കഴിഞ്ഞവാരം സ്ഥിര നിക്ഷേപങ്ങളുടെ പലിശ നിരക്കുയർത്തി 3 ബാങ്കുകൾ; ഉയർന്ന പലിശ നൽകുന്നത് ആര്?

കഴിഞ്ഞ വാരത്തിലാണ് റിസർവ് ബാങ്ക് ഓഫ് ഇന്ത്യയുടെ പണനയ അവലോകന യോ​ഗം ചേർന്നത്. റിപ്പോ നിരക്ക് മാറ്റമില്ലാതെ തുടരാനാണ് യോ​ഗത്തിൽ തീരുമാനമായത്. ഇതോടെ ഭവന വായ്പകളിൽ ചെറിയ കുറവുകൾ ബാങ്കുകൾ നൽകി തുടങ്ങിയിട്ടുണ്ട്. അതേസമയം റിപ്പോ നിരക്ക് ഉയർത്താതിരുന്നിട്ടും മൂന്ന് ബാങ്കുകൾ നിക്ഷേപ പലിശ നിരക്ക് ഉയർത്തുകയാണ് കഴിഞ്ഞ വാരം ചെയ്തത്. കൊട്ടക് മഹീന്ദ്രാ ബാങ്ക്, ഇന്ത്യൻ ഓവർസീസ് ബാങ്ക്, സെൻട്രൽ ബാങ്ക് ഓഫ് ഇന്ത്യ എന്നിവരാണ് പലിശ നിരക്കുയർത്തിയത്.

കൊട്ടക് മഹീന്ദ്ര ബാങ്ക്

2 കോടിക്ക് താഴെയുള്ള സ്ഥിര നിക്ഷേപങ്ങളുടെ പലിശ നിരക്കാണ് കൊട്ടക് മഹീന്ദ്ര ബാങ്ക് പുതുക്കിയത്. ഒരു വർഷത്തെ പലിശ നിരക്ക് 7 ശതമാനമായി പുതുക്കി. 390 ദിവസം മുതൽ രണ്ട് വർഷത്തിൽ താഴെ വരെ കാലവധിയുള്ള നിക്ഷേപങ്ങളുടെ പലിശ നിരക്ക് 7.20 ശതമാനമാണ്. 2 വർഷം മുതൽ 3 വർഷത്തിൽ താഴെ വരെയുള്ള നിക്ഷേപങ്ങൾക്ക് 7 ശതമാനം പലിശ ലഭിക്കും.

3 വർഷം മുതൽ 4 വർഷം വരെയുള്ള നിക്ഷേപങ്ങൾക്ക് 6.5 ശതമാനമാണ് പലിശ. 4 വർഷം മുതൽ 5 വർഷം വരെയുള്ള നിക്ഷേപങ്ങൾക്ക് 6.25 ശതമാനം പലിശ ലഭിക്കും. 5 വർഷത്തിൽ കൂടുതലുള്ള നിക്ഷേപങ്ങൾക്ക് 6.20 ശതമാനമാണ് പലിശ. മുതിർന്ന പൗരന്മാർക്ക് പലിശ നിരക്കിൽ 0.50 ശതമാനം അധിക നിരക്ക് ലഭിക്കും.

കൊട്ടക് മഹീന്ദ്ര ബാങ്കിൽ പുതുക്കിയ സ്ഥിര നിക്ഷേപങ്ങളുടെ പലിശ നിരക്ക് ഏപ്രിൽ 10 മുതൽ പ്രാബല്യത്തിൽ വന്നു. 

ഇന്ത്യൻ ഓവർസീസ് ബാങ്ക്

ഇന്ത്യൻ ഓവർസീസ് ബാങ്ക് സ്ഥിര നിക്ഷേപ പലിശ നിരക്ക് പുതുക്കിയതോടെ ഒരു വർഷത്തെ നിക്ഷേപങ്ങൾക്ക് പലിശ നിരക്ക് 6.5 ശതമാനമായി ഉയർന്നു. 444 ദിവസത്തെ നിക്ഷേപങ്ങൾക്ക് പലിശ നിരക്ക് 7.25 ശതമാനമായി ഉയർന്നു. നേരത്തെ 7 ശതമാനമായിരുന്നു. 2 വർഷം മുതൽ 3 വർഷം വരെയുള്ള നിക്ഷേപങ്ങളുടെ പലിശ നിരക്ക് 6.8 ശതമാനം പലിശ ലഭിക്കും. 3 വർഷത്തിന് മുകളിൽ കാലാവധിയുള്ള നിക്ഷേപങ്ങളുടെ പലിസ നിരക്കിൽ മാറ്റമില്ല. പലിശ 6.5 ശതമാനമായി തുടരും. 

ഹ്രസ്വകാല നിക്ഷേപങ്ങൾക്ക് 4 മുതൽ 5.35 ശതമാനം വരെ പലിശ ലഭിക്കും. 7 ദിവസം മുതൽ 29 ദിവസം വരെ കാലാവധിയുള്ള സ്ഥിര നിക്ഷേപത്തിന് പലിശ 4 ശതമാനമാണ്. 30 ദിവസം മുതൽ 90 ദിവസം വരെ കാലാവധിയുള്ള നിക്ഷേപങ്ങളുടെ പലിശ നിരക്ക് 4.25 ശതമാനവും 91 ദിവസം മുതൽ 179 ദിവസം വരെ കാലാവധിയുള്ള നിക്ഷേപങ്ങൾക്ക് 4.5 ശതമാനവും പലിശലഭിക്കും.

180- 269 ദിവസത്തേക്ക് 4.95 ശതമാനവും 270 ദിവസം- 1 വർഷത്തിൽ താഴെ 5.35 ശതമാനം പലിശയും ലഭിക്കും. മുതിർന്ന പൗരന്മാർക്ക് 0.50 ശതമാനം അധിക നിരക്കും 80 വയസ് പൂർത്തിയായവർക്ക് 0.75 ശതമാനം അധിര നിരക്കും ബാങ്ക് നൽകുന്നു. 

സെൻട്രൽ ബാങ്ക് ഓഫ് ഇന്ത്യ

പൊതുമേഖലാ ബാങ്കായ സെൻട്രൽ ബാങ്കിൽ പുതുക്കിയ പലിശ നിരക്കുകൾ ഏപ്രിൽ 10 മുതൽ നിലവിൽ വന്നു. സാധാരണ നിക്ഷേപകന് 4 ശതമാനം മുതൽ 6.25 ശതമാനം വരെയും മുതിർന്ന പൗരന്മാർക്ക് 4.50 ശതമാനം മുതൽ 6.75 ശതമാനം വരെയും പലിശ ലഭിക്കും. ഒരു വർഷം മുതൽ രണ്ട് വർഷത്തിൽ താഴെ വരെ കാലാവധിയുള്ള നിക്ഷേപങ്ങൾക്കാണ് ഉയർന്ന പലിശ നിരക്ക് ലഭിക്കുന്നത്. സാധാരണ നിക്ഷേപകർക്ക് 6.75 ശതമാനവും മുതിർന്ന പൗരന്മാർക്ക് 7.25 ശതമാനം പലിശും ലഭിക്കും.