ചുരുങ്ങിയ കാലം കൊണ്ട് നിങ്ങളുടെ പണം വളരും; ഈ എഫ്.ഡിയിൽ നിക്ഷേപിക്കാം, 9% വരെ പലിശ കിട്ടും

നിക്ഷേപകർക്കിടയിൽ ഏറ്റവും ജനപ്രിയമായ മാർ​ഗമാണ് സ്ഥിര നിക്ഷേപം അഥവാ എഫ്.ഡി. താരതമ്യേന ഉയ‍ർന്ന പലിശ ലഭിക്കുന്നതിനാൽ ഉയർന്ന വരുമാനം എഫ്.ഡിയിലൂടെ ഉറപ്പാക്കാം. രാജ്യത്തെ എല്ലാ ബാങ്കുകളും ബാങ്ക് ഇതര സ്ഥാപനങ്ങളും എഫ്.ഡി നിക്ഷേപത്തെ പ്രോത്സാഹിപ്പിക്കുന്നുണ്ട്. നിലവിലെ കണക്കുകൾ പ്രകാരം സ്ഥിര നിക്ഷേപങ്ങൾക്ക് ഉയർന്ന പലിശ നിരക്ക് വാ​ഗ്ദാനം ചെയ്യുന്നത് സ്മോൾ ഫിനാൻസ് ബാങ്കുകളാണ്. വിവിധ ബാങ്കുകൾ നൽകുന്ന പലിശ നിരക്കുകളെ കുറിച്ച് പരിശോധിക്കാം.

സ്മോൾ ഫിനാൻസ് ബാങ്കുകളുടെ എഫ്.ഡി

നിലവിൽ സ്ഥിര നിക്ഷേപങ്ങൾക്ക് ഏറ്റവും ഉയർന്ന പലിശ നിരക്കുകൾ നൽകുന്നത് സ്മോൾ ഫിനാൻസ് ബാങ്കുകളാണ്. അവയിൽ, യൂണിറ്റി സ്മോൾ ഫിനാൻസ് ബാങ്കും നോർത്ത് ഈസ്റ്റ് സ്മോൾ ഫിനാൻസ് ബാങ്കും ഉയർന്ന നിരക്ക് നൽകുന്നു. അതായത് ഇവ രണ്ടും 1 മുതൽ 3 വർഷം വരെയുള്ള നിക്ഷേപങ്ങൾക്ക് 9% പലിശ വാഗ്ദാനം ചെയ്യുന്നു. വിപണി നിരക്ക് നോക്കിയാൽ ഇത് ഏറ്റവും ഉയർന്ന നിരക്കാണ്.

• യൂണിറ്റി സ്മോൾ ഫിനാൻസ് ബാങ്ക് : 1 മുതൽ 3 വർഷം വരെ കാലാവധിയുള്ള എഫ്.ഡിക്ക് 9% പലിശ നൽകുന്നു.

• നോർത്ത് ഈസ്റ്റ് സ്മോൾ ഫിനാൻസ് ബാങ്ക് : 546 ദിവസം മുതൽ 1111 ദിവസം വരെയുള്ള എഫ്.ഡിക്ക് 9% പലിശ നൽകുന്നു.

• ജന സ്മോൾ ഫിനാൻസ് ബാങ്ക് : 1 മുതൽ 3 വർഷം വരെയുള്ള നിക്ഷേപങ്ങൾക്ക് 8.25% പലിശ വാഗ്ദാനം ചെയ്യുന്നു.

• സൂര്യോദയ് സ്‌മോൾ ഫിനാൻസ് ബാങ്ക് : 2 വർഷം മുതൽ 3 വർഷം വരെയുള്ള എഫ്‌.ഡികൾക്ക് 8.60%, 5 വർഷത്തെ എഫ്‌.ഡികൾക്ക് 8.25% എന്നീ നിരക്കിൽ പലിശ നൽകുന്നു.

സ്വകാര്യമേഖലാ ബാങ്കുകളുടെ എഫ്.ഡി

സ്വകാര്യമേഖലാ ബാങ്കുകളും മികച്ച പലിശ നിരക്ക് നൽകുന്നു. എന്നാൽ ഈ നിരക്കുകൾ സ്‌മോൾ ഫിനാൻസ് ബാങ്കുകളെ അപേക്ഷിച്ച് കുറവാണ്. പ്രധാന സ്വകാര്യ ബാങ്കുകളുടെ എഫ്.ഡി നിരക്ക് എങ്ങനെയെന്ന് നോക്കാം.

• ബന്ധൻ ബാങ്ക് : 1 വർഷത്തെ സ്ഥിര നിക്ഷേപങ്ങൾക്ക് 8.05% പലിശ വാഗ്ദാനം ചെയ്യുന്നു.

• ആർ.ബി.എൽ ബാങ്ക് : 500 ദിവസത്തെ കാലാവധിയുള്ള എഫ്.ഡികൾക്ക് 8.% പലിശ നൽകുന്നു.

• ഐ.സി.ഐ.സി.ഐ ബാങ്ക്, ആക്സിസ് ബാങ്ക്: ഈ രണ്ട് ബാങ്കുകളും 15 മാസം മുതൽ 2 വർഷം വരെയുള്ള എഫ്ഡികൾക്ക് 7.25% മുതൽ 7.50% വരെ പലിശ നൽകുന്നു. 

• എച്ച്‌.ഡി.എഫ്‌.സി ബാങ്ക് : 4 വർഷം 7 മാസം എന്ന ദീർഘകാല എഫ്.ഡി 7.40% നിരക്കിൽ പലിശ വാഗ്ദാനം ചെയ്യുന്നു.

ദീർഘകാല എഫ്.ഡിയിൽ നിക്ഷേപിക്കാൻ പ്ലാനുണ്ടോ? ഈ ബാങ്കുകൾ ഉയർന്ന പലിശ നൽകുന്നു

പൊതുമേഖലാ ബാങ്കുകളുടെ എഫ്.ഡി

പൊതുമേഖലാ ബാങ്കുകൾ പരമാവധി ഉയർന്ന പലിശ നിരക്ക് നൽകാൻ ശ്രമിക്കുന്നു. എന്നാൽ മറ്റു ബാങ്കുകളെ അപേക്ഷിച്ച് താരതമ്യേന ഇവിടെ പലിശ കുറവാണ്. ഓരോ ബാങ്കുകളും എത്ര പലിശ നൽകുന്നുവെന്ന് നോക്കാം.

• കാനറാ ബാങ്ക് : 3 വർഷം മുതൽ 5 വർഷത്തിൽ താഴെയുള്ള എഫ്ഡികൾക്ക് 7.40% പലിശ നൽകുന്നു. പൊതു മേഖലാ ബാങ്കുകളിൽ ഏറ്റവും ഉയർന്ന നിരക്കാണിത്.

• ബാങ്ക് ഓഫ് ബറോഡ : 400 ദിവസത്തെ കാലയളവുള്ള എഫ്.ഡികൾക്ക് 7.30% പലിശ ഉറപ്പാക്കുന്നു.

• ബാങ്ക് ഓഫ് മഹാരാഷ്ട്ര, യൂണിയൻ ബാങ്ക് ഓഫ് ഇന്ത്യ : ഈ രണ്ട് ബാങ്കുകളും യഥാക്രമം 7.30%, 7.25% എന്നീ നിരക്കിൽ പലിശ വാ​ഗ്ദാനം ചെയ്യുന്നു.

• സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ) : 444 ദിവസത്തെ കാലാവധിയുള്ള എഫ്.ഡികൾക്ക് 7.25% പലിശയാണ് നൽകുന്നത്.

കണക്ക് പ്രകാരം സ്മോൾ ഫിനാൻസ് ബാങ്കുകളാണ് ഉയർന്ന എഫ്.ഡി പലിശ വാ​ഗ്ദാനം ചെയ്യുന്നത്. ബന്ധൻ ബാങ്ക്, ആർ.ബി.എൽ തുടങ്ങിയ സ്വകാര്യമേഖലാ ബാങ്കുകൾ മത്സരാധിഷ്ഠിത നിരക്കുകൾ നൽകുന്നു. 2025ൽ എഫ്.ഡിയിൽ നിക്ഷേപിക്കാൻ പ്ലാനുള്ളവർ ഈ പലിശ നിരക്ക് പരിശോധിച്ച ശേഷം മികച്ചത് തിരഞ്ഞെടുക്കൂ.