ക്രെഡിറ്റ് കാർഡ് ലോൺ ആണോ പേഴ്‌സണൽ ലോൺ ആണോ ഉചിതം

ക്രെഡിറ്റ് കാർഡിൽ നിന്ന് ഇന്നത്തെ കാലത്ത് വളരെ എളുപ്പത്തിൽ വായ്പ ലഭിക്കും. നല്ല ക്രെഡിറ്റ് പ്രൊഫൈൽ ഉള്ള ഉപഭോക്താവാണെങ്കിൽ സാധാരണ ബാങ്ക് തന്നെ വിളിച്ച് ക്രെഡിറ്റ് പരിധികൾക്കപ്പുറവും വായ്‌പ നൽകാറുണ്ട്. ബാങ്കുകളിൽ നിന്ന് ലഭിക്കുന്ന പേഴ്‌സണൽ ലോണുകളുമായി താരതമ്യപ്പെടുത്തുമ്പോൾ ക്രെഡിറ്റ് കാർഡ് വായ്‌പകൾ ലഭിക്കാൻ എളുപ്പമാണെങ്കിലും പലിശ കൂടുതലാണ്. പ്രോസസ്സിംഗ് ഫീസ്, പ്രീ-ക്ലോഷർ ചാർജുകൾ എന്നിവയ്‌ക്കൊപ്പം ക്രെഡിറ്റ് കാർഡ് വായ്പകൾക്ക് ചരക്ക് സേവന നികുതി (ജിഎസ്ടി) കൂടിയുണ്ട്.

കെഡിറ്റ് കാർഡ് സ്‌റ്റേറ്റ്മെന്റ് പരിശോധിക്കുകയാണെങ്കിൽ 18 ശതമാനം ജിഎസ്‌ടി ഈടാക്കിയതായി കാണാം. അതായത് ക്രെഡിറ്റ് കാർഡ് വായ്പകളുടെ പലിശ നിരക്ക് ബാങ്ക് പേഴ്‌സണൽ ലോണിനേക്കാൾ കുറഞ്ഞത് 18 ശതമാനം കൂടുതലാണ്. ഉദാഹരണത്തിന് നിങ്ങൾ 12 ശതമാനം പലിശ നിരക്കിൽ 24 മാസത്തേക്ക് ഒരു ലക്ഷം രൂപ വായ്‌പയെടുത്തെന്ന് കരുതുക. അങ്ങനെയെങ്കിൽ നിങ്ങളുടെ ആദ്യ മാസ തവണ 4,707 രൂപയായിരിക്കും, അതിൽ പലിശ 1,000 രൂപയും പ്രധാന തിരിച്ചടവ് 3,707 രൂപയുമാണ്.

ഈ തുക ഇതേ പലിശ നിരക്കിൽ നിങ്ങൾക്ക് ക്രെഡിറ്റ് കാർഡിൽ നിന്ന് എടുക്കുകയാണെങ്കിൽ, ആദ്യമാസത്തെ തവണയായി നിങ്ങൾ 4,887 രൂപയാണ് തിരിച്ചടയ്‌ക്കേണ്ടി വരിക. അതായത് പേഴ്‌സണൽ ലോണിൽ നിങ്ങൾ അടയ്‌ക്കുന്ന തുകയേക്കാൾ 180 രൂപ കൂടുതലായി വരും. ക്രെഡിറ്റ് കാർഡ് വായ്‌പകൾക്ക് മേൽ ഈടാക്കുന്ന 18 ശതമാനം ജിഎസ്ടി കാരണമാണിത്. കൂടാതെ ക്രെഡിറ്റ് കാർഡ് കുടിശ്ശിക നിങ്ങൾക്ക് പറഞ്ഞ തീയതിയിൽ അടയ്‌ക്കാൻ കഴിഞ്ഞില്ലെങ്കിൽ കഴിവതും അത് അടുത്ത മാസത്തേക്ക് മാറ്റി വെക്കാതിരിക്കുക കാരണം ക്രെഡിറ്റ് കാർഡുകൾ കുടിശ്ശിക തുകയിൽ പ്രതിവർഷം 24-48 ശതമാനം വരെ പലിശ നിരക്ക് ഈടാക്കാറുണ്ട്.