരക്ക്.

* 2 വര്‍ഷത്തേക്ക് 8.50 ശതമാനം സാധാരണ നിക്ഷേപകര്‍ക്ക് ലഭിക്കും. മുതിര്‍ന്ന പൗരന്മാര്‍ക്ക് 9 ശതമാനമാണ് പലിശ നിരക്ക്.

* 999 ദിവസത്തെ സ്ഥിര നിക്ഷേപത്തിന് 9 ശതമാനം പലിശ റെഗുലര്‍ നിക്ഷേപകര്‍ക്കും 9.50 ശതമാനം പലിശ മുതിര്‍ന്ന പൗരന്മാര്‍ക്കും ലഭിക്കും.

* 3 വര്‍ഷത്തെ സ്ഥിര നിക്ഷേപത്തിന് 7.25 ശതമാനം പലിശ റെഗുലര്‍ നിക്ഷേപകർക്ക് ലഭിക്കും., 7.75 ശതമാനമാണ് മുതിര്‍ന്ന പൗരന്മാർക്ക് ലഭിക്കുന്നത്.

* 4 വര്‍ഷത്തേക്ക് റെ​ഗുലർ നിക്ഷേപകർക്ക് 6.75 ശതമാനവും മുതിർന്ന പൗരന്മാർക്ക് 7.25 ശതമാനവും പലിശ ലഭിക്കും.

* 5 വര്‍ഷത്തേക്ക് 9.1 ശതമാനം പലിശ റെഗുലര്‍ നിക്ഷേരര്‍ക്ക് ലഭിക്കും. 9.60 ശതമാനം പലിശയാണ് മുതിർന്ന പൗരന്മാർക്ക് ലഭിക്കുന്നത്.

* 6 വര്‍ഷം മുതല്‍ 10 വര്‍ഷത്തേക്ക് 7.25 ശതമാനം റെഗുലര്‍ നിക്ഷേപകര്‍ക്കും 7.75 ശതമാനം മുതിര്‍ന്ന പൗരന്മാര്‍ക്കും ലഭിക്കും.

* 5 ലക്ഷത്തിന് മുകളില്‍ ബാലന്‍സുള്ള സേവിംഗ്‌സ് അക്കൗണ്ടിന് 7 ശതമാനം പലിശയും ലഭിക്കും. 

എൻആർഐ നിക്ഷേപ പലിശ

മേയ് 5 മുതൽ നിലവിൽ വരുന്ന തരത്തിൽ എന്‍ആര്‍ഐ നിക്ഷേപങ്ങളുടെ പലിശയും പുതുക്കിയിട്ടുണ്ട്. എന്‍ആര്‍ഇ ആക്കൗണ്ടിന് 2 വര്‍ഷത്തേക്ക് 8.50 ശതമാനം പലിശ ലഭിക്കും. 2 വര്‍ഷം മുതല്‍ 998 ദിവസത്തേക്ക് 7.51 ശതമാനം പലിശയും 999 ദിവസത്തേക്ക് 9 ശതമാനം പലിശയും നേടാം 5 വര്‍ഷത്തേക്കും 9.10 ശതമാനം പലിശ നേടാം. 

സുരക്ഷിതം

രാജ്യത്ത് ബാങ്കിംഗ് സേവനങ്ങള്‍ എത്താത്ത ഇടങ്ങളിലേക്ക് ബാങ്കിംഗ് സേവനങ്ങള്‍ വ്യാപിപ്പിക്കുക എന്ന ലക്ഷ്യത്തോടെയാണ് രാജ്യത്ത് സ്‌മോള്‍ ഫിനാന്‍സ് ബാങ്കുകള്‍ ആരംഭിക്കുന്നത്. ഇതിന്റെ ഭാഗമായി 2017 ലാണ് സൂര്യോദയ്‌ സ്‌മോള്‍ ഫിനാന്‍സ് ബാങ്ക് ആരംഭിക്കുന്നത്.

റിസർവ് ബാങ്ക് ഓഫ് ഇന്ത്യയുടെ നിയന്ത്രണത്തിലുള്ള ബാങ്കാണ് സൂര്യോദയ് സ്മോൾ ഫിനാൻസ് ബാങ്ക്. 5 ലക്ഷം രൂപ വരെയുള്ള നിക്ഷേപത്തിന് ഡെപ്പോസിറ്റ് ഇൻഷൂറൻസ് ആൻഡ് ക്രെഡിറ്റ് ​ഗ്യാരണ്ടി കോർപ്പറേഷന്റെ പരിരക്ഷ ലഭിക്കും.