1 വർഷത്തിനപ്പുറം ആവശ്യമുള്ള ഫണ്ട് എവിടെ നിക്ഷേപിക്കാം; 1 വർഷത്തേക്ക് ബാങ്ക് എഫ്ഡി നൽകും 7.75% പലിശ

ഹ്രസ്വകാല നിക്ഷേപം എപ്പോഴും കുറഞ്ഞ റിസ്കിൽ ചെയ്യേണ്ട കാര്യമാണ്. ഭാവിയിലേക്ക് ആവശ്യമുള്ള തുക നിശ്ചിത കാലത്തേക്ക് സുരക്ഷിതമായി സൂക്ഷിക്കാനൊരിടം കണ്ടെത്തുകയാണ് വേണ്ടത്. സ്ഥലം വിറ്റു കിട്ടിയ പണം വീട് വെയ്ക്കാൻ ഉപയോ​ഗിക്കുന്നതിനിടയിൽ ലഭിക്കുന്ന ഇടവേളയോ വിരമിക്കൽ കാലത്ത് ലഭിച്ച തുക മക്കളുടെ വിദ്യാഭ്യാസത്തിന് ഉപയോ​ഗിക്കുന്നതിന് ഇടയിലുള്ള സമയമോ എങ്ങനെ വിനിയോ​ഗിക്കാം എന്നാണ് പഠിക്കേണ്ടത്.

സേവിം​ഗ്സ് അക്കൗണ്ട് ഏറ്റവും സുരക്ഷിതമായി കാണുന്നുണ്ടാകും. വളർച്ചയില്ലാതെ പണം 1 വർഷം സേവിം​ഗ്സ് അക്കൗണ്ടിൽ കിടക്കുന്നതിന് പകരം സുരക്ഷിതമായ ചില മാർ​ഗങ്ങൾ ഇന്ന് മാർക്കറ്റിൽ ലഭ്യമാണ്.

1 വർഷത്തേക്ക് എവിടെ നിക്ഷേപിക്കാം

ഒരു വർഷ കാലയളവിനുള്ളിൽ ആവശ്യമുള്ള പണം സേവിം​ഗ്സ് അക്കൗണ്ടിൽ സൂക്ഷിക്കുന്നതിന് പകരമായി മികച്ച റിട്ടേൺ കിട്ടുന്ന ഇടങ്ങളിലേക്ക് മാറ്റുന്നതാണ് നിക്ഷേപകനെ സംബന്ധിച്ച് ഫലപ്രദമായ കാര്യം. എന്നാൽ കാലയളവ് വളരെ ചുരുങ്ങിയതായതിനാൽ ഇക്വിറ്റി നിക്ഷേപം പരി​ഗണിക്കാതിരിക്കുന്നതാകും ഉചിതം. വിവിധ ഡെബ്റ്റ് നിക്ഷേപ മാർ​ഗങ്ങൾ ഉപയോ​ഗപ്പെടുത്താം. ലിക്വിഡ് ഫണ്ട്, അൾട്ര ഡ്യൂറേഷൻ ഫണ്ട് മുതൽ സ്ഥിര നിക്ഷേപം വരെ ഈ പട്ടികയിലുണ്ട്.

നിക്ഷേപവും 1 വർഷത്തെ റിട്ടേണും

വിവിധ നിക്ഷേപങ്ങളും ഇവ 1 വർഷ കാലയളവിൽ നൽകിയ മികച്ച റിട്ടേണും പരിശോധിക്കാം. സാധാരണയായി 90 ദിവസത്തിനുള്ളിൽ കാലാവധിയെത്തുന്ന മണി മാർക്കറ്റ് ഉപകരണങ്ങളിലാണ് ലിക്വിഡ് ഫണ്ടുകൾ നിക്ഷേപിക്കുന്നത്. ഹോൾഡിംഗ് കാലയളവ് വളരെ കുറവായതിനാൽ ഈ ഫണ്ടുകളിൽ അപകടസാധ്യതകളൊന്നുമില്ല. 1 വർഷ കാലയളവിൽ 3.48 ശതമാനമാണ് ലിക്വിഡ് ഫണ്ടിന്റെ മികച്ച പ്രകടനം.

അടുത്തത് അൾട്രാ ഷോർട്ട് ഡ്യൂറേഷൻ ഫണ്ടുകളാണ്. ഇവ 3-6 മാസത്തിനുള്ളിൽ കാലാവധി പൂർത്തിയാകുന്ന ഡെബ്റ്റ് സെക്യൂരിറ്റികളിൽ നിക്ഷേപിക്കും. ഏറ്റവും മികച്ച പ്രകടനം കാഴ്ചവെച്ച ഫ്രാങ്ക്ലിൻ ഇന്ത്യ അൾട്രാ ഷോർട്ട് ബോണ്ട് ഫണ്ട് കഴിഞ്ഞ 1 വർഷത്തിനിടെ 12.28 ശതമാനം റിട്ടേൺ നൽകി.

6-12 മാസം ദൈർഘ്യമുള്ള സെക്യൂരിറ്റികളിൽ നിക്ഷേപിക്കുന്ന, 1 വർഷത്തേക്ക് ഫണ്ടുകൾ പാർക്ക് ചെയ്യാൻ ഉപകാരപ്പെടുന്ന നിക്ഷേപമാണ് ലോ ഡ്യൂറേഷൻ ഫണ്ട്. ഫ്രാങ്ക്ലിൻ ഇന്ത്യ ലോഡ്യൂറേഷൻ ഫണ്ട് 1 വർഷത്തിനിടെ 18.12 ശതമാനം റിട്ടേൺ ഇവ നൽകി.

മറ്റൊരു മാർ​ഗം മണി മാർക്കറ്റ് ഫണ്ടുകളാണ്. 1 വർഷത്തിനിടെ 6.12 ശതമാനം റിട്ടേണാണ് ഇവ നൽകിയത്. 1 വര്‍ഷത്തേക്ക് നല്ലൊരു റിട്ടേണ്‍ പ്രതീക്ഷിക്കുന്നുണ്ടെങ്കില്‍ സുരക്ഷിതമായ സ്ഥിര നിക്ഷേപങ്ങളും പരി​ഗണിക്കാം. 7.75 ശതമാനം വരെ പലിശ നല്‍കുന്ന ബാങ്കുകളുണ്ട്.

1 വർഷത്തേക്കുള്ള സ്ഥിര നിക്ഷേപം

ഹ്രസ്വകാല നിക്ഷേപത്തിന് ഏറ്റവും മികച്ച പലിശ നല്‍കുന്ന ബാങ്കുകളില്‍ ഒന്നാമത് സ്വകാര്യ ബാങ്കായ ഇന്‍ഡസ്ഇന്‍ഡ് ബാങ്കാണ്. 1 വര്‍ഷം മുതല്‍ 2 വര്‍ഷം വരെയുള്ള കാലയളവില്‍ ഇന്‍ഡസ്ഇന്‍ഡ് ബാങ്ക് നല്‍കുന്ന പലിശ നിരക്ക് 7.75 ശതമാനം ആണ്. പട്ടികയിലെ രണ്ടാം സ്ഥാനവും സ്വകാര്യ ബാങ്കിനാണ്. ബന്‍ഡന്‍ ബാങ്ക് 7.25 ശതമാനം പലിശയാണ് നല്‍കുന്നത്. 365 ദിവസം മുതല്‍ 499 ദിവസമാണ് കാലാവധി.

1 വര്‍ഷം പൂര്‍ത്തിയാകുന്ന നിക്ഷേപങ്ങള്‍ക്ക് 7.25 ശതമാനം പലിശയാണ് ഡിസിബി ബാങ്ക് നല്‍കുന്നത്. 365 മുതല്‍ 389 ദിവസത്തേക്ക് കൊട്ടക് മഹീന്ദ്ര ബാങ്ക് 7.10 ശതമാനം പലിശയാണ് നല്‍കുന്നത്. തമിഴ്‌നാട് മര്‍ക്കന്റൈല്‍ ബാങ്കില്‍ 7.25 ശതമാനം പലിശ നിരക്കില്‍ 1 വര്‍ഷത്തേക്ക് നിക്ഷേപിക്കാം.