കൂടുതല്‍ ലാഭം നേടാന്‍ ചിട്ടിയില്‍ ചേരേണ്ടത് എപ്പോള്‍? ശ്രദ്ധിക്കാം 5 കാര്യങ്ങള്‍

വിവാഹം, വായ്പ അടച്ചൂ തീര്‍ക്കല്‍, വാഹനം വാങ്ങല്‍ തുടങ്ങിയ ആവശ്യങ്ങള്‍ക്കുള്ള പണം കണ്ടെത്താനുള്ളൊരു മാർ​ഗമാണ് കെഎസ്എഫ്ഇ ചിട്ടികൾ. ചിട്ടി കാലാവധിയോളം കാത്തിരിക്കുന്നതിന് പകരം ലേലം വിളിയിലൂടെ ആവശ്യങ്ങള്‍ക്ക് പണം കണ്ടെത്താൻ ചിട്ടിയിലൂടെ സാധിക്കും. ബാങ്ക് വായ്പകളെക്കാള്‍ ലാഭകരമായി ഉപയോ​ഗിക്കാമെന്നതാണ് ചിട്ടിയുടെ പ്രത്യേകത. അതേസമയം ചിട്ടിയെ പറ്റി വ്യക്തമാക്കി മനസിലാക്കാത്ത പക്ഷം ചിട്ടി നഷ്ടത്തിലാകാനും സാധ്യതയുണ്ട്.

കൃത്യമായ സമയത്ത് ലേലം വിളിച്ച് ജാമ്യം ഹാജരാക്കിയാൽ പണ സമാഹരണത്തിന് മികച്ച മാർ​ഗം തന്നെയാണ് ചിട്ടിയിൽ. ലേലം വിളിച്ചെടുക്കുന്ന സമയം പോലെ പ്രധാനമാണ് ചിട്ടിയിൽ ചേരുന്ന സമയവും. ഇത് പരി​ഗണിക്കാതിരിക്കുമ്പോഴാണ് നഷ്ട സാധ്യതയുണ്ടാകുന്നത്. ഈ സാഹചര്യത്തിൽ പുതുതായി ചിട്ടി ചേരാൻ ആ​​ഗ്രഹിക്കുന്നവർക്കും ചിട്ടിയിൽ ചേർന്നവർക്കും ചിട്ടി ലാഭകരമാക്കാൻ സഹായിക്കുന്ന 5 വീതം പോയിന്റുകളാണ് ചുവടെ ചേർക്കുന്നത്.

ചിട്ടിയില്‍ ചേരുന്നതിന് മുന്‍പ് ശ്രദ്ധിക്കാം

* പണത്തിന് ആവശ്യം വരുന്നതിന് 1, 2 വര്‍ഷം മുന്‍പ് ചിട്ടിയില്‍ ചേരുന്നതാണ് അനുയോജ്യം. നേരത്തെ ചേര്‍ന്നാല്‍ പരമാവധി നേട്ടം സ്വന്തമാക്കാന്‍ സാധിക്കും. ചിട്ടിയില്‍ ചേര്‍ന്നയുടനെ വിളിച്ചെടുക്കുമ്പോള്‍ പരമാവധി ലേല കിഴിവിലാണ് ചിട്ടി ലഭിക്കുക.

1 ലക്ഷം രൂപയുടെ 25 മാസത്തിന്റെ ചിട്ടി ആദ്യ മാസം വിളിച്ചെടുത്താൽ 30 ശതമാനം കിഴിവില്‍ 70,000 രൂപ ലഭിക്കും. വൈകുന്തോറും കുറഞ്ഞ കിഴിവില്‍, 80,000, 85,000 രൂപയ്ക്ക് ചിട്ടി ലേലം വിളിച്ചെടുക്കാൻ സാധിക്കും. 

* ചിട്ടിയിലെ ഫോര്‍മാന്‍സ് കമ്മീഷന്‍, ചരക്കു സേവന നികുതി, ഡോക്യുമെന്റേഷന്‍ ചാര്‍ജ് തുടങ്ങിയവ കിഴിച്ച് ലഭിക്കുന്ന തുക ഉദ്യേശിച്ച കാര്യം നിറവേറ്റാന്‍ പറ്റുന്നതാണോയെന്ന് വിലയിരുത്തണം.ഇതിന് ഒത്ത ചിട്ടിയിൽ ചേരണം

* ചേരാന്‍ ഉദ്ദ്യേശിക്കുന്ന ചിട്ടിയുടെ മാസ തവണ കാലവധി വരെ അടച്ചു തീര്‍ക്കാന്‍ സാധിക്കുന്നതാണോയെന്ന് പരിശോധിക്കണം. ചിട്ടിയില്‍ ലേല കിഴിവ് ലഭിക്കുമ്പോള്‍ മാസ തവണ കുറയുമെങ്കിലും ചിട്ടി അവസാന കാലത്തെത്തുമ്പോള്‍ മാസ അടവ് ഉയരാറുണ്ട്. 

* തിരഞ്ഞെടുക്കുന്ന ചിട്ടി ഉദ്യേശിക്കുന്ന സമയത്ത് ലേലം വിളിച്ചെടുക്കാന്‍ പറ്റുന്നത് ആണോയെന്ന് ഉറപ്പാക്കണം. അതായത്, 1 വര്‍ഷം കഴിഞ്ഞ ഉടനെ പണം ലഭിക്കണമെങ്കില്‍ കാലവധി കുറഞ്ഞ, 24-30 മാസ കാലാവധിയുള്ള ചിട്ടിയില്‍ ചേരുന്നതാണ് ഉചിതം. കാലാവധി ഉയര്‍ന്ന ചിട്ടിയില്‍ നിന്ന് ലാഭത്തില്‍ ചിട്ടി ലഭിക്കാന്‍ സമയമെടുക്കും.

* ചിട്ടി ലേലത്തില്‍ പിടിച്ചാല്‍ ഹാജരാക്കേണ്ട ജാമ്യം ചിട്ടിയില്‍ ചേരുന്നതിന് മുന്‍പ് ഉറപ്പാക്കണം. ഇത് ശാഖാ മാനേജറെ കണ്ട് ഉറപ്പാക്കി ചിട്ടയില്‍ ചേരുന്നതാണ് ഉചിതം. 

ചിട്ടിയില്‍ ചേര്‍ന്നവര്‍ ശ്രദ്ധിക്കാന്‍

* എത്ര തുകയ്ക്ക് പ്രസ്തുത ചിട്ടി വിളിച്ചെടുക്കാം എന്ന് സ്വയം തീരുമാനിച്ച് ഉറപ്പിക്കുക. അത്രയും തുകയ്ക്ക ചിട്ടി വിളിക്കാന്‍ തയ്യാറാണെന്ന് കാണിച്ച് പ്രോക്‌സി നല്‍കുക. ഇത് വഴി ചിട്ടി വിളിക്കാന്‍ ആളില്ലെങ്കില്‍ പ്രോക്‌സി പരിഗണിച്ച് നേരത്തെ ചിട്ടി ലഭിക്കാന്‍ സാധിക്കും

* ലേല തീയതിക്ക് രണ്ട് ദിവസം മുന്‍പെങ്കിലും മാസത്തവണ അടയ്ക്കാന്‍ ശ്രദ്ധിക്കുക. മാസത്തവണ മുടങ്ങിയാല്‍ പ്രോക്‌സി അസാധുവാകും. ഇത് ഒഴിവാക്കാനും കെഎസ്എഫ്ഇയില്‍ മികച്ച ഉപഭോക്താവായി പരിഗണിക്കാനും കൃത്യ സമയത്ത് ചിട്ടി അടയ്ക്കുന്നത് സഹായിക്കും.

* ഓരോ മാസവും ഏത്ര രൂപ് ലേല കിഴിവ് ലഭിക്കുന്നു എന്ന കാര്യം രേഖപ്പെടുത്തിവെയ്ക്കുക. ചിട്ടി വിളിച്ചെടുക്കാന്‍ എത്ര സമയം ബാക്കിയുണ്ടെന്ന് മനസിലാക്കാന്‍ സാധിക്കും.

* പണം ആവശ്യമുള്ളതിന് 2 മാസം മുന്‍പ് ചിട്ടി വിളിച്ചെടുക്കുക. ജാമ്യത്തില്‍ എന്തെങ്കിലും പ്രശ്‌നമുണ്ടെങ്കില്‍ പരിഹരിക്കാന്‍ ഇതുവഴി സമയം ലഭിക്കും. ചിട്ടി വിളിച്ച തീയതിയില്‍ നിന്ന് കൃത്യം 1 മാസം കഴിഞ്ഞാണ് ചിട്ടി പണം ലഭിക്കുക.

* ചിട്ടി വിളിച്ചെടുത്ത ശേഷം മാസത്തവണ മുടങ്ങാതെ അടയ്ക്കുക. മാസത്തവണ മുടങ്ങിയാല്‍ ചിട്ടിയില്‍ നിന്നുള്ള ഡിവിഡന്റ് മുടങ്ങും.