ചിട്ടി സിമ്പിളാണ്, പക്ഷേ..; മാസ അടവ് മുടങ്ങിയാൽ പിന്മാറുന്നത് എങ്ങനെ? അടച്ച പണം തിരികെ കിട്ടുമോ?

സാമ്പത്തിക സ്ഥിതി എല്ലാ കാലത്തും ഒരുപോലെയാകണമെന്നില്ല. മാസ തവണകളടയ്ക്കുന്ന നിക്ഷേപത്തിൽ ചേരുന്നൊരാൾക്ക് സാമ്പത്തിക ബുദ്ധിമുട്ട് നേരിടുമ്പോൾ നിക്ഷേപത്തിൽ നിന്ന് പിന്മാറാൻ സാധിക്കുമോയെന്നും അറിഞ്ഞിരിക്കേണ്ടതുണ്ട്. സാധാരണ നിക്ഷേപങ്ങളിൽ മാസതവണ മുടക്കം വരുത്തിയാൽ നിക്ഷേപം അവസാനിപ്പിച്ച് പണം തിരികെ നൽകുന്നതാണ് രീതി. നിക്ഷേപത്തിന്റെയും വായ്പയുടെയും ​ഗുണങ്ങൾ സംയോജിപ്പിച്ച കെഎസ്എഫ്ഇ ചിട്ടികളിൽ കാര്യം അല്പം വ്യത്യസ്തമാണ്. ചിട്ടിയിൽ നിന്ന് എങ്ങനെ പിന്മാറാമെന്നും അടച്ച തുക എങ്ങനെ തിരികെ വാങ്ങാമെന്നും നോക്കാം. 

വിളിച്ചെടുക്കാത്ത ചിട്ടി

വിളിച്ചെടുക്കാത്ത ചിട്ടിയും വിളിച്ചെടുത്ത ചിട്ടിയും അവസാനിപ്പിക്കാൻ വ്യത്യസ്ത മാനദണ്ഡങ്ങളാണുള്ളത്. വിളിച്ചെടുക്കാത്ത ചിട്ടി എങ്ങനെ അവസാനിപ്പിച്ച് അടച്ച തുക വാങ്ങിയെടുക്കാമെന്ന് നോക്കാം. ചിട്ടി തുടരാൻ കഴിയാത്ത സാമ്പത്തിക പ്രതിസന്ധിയാണെങ്കിൽ ചിട്ടിയുള്ള ശാഖയിലെത്തി മാനേജറെ കണ്ട് ചിട്ടിയിൽ നിന്ന് ഒഴിവാക്കാനുള്ള അപേക്ഷ നൽകുകയാണ് വേണ്ടത്. അപേക്ഷ കിട്ടിയാൽ തൊട്ടടുത്ത മാസം മുതൽ ചിട്ടിയിൽ നിന്ന് ഒഴിവാക്കും. ഇതോടെ ചിട്ടി മുടക്ക ചിട്ടിയാകും. പണം ലഭിക്കാൻ ഇനിയുമുണ്ട് കടമ്പകൾ. 

ഇവിടെ ഉദാഹരണമായി 5,000 രൂപ മാസ അടവുള്ള 40 മാസ കാലായളവുള്ള 2 ലക്ഷത്തിന്റെ ചിട്ടിയെടുക്കാം.ചിട്ടിയിൽ ചേർന്ന് 11 മാസം ശേഷം പിന്മാറുമ്പോൾ ലേല കിഴിവ് ലഭിച്ച് 11 മാസം കൊണ്ട് അടച്ച 45,200 രൂപയാണ് ചിട്ടി അക്കൗണ്ടിലുണ്ടാവുക. തുടര്‍ന്ന് പോകാന്‍ സാധിക്കാത്ത സാഹചര്യത്തില്‍ ചിട്ടി മുടക്ക ചിട്ടിയാകുമ്പോൾ മറ്റൊരാൾ ചിട്ടി ഏറ്റെടുക്കാൻ വന്നാലാണ് അടച്ച തുക തിരികെ ലഭിക്കുക.

മുടക്ക ചിട്ടി ചേരാന്‍ ആരും വന്നില്ലെങ്കില്‍ ചിട്ടി കാലാവധിയെത്തിയ ശേഷം മാത്രമാണ് അടച്ച പണം തിരികെ ലഭിക്കും. ഇത്തരം സാഹചര്യത്തില്‍ ഫോര്‍മാന്‍സ് കമ്മീഷന്‍ ഈടാക്കുന്നതല്ല.

ലേലം വിളിച്ചെടുത്ത ചിട്ടി

ലേലം വിളിച്ചെടുത്ത ചിട്ടി അടവ് മുടങ്ങുന്ന പക്ഷം ജാമ്യം നൽകിയ ഈടിൽ നിന്ന് പണം ഈടാക്കാൻ കെഎസ്എഫ്ഇ നടപടികളെടുക്കും. ചിട്ടി വിളിച്ചെടുത്തൊരാൾക്ക് ജാമ്യം നൽകിയ വസ്തു തിരിച്ചെടുക്കേണ്ടി വരുന്ന സാ​ഹചര്യത്തിലോ മറ്റ് അവസരങ്ങളിലോ ഭാവി ബാധ്യത മുൻകൂട്ടി അടച്ച് ചിട്ടിയിൽ നിന്ന് പിന്മാറാം. ഇതിനായി 2 വഴികളാണുള്ളത്. 

10,000 രൂപ മാസ അടവുള്ള 50 മാസ കാലാവധിയുള്ള 5 ലക്ഷത്തി്ൻെറ ചിട്ടി ഉദാഹരണമായെടുക്കാം. വിളിച്ചെടുത്ത ചിട്ടി 30 മാസം അടച്ച ശേഷം പിന്മാറാൻ ഭാവി ബാധ്യതയ്ക്ക് തുല്യമായ തുക ചിട്ടിയിലേക്ക് അടയ്ക്കണം. ഇവിടെ ബാക്കിയുള്ള 20 മാസത്തേക്ക് 10,000 രൂപ മാസ അടവ് പ്രകാരം 2 ലക്ഷം രൂപ അടയ്ക്കേണ്ടതുണ്ട്.

2 ലക്ഷം രൂപ ഒന്നിച്ച് ചിട്ടിയിലേക്ക് അടച്ച് ജാമ്യം പിന്‍വലിക്കാം. ഇതോടെ ചിട്ടിയിൽ നിന്ന് ഒഴിയാൻ സാധിക്കും. ഇവിടെ ചിട്ടിയിൽ നിന്നുള്ള ലാഭ വിഹിതം ലഭിക്കുന്നില്ല. ഇത്തരത്തിൽ നേരത്തെ ചിട്ടി അവസാനിപ്പിക്കുന്നവർക്ക് ചിട്ടി കാലായളവ് കഴിയുമ്പോള്‍ ലേല കിഴിവ് നൽകുകയാണ് ചെയ്യുന്നത്. 

മറ്റൊരു വഴിയിൽ അടയ്ക്കേണ്ട ഭാവി ബാധ്യത കെഎസ്എഫ്ഇ സു​ഗമ അക്കൗണ്ടിലേക്ക് മാറ്റുകയാണ് വേണ്ടത്. ഇവിടെ 2 ലക്ഷം രൂപ സുഗമ അക്കൗണ്ടിലേക്ക് നിക്ഷേപിച്ചാല്‍ സെക്യൂരിറ്റി പിന്‍വലിക്കാം. മാസത്തിൽ ഈ അക്കൗണ്ടിൽ നിന്നും ചിട്ടിയിലേക്ക് അടയ്ക്കേണ്ട തുക ചിട്ടി അക്കൗണ്ടിലേക്ക് ക്രെഡിറ്റ് ചെയ്യും. ഡിവിഡന്റ് കഴിഞ്ഞുള്ള തുക സുഗമ അക്കൗണ്ടില്‍ കിടക്കും. സുഗമ അക്കൗണ്ടിലെ തുകയ്ക്ക് 6 മാസം കൂടുമ്പോൾ പലിശ ലഭിക്കുകയും ചെയ്യും.