ബാങ്കിൽ പോവേണ്ട, ഇനി വീട്ടിലിരുന്ന് തന്നെ പണം പിൻവലിക്കാം; ഈ സേവനത്തെ കുറിച്ച് നിങ്ങളറിഞ്ഞോ?

സാമ്പത്തിക കാര്യങ്ങളിൽ ഇനി കൺഫ്യൂഷൻ വേണ്ട. പെട്ടെന്ന് പണത്തിന് ആവശ്യം വന്നാൽ ബാങ്കിൽ പോവാൻ സാധിക്കാതെ വരികയോ, എ.ടി.എം കാർഡ് കൈവശം ഇല്ലാതെ വരികയോ ചെയ്താൽ പണം പിൻവലിക്കാൻ വേറെയും മാർ​ഗമുണ്ട്. അതിനാണ് ആധാർ എ.ടി.എം. ഇതിനെ കുറിച്ച് അധികം ആർക്കും അറിയില്ല. നിങ്ങൾക്കറിയാമോ?

പണത്തിന്റെ ആവശ്യം അപ്രതീക്ഷിതമായിട്ടാണ് പലപ്പോഴും വരുന്നത്. അതിനാൽ ഈ സൗകര്യത്തെ അറിയാതെ പോകരുത്. ആധാർ എ.ടി.എം എന്ന ഈ സേവനം ആരംഭിച്ചത് പോസ്റ്റ് ഓഫീസാണ്. ബാങ്ക് വഴിയോ എ.ടി.എം വഴിയോ പണം പിൻവലിക്കാൻ സാധിക്കാതെ വരുമ്പോൾ ആധാർ എ.ടി.എം ഉപയോ​ഗിച്ച് വീട്ടിലിരുന്ന് കൊണ്ട് പണം പിൻവലിക്കാം. വീട്ടിലിരുന്ന് പണം പിൻവലിക്കാൻ പോസ്റ്റ് മാസ്റ്റർ നിങ്ങളെ സഹായിക്കും.

ഇനി വീട്ടിലിരുന്ന് നിങ്ങൾക്കും ഒരു പി.പി.എഫ് അക്കൗണ്ട് തുറക്കാം; റിട്ടയർമെന്റിന് ശേഷം ഉയർന്ന വരുമാനം നേടാം 

ഇന്ത്യ പോസ്റ്റ് പേയ്മെന്റ്സ് ബാങ്ക് (ഐ.പി.പി.ബി) മുഖേന ആധാർ അധിഷ്ഠിത പണമിടപാട് സേവനങ്ങൾ ലഭ്യമാക്കി തുടങ്ങിയിട്ട് ഏറെ നാളുകളായിരുന്നു. എന്നാൽ മുൻപൊരിക്കൽ ഇന്ത്യ പോസ്റ്റിന്റെ സോഷ്യൽ മീഡിയയിലെ ഒരു കുറിപ്പാണ് ഈ സേവനത്തെ കുറിച്ച് പൊതു ജനങ്ങൾക്ക് പരിചയപ്പെടുത്തിയത്.

ആധാർ എ.ടി.എം സേവനം എങ്ങനെ?

ആധാർ അടിസ്ഥാനമാക്കിയുള്ള പേയ്‌മെൻ്റ് പ്രക്രിയയിലൂടെ, ഒരു വ്യക്തിക്ക് തൻ്റെ ബയോമെട്രിക്‌സ് ഉപയോഗിച്ച് പണം പിൻവലിക്കാനോ ആധാർ ലിങ്ക് ചെയ്‌ത അക്കൗണ്ടിൽ നിന്ന് പണമടയ്ക്കാനോ കഴിയും. ആധാർ എ.ടി.എം വഴി നിങ്ങൾക്ക് ചെറിയ തുക പിൻവലിക്കാം. എന്നാൽ ഈ സേവനം ഉപയോഗിക്കണമെങ്കിൽ നിങ്ങളുടെ ആധാർ ബാങ്ക് അക്കൗണ്ടുമായി ലിങ്ക് ചെയ്തിരിക്കണം. അങ്ങനെ ചെയ്താൽ സമയ ലാഭത്തിലൂടെ പെട്ടെന്നുള്ള ആവശ്യങ്ങളും നടക്കും.

സേവനങ്ങൾ

ആധാർ എ.ടി.എം വഴി നിങ്ങൾക്ക് വീട്ടിൽ നിന്ന് പണം പിൻവലിക്കാം. ഇതിലൂടെ നിങ്ങളുടെ ബാങ്ക് ബാലൻസ് എത്രയെന്ന് പരിശോധിക്കാനും സാധിക്കും. ഈ സേവനത്തിൽ നിന്ന് നിങ്ങൾക്ക് ഒരു മിനി പ്രസ്താവനയും എടുക്കാം. സ്വന്തമായ പണം പിൻവലിക്കുന്നത് മാത്രമല്ല, നിങ്ങൾക്ക് മറ്റൊരു ബാങ്കിലേക്ക് പണം ട്രാൻസ്ഫർ ചെയ്യാനും കഴിയും. ഇതിനൊന്നും അധിക ചാർജുകൾ ഈടാക്കുന്നില്ല. എന്നാൽ ഹോം ഡെലിവറി സേവനങ്ങൾക്ക് ഫീസ് നിങ്ങൾ അടയ്‌ക്കേണ്ടിവരും. നിലവിൽ ആധാർ എ.ടി.എം വഴി പിൻവലിക്കാവുന്ന പരമാവധി തുക 10,000 രൂപയാക്കി പരിമിതപ്പെടുത്തിയിട്ടുണ്ട്.

ആധാർ വിവരങ്ങൾ കൃത്യമായിരിക്കണം. മാത്രമല്ല നിങ്ങളുടെ ആധാർ നിങ്ങളുടെ ബാങ്ക് അക്കൗണ്ടുമായി ലിങ്ക് ചെയ്തിട്ടുണ്ടെന്ന് ഉറപ്പ് വരുത്തുക. എങ്കിൽ മാത്രമേ ആധാർ എ.ടി.എം സേവനം ഉപയോ​ഗിക്കാൻ കഴിയൂ.

പണമിടപാട് സമയത്ത് ആധാർ ആവശ്യമുണ്ടോ?

ഇത് സുപ്രധാനമാണ്. നിങ്ങളുടെ കൈവശം ആധാർ ഇല്ലയെങ്കിലും പണം പിൻവലിക്കാം. ആധാർ നമ്പറും ആധാറിൽ രജിസ്റ്റർ ചെയ്ത മൊബൈലും കൈവശം ഉണ്ടായാൽ മതി. പക്ഷേ അതിനെല്ലാം മുന്നേ നിങ്ങളുടെ ബാങ്ക് അക്കൗണ്ടും ആധാറും തമ്മിൽ ഇതിനോടകം ലിങ്ക് ചെയ്തുവെങ്കിൽ മാത്രേമ പണമിടപാട് വിജയകരമായി പൂർത്തിയാകൂ.

ഇടപാട് പൂർത്തിയായെന്ന് എങ്ങനെ അറിയാം?

പോസ്റ്റ്മാന്റെ കൈവശമുള്ള മൈക്രോ-എ.ടി.എമ്മിൽ പണമിടപാട് നടത്തിയതിന്റെ വിവരം അപ്പോൾ തന്നെ അറിയാനാവും. കൂടാതെ ഐ.പി.പി.ബിയിൽ നിന്നും ഉപയോക്താവിന് മെസേജ് ലഭിക്കും. മാത്രമല്ല പണം പിൻവലിച്ചു കഴിഞ്ഞാൽ നിങ്ങളുടെ ഫോൺ നമ്പറുമായി ബന്ധിപ്പിച്ച ബാങ്കിൽ നിന്നും പണം പിൻവലിച്ചുവെന്ന് എസ്.എം.എസ് വരും.