പൊള്ളുന്ന വിലയിൽ തന്നെ തുടർന്ന് സ്വർണം, ഉടൻ വില കുറയില്ലെന്ന് വിലയിരുത്തൽ, 1 പവൻ വാങ്ങാൻ അരലക്ഷവും തികയില്ല

ചരിത്രത്തിലെ തന്നെ ഏറ്റവും ഉയർന്ന വിലയിലേക്കാണ് കഴിഞ്ഞ കുറച്ച് ദിവസം മുൻപ് സംസ്ഥാനത്തെ സ്വർണ വില ഓടിക്കയറിയത്. അതോടെ വിവാഹത്തിനും ആഘോഷങ്ങൾക്കുമായി സ്വർണം വാങ്ങാനിരുന്നവർ ആകെ ആശയക്കുഴപ്പത്തിലായി. എന്നാൽ കഴിഞ്ഞ 4 ദിവസമായി സ്വർണ വില മാറ്റമില്ലാതെ തുടരുന്നത് ആശ്വാസം പകരുന്ന കാര്യമാണ്.

ഇന്നത്തെ വില

മാർച്ച് 9-നാണ് സംസ്ഥാനത്തെ സ്വർണ വില ഏറ്റവും ഉയർന്ന നിരക്കിലെത്തിയത്. 48,600 രൂപയിലാണ് അന്ന് വ്യാപാരം നടന്നത്. പിന്നീടുള്ള ദിവസങ്ങളിലും സ്വർണ വിലയിൽ കുതിപ്പുണ്ടാകുമെന്നായിരുന്നു പൊതുവിൽ വിലയിരുത്തിയത്. എന്നാൽ അതുണ്ടായില്ല.

48,600 രൂപയിൽ തന്നെയാണ് ചൊവ്വാഴ്ചയും സംസ്ഥാനത്ത് സ്വർണ വ്യാപാരം പുരോഗമിക്കുന്നത്. ഗ്രാമിന് 6,075 രൂപ.

ആഗോള സ്വർണ വില

അന്താരാഷ്ട്ര നേരിയ നഷ്ടത്തിലാണ് വ്യാപാരം നടത്തുന്നത്. ട്രോയ് ഔൺസിന് 2,177 ഡോളർ എന്ന നിലയിലാണ് വ്യാപാരം. കഴിഞ്ഞ ഒരു മാസത്തിൽ ആഗോള സ്വർണ്ണവില 158.17 ഡോളർ (7.83%) ഉയർച്ചയാണ് നേടിയിരിക്കുന്നത്.

വില കത്തിക്കയറിയ മാർച്ച്

47,000 രൂപയായിരുന്നു മാർച്ച് 2-ലെ സ്വർണ വില. അടുത്ത രണ്ട് ദിവസവും സ്വർണ വില മാറ്റമില്ലാതെ തുടർന്നു. എന്നാൽ മാർച്ച് 5-ന് സ്വർണ വില 47,560 രൂപയിലേക്ക് കുതിച്ചു. അതുവരെ പവന് രേഖപ്പെടുത്തിയ ഏറ്റവും ഉയർന്ന വിലയായിരുന്നു അത്. പിറ്റേ ദിവസവും സ്വർണ വില ഉയർന്നു. മാർച്ച് 7-ന് സംസ്ഥാനത്തെ സ്വർണ വില ആദ്യമായി 48,000 രൂപയ്ക്ക് മുകളിലെത്തി. 48,080 രൂപയായിരുന്നു അന്ന് സംസ്ഥാനത്തെ സ്വർണ വില. മാർച്ച് 9 വെള്ളിയാഴ്ചയാണ് വില 48,600 എന്ന ഏറ്റവും ഉയർന്ന വിലയിലെത്തിയത്.

വില വർധനവിന് കാരണം എന്ത്...?

പ്രാദേശിക വിപണിയിലെ സ്വർണ വില ആഗോള സ്വർണ വിലയെ അടിസ്ഥാനപ്പെടുത്തിയാണ് വിലയിരുത്തുന്നത്. ആഗോള വിപണിയിൽ സ്വർണ വില കൂടുമ്പോൾ പ്രാദേശിക വിപണിയിലും വിലയിൽ വർധനവുണ്ടാകും.

യുഎസ് ഫെഡറൽ റിസർവ് ജൂണിൽ പലിശ നിരക്ക് കുറയ്ക്കുമെന്ന പ്രതീക്ഷ വർധിച്ചതും കേന്ദ്ര ബാങ്കുകൾ സ്വർണം വാങ്ങിക്കൂട്ടുന്നത് തുടരുന്നതും കാരണം സ്വർണത്തിന്‍റെ ഡിമാന്‍റ് വർധിച്ചിട്ടുണ്ട്. പ്രതികൂല സാഹചര്യങ്ങളിൽ ഏറ്റവും സുരക്ഷിതമായ നിക്ഷേപം എന്ന നിലയിലാണ് ആളുകൾ സ്വർണത്തെ വിലയിരുത്തുന്നത്. അതും വില വർധനവിന് കാരണമായി.

ഡോളറും സ്വർണവും

ഫെഡറൽ റിസർവ് പലിശ നിരക്ക് കുറയ്ക്കുമ്പോൾ എങ്ങനെ സ്വർണത്തിന്‍റെ വില കൂടുമെന്നാണോ അടുത്ത സംശയം. പലിശ നിരക്ക് സ്വർണത്തെ നേരിട്ട് സ്വാധീനിക്കില്ലെങ്കിലും ഡോളറിനെ ബാധിക്കും. ഡോളർ നിരക്ക് കുറയുമ്പോൾ സ്വർണ വിലയിൽ വർധനവുണ്ടാകും. ഡോളർ നിരക്ക് ഉയരുമ്പോൾ സ്വർണ വില കുറയും. ഇതാണ് ഡോളറും സ്വർണവും തമ്മിലുള്ള ബന്ധം.

ഒരു പവൻ വാങ്ങാൻ അരലക്ഷവും പോരാ

ഇന്ത്യയിൽ ഓരോവർഷവും വാങ്ങുന്ന സ്വർണത്തിന്‍റെ കുതിയും വിവാഹ ആവശ്യങ്ങൾക്കാണ്. അതുകൊണ്ടുതന്നെ വിവാഹത്തിനായി സ്വർണം വാങ്ങുന്നവരുടെ ചങ്കിടിപ്പ് കൂടിയിട്ടുണ്ട്. ഒരു പവൻ സ്വർണാഭരണം വാങ്ങാൻ ഇന്നത്തെ നിലയിൽ അരലക്ഷം രൂപയിൽ കൂടുതൽ നൽകണം.

10 ശതമാനം പണിക്കൂലിയും 3 ശതമാനം ജിഎസ്ടിയും ആഭരണം വാങ്ങുമ്പോൾ നൽകേണ്ടിവരും. ആ പണം കൂടി കണക്കാക്കുമ്പോൾ ഇന്നത്തെ വിലയിൽ ഒരു പവൻ സ്വർണാഭരണത്തിന്‍റെ വില 55,00-ത്തിന് മുകളിൽ പോകും.

വരും നാളുകളിലും വില കൂടിയേക്കും

ഭൗമരാഷ്ട്രീയ സംഭവവികാസങ്ങളോടും യുഎസ് ധനനയത്തോടും വിപണി പ്രതികരിക്കുന്നതിനാൽ വരും മാസങ്ങളിൽ സ്വർണ വിലയിൽ ചാഞ്ചാട്ടം നിലനിൽക്കുമെന്നു തന്നെയാണ് വിദഗ്ധരുടെ വിലയിരുത്തൽ. ലോക വ്യാപകമായ സാമ്പത്തിക അനിശ്ചിതത്വം നാണയപ്പെരുപ്പം പ്രതിരോധിക്കാന്‍ ശേഷിയുള്ള ആസ്തി എന്ന നിലയില്‍ സ്വര്‍ണ്ണത്തിന്‍റെ ഡിമാന്‍റ് വര്‍ധിപ്പിക്കുന്നുണ്ട്.