കഴിഞ്ഞ വാരം പലിശ നിരക്കുയര്‍ത്തി പൊതുമേഖലാ ബാങ്ക്; നേട്ടം പ്രവാസികള്‍ക്കും മുതിര്‍ന്ന പൗരന്മാര്‍ക്കും

റിപ്പോ നിരക്ക് വർധനവിന് ശേഷം നിക്ഷേപ പലിശ നിരക്കുയരാൻ തുടങ്ങിയതോടെ ബാങ്ക് നിക്ഷേപകർക്കാണ് കോളടിച്ചത്. 2023 ഫെബ്രുവരിയിൽ റിപ്പോ നിരക്ക് വർധിപ്പിച്ചതിന് ശേഷം റിസർവ് ബാങ്ക് ഏപ്രിലിൽ വീണ്ടും നിരക്ക് വർധിപ്പിക്കുമെന്നാണ് സൂചന.

ഇതിനിടെ കഴിഞ്ഞ വാരത്തിൽ മാർച്ച് 17ന് നിക്ഷേപ പലിശ നിരക്കുയർത്തിയത് പൊതുമേഖലാ ബാങ്കായ ബാങ്ക് ഓഫ് ബറോഡയാണ്. മുതിർന്ന പൗരന്മാർക്കും സ്ഥിരം ഉപഭോക്താക്കൾക്കും ബാങ്ക് ഓഫ് ബറോഡ 2 കോടിയിൽ താഴെയുള്ള സ്ഥിര നിക്ഷേപങ്ങളുടെ പലിശ നിരക്ക് ഉയർത്തിയിട്ടുണ്ട്.

25 അടിസ്ഥാന നിരക്കുയർത്തി

ബാങ്ക് ഓഫ് ബറോഡ വിവിധ കാലയളവിലെ സ്ഥിരനിക്ഷേപങ്ങൾക്ക് 25 അടിസ്ഥാന നിരക്കാണ് (0.25 ശതമാനം) പലിശ നിരക്കുയർത്തിയത്. എൻആർഒ, എൻആർഇ ടേം ഡെപ്പോസിറ്റുകൾക്കും ആഭ്യന്തര റീട്ടെയിൽ ടേം ഡെപ്പോസിറ്റുകൾക്കുമാണ് ഈ നിരക്ക് വർധനവ് ബാധകമാവുക.

സാധാരണ നിക്ഷേപകർക്ക് 7 ദിവസം മുതൽ 10 വർഷം വരെ കാലാവധിയുള്ള സ്ഥിര നിക്ഷേപങ്ങൾക്ക് 3 ശതമാനം മുതൽ 6.25 ശതമാനം വരെയും മുതിർന്ന പൗരന്മാർക്ക് 3.50 ശതമാനം മുതൽ 6.75 വരെയുമാണ് പുതിയ പലിശ നിരക്ക്.

പുതുക്കിയ നിരക്ക്

2 കോടിയില്‍ താഴെയുള്ള ആഭ്യന്തര, എന്‍ആര്‍ഒ അക്കൗണ്ടുകള്‍ക്ക് 25 അടിസ്ഥാന നിരക്കാണ് പലിശ നിരക്കുയര്‍ത്തിയത്. എന്‍ആര്‍ഇ അക്കൗണ്ടുകള്‍ക്കും 25 അടിസ്ഥാന നിരക്കുയര്‍ത്തി.

3 വര്‍ഷം മുതല്‍ 5 വര്‍ഷത്തേക്ക് സാധാരണ നിക്ഷേപകര്‍ക്ക് 6.50 ശതമാനം പലിശ ലഭിക്കും. മുതിര്‍ന്ന പൗരന്മാര്‍ക്ക് 7.15 ശതമാനം പലിശ ലഭിക്കും.  

പുതുതായി അവതരിപ്പിച്ച ബാങ്ക് ബറോഡ തിരംഗ പ്ലസ് ഡെപ്പോസിറ്റ് പ്ലാനിന് കീഴിൽ സാധാരണ നിക്ഷേപകർക്ക് പരമാവധി 7.05 ശതമാനവും മുതിർന്ന പൗരന്മാർക്ക് 7.55 ശതമാനവും പലിശ നിരക്കും ലഭിക്കും. കാലാവധി 399 ദിവസമാണ്.

പലിശ നിരക്ക്

ഏഴ് ദിവസം മുതൽ 45 ദിവസം വരെ കാലാവധിയുള്ള സ്ഥിര നിക്ഷേപങ്ങൾക്ക് ബാങ്ക് ഓഫ് ബറോഡ് 3 ശതമാനം പലിശ നൽകും. 46 ദിവസത്തിനും 180 ദിവസത്തിനും ഇടയിൽ കാലാവധിയുള്ള സ്ഥിര നിക്ഷേപങ്ങൾക്ക് 4.5 ശതമാനം പലിശ ലഭിക്കും.

181 ദിവസത്തിനും 210 ദിവസത്തിനും ഇടയിൽ കാലാവധിയുള്ള സ്ഥിര നിക്ഷേപങ്ങൾക്ക് 5.25 ശതമാനം പലിശ ബാങ്ക് ഓഫ് ബറോഡയിൽ നിന്ന് ലഭിക്കും. 211 ദിവസവും ഒരു വർഷത്തിൽ താഴെയും കാലാവധിയുള്ള സ്ഥിര നിക്ഷേപങ്ങൾക്ക് 5.75 ശതമാനം പലിശ ലഭിക്കും.

ഒരു വർഷം മുതൽ മൂന്ന് വർഷം വരെ കാലാവധിയുള്ള സ്ഥിര നിക്ഷേപങ്ങൾക്ക് ബാങ്ക് 6.75 ശതമാനം പലിശ നിരക്ക് വാഗ്ദാനം ചെയ്യും. 

ഓൺലൈനായി സ്ഥിര നിക്ഷേപമിടാം

ബാങ്ക് ഓഫ് ബറോഡയുടെ നിലവിലുള്ളതും പുതിയതുമായ ഉപഭോക്താക്കൾക്ക് ഇന്ത്യയിൽ ഉടനീളമുള്ള ബാങ്കിന്റെ ശാഖകൾ വഴി സ്ഥിര നിക്ഷേപം ആരംഭിക്കാം. ബാങ്ക് ഓഫ് ബറോഡ ആപ്പ് വഴിയോ നെറ്റ് ബാങ്കിംഗ് സൗകര്യം ഉപയോ​ഗിച്ചോ നിലവിലെ ഉപഭോക്താക്കൾക്ക് സ്ഥിര നിക്ഷേപമിടാം.