ചുട്ടുപൊള്ളി സംസ്ഥാനത്തെ സ്വർണവില, ഇന്ന് കൂടിയത് 960 രൂപ, വരും ദിവസങ്ങൾ നിർണ്ണായകം,ഇന്നത്തെ നിരക്കറിയാം

കുറച്ച് നാൾ മുൻപ് വരെ സ്വർണം എന്ന് കേൾക്കുമ്പോൾ സന്തോഷമായിരുന്നെങ്കിൽ ഇപ്പോൾ ആകെ മൊത്തം ആശങ്കയാണ്. കാരണം റോക്കറ്റ് വേഗതയിലാണ് സ്വർണത്തിന്‍റെ വില കുതിക്കുന്നത്. പവന്‍റെ വില 50,000 കടന്ന് 52,000 രൂപയ്ക്ക് മുകളിലെത്തിയിരിക്കുന്നു. ഇതേ കുതിപ്പ് വരും ദിവസങ്ങളിലും തുടരുകയാണെങ്കിൽ അടുത്ത് തന്നെ വില 60,000 രൂപയ്ക്ക് മുകളിലെത്താനുള്ള സാധ്യതയുണ്ട്.

ഇന്നത്തെ വില

പവന് 51,320 രൂപ എന്ന നിരക്കിലായിരുന്നു സംസ്ഥാനത്ത് വെള്ളിയാഴ്ച സ്വർണവില. ഗ്രാമിന് 6,415 രൂപ. എന്നാൽ ഒരു രാത്രി ഇരുട്ടിവെളുക്കുമ്പോഴേക്കും പവന്‍റെ വില 52,000 രൂപയ്ക്ക് മുകളിലെത്തി. 960 രൂപയാണ് ശനിയാഴ്ച ഒരു പവൻ സ്വർണത്തിന് വർധിച്ചത്.

52,280 രൂപയാണ് ഇന്ന് ഒരു പവൻ സ്വർണത്തിന്‍റെ വില. ഗ്രാമിന് 6,535 രൂപ. സ്വർണത്തിന് രേഖപ്പെടുത്തുന്ന ചരിത്രത്തിലെ ഏറ്റവും ഉയർന്ന വിലയാണ് ഇന്നത്തേത്.

വില വർധനവിന് കാരണം

അമേരിക്ക പലിശ നിരക്ക് കുറയ്ക്കുമെന്ന വാർത്തകളെ തുടർന്നാണ് സ്വർണവില സർവ്വകാല റെക്കോർഡിലേക്കുയരുന്നത്. ഇത് ആഗോള വൻകിട നിക്ഷേപകരേയും ചെറുകിട നിക്ഷേപകരേയും സ്വർണത്തിലുള്ള നിക്ഷേപ താൽപര്യം വർധിപ്പിച്ചു. കേന്ദ്ര ബാങ്കുകളുടെ വാങ്ങൽ താൽപര്യം, ഉയർന്ന ആഗോള ഡിമാന്‍റ്, രാഷ്ട്രീയ സംഘർഷങ്ങൾ എന്നിവയും സ്വർണവില ഉയരാൻ കാരണമായി.

ആഗോള സ്വർണവില

ആഗോള സ്വർണവിലിയും നേട്ടത്തിലാണ് വ്യാപാരം നടത്തുന്നത്. ട്രോയ് ഔൺസിന് 41.04 ഡോളർ ഉയർന്ന് 2329.93 ഡോളർ എന്നതാണ് നിരക്ക്. അന്താരാഷ്ട്ര വിപണിയിൽ കഴിഞ്ഞ 30 ദിവസത്തിൽ 127.18 ഡോളർ (5.88%) എന്ന തോതിൽ വലിയ കുതിപ്പാണ് സ്വർണ്ണവിലയിൽ ഉണ്ടായിരിക്കുന്നത്. ഇക്കഴിഞ്ഞ 6 മാസത്തിൽ മാത്രം 455.69 ഡോളർ (24.86%) എന്ന തോതിലാണ് വില ഉയർന്നത്.

ആഭരണം വാങ്ങുമ്പോൾ കൂടുതൽ നൽകണം

നിലവിലെ സ്വർണ വില അനുസരിച്ച് ഒരു പവൻ ആഭരണം വാങ്ങാൻ ഏറ്റവും കുറഞ്ഞത് 56,000 രൂപ നൽകേണ്ടി വരും. എങ്ങനെ എന്നാണോ ചിന്തിക്കുന്നത്. പവന്‍റെ വിലയോടൊപ്പം ഏറ്റവും കുറഞ്ഞ പണിക്കൂലി അഞ്ച് ശതമാനം,ജി.എസ്.ടി മൂന്ന് ശതമാനം,എച്ച്.യു.ഐ.ടി നിരക്ക് എന്നിവ നൽകണം. അങ്ങനെ കണക്ക് കൂട്ടുമ്പോഴാണ് വില 56,000 കടക്കുന്നത്.

ആറ് ദിവസം കൊണ്ട് കൂടിയത് 1,400 രൂപ

ഏപ്രിൽ മാസത്തെ ആദ്യത്തെ 6 ദിവസം കൊണ്ട് സ്വർണത്തിന് കൂടിയത് 1,400 രൂപയാണ്. 50,880 രൂപയായിരുന്നു ഏപ്രിൽ ഒന്നിന് സ്വർണത്തിന്‍റെ വില. രണ്ടാം തീയ്യതി ചെറിയ രീതിയിൽ വില കുറഞ്ഞ് 50,680 രൂപയിലേക്കെത്തി. എന്നാൽ മൂന്നാം തീയ്യതി വില 51,280 രൂപയിലേക്കും നാലാം തീയ്യതി വില 51,680 രൂപയിലേക്കുമെത്തി.

മൂന്ന് മാസം കൊണ്ട് കൂടിയത്

2024ലെ ആദ്യ മൂന്ന് മാസം കൊണ്ട് സ്വർണത്തിന് കൂടിയത് ഏകദേശം 4,840 രൂപയാണ്. ജനുവരി ഒന്നാം തീയ്യതി സംസ്ഥാനത്ത് 46,840 രൂപയായിരുന്നു ഒരു പവന്‍റെ വില. രണ്ടാം തീയ്യതി വില 47,000 രൂപയിലേക്കുയർന്നു. ജനുവരി 31-ആം തീയ്യതി സ്വർണവില 46,400 രൂപയായിരുന്നു.

ഫെബ്രുവരി രണ്ടാം തീയ്യതി വില 46,640 രൂപയിലേക്കെത്തി. ആ മാസം രേഖപ്പെടുത്തിയ ഏറ്റവും ഉയർന്ന വില. ഫെബ്രുവരി 15-ന് രേഖപ്പെടുത്തിയ 45,520 രൂപയാണ് ഫെബ്രുവരി മാസത്തെ ഏറ്റവും കുറഞ്ഞ സ്വർണ വില.മാർച്ച് 7-ആം തീയ്യതി സ്വർണ വില 48,000 രൂപയ്ക്ക് മുകളിലേക്കും 21-ആം തീയ്യതി 49,440 രൂപയിലേക്കും ഉയർന്നു. പവന്‍റെ വില അരലക്ഷം കടന്നതും മാർച്ച് മാസത്തിൽ തന്നെയാണ്.