പൊന്ന് ചതിച്ചു, പവന്‍റെ വില ചരിത്രത്തിലെ രണ്ടാമത്തെ ഉയരത്തിൽ, 2 ദിവസം കൊണ്ട് കൂടിയത് 1000 രൂപ

സംസ്ഥാനത്തെ സ്വർണവില ആളിക്കത്തുകയാണ്. കഴിഞ്ഞ രണ്ട് ദിവസത്തിനിടെ 1000 രൂപയാണ് ഒരു പവൻ സ്വർണത്തിലുണ്ടായ വർധനവ്. സമാനമായ കുതിപ്പ് വരും ദിവസങ്ങളിലും തുടർന്നാൽ സ്വർണവില പുതിയ റെക്കോർഡുകൾ തീർക്കും. അതോടെ ആഭരണം വാങ്ങുക എന്ന സാധാരണക്കാരുടെ ലക്ഷ്യം സ്വപ്നമായി അവശേഷിക്കുകയും ചെയ്യും.

സംസ്ഥാനത്തിന്‍റെ ചരിത്രത്തിലെ ഏറ്റവും ഉയർന്ന വില രേഖപ്പെടുത്തിയ മാസം 2024 മെയ് ആണ്. മെയ് 20-ആം തീയ്യതി ഒരു പവൻ സ്വർണ്ണത്തിന് 55,120 രൂപയും ഗ്രാമിന് 6,890 രൂപയുമായിരുന്നു വില. കഴിഞ്ഞ നാല് വർഷം കൊണ്ട് 30,000 രൂപയ്ക്കടുത്താണ് സ്വർണവില വർധിച്ചത്. പവന്‍റെ വില 25,000 കടക്കുന്നത് 2019 ലാണ്. 2020 ൽ വില 30,000 രൂപയ്ക്ക് മുകളിലെത്തി. രണ്ട് വർഷത്തിന് ശേഷം പവന്‍റെ വില 40,000 രൂപ കടന്നു. 2023-ൽ 45,000 രൂപയും 2024 മാർച്ച് 29-ന് പവന്‍റെ വില അരലക്ഷം രൂപയും കടന്നു.

ഇന്നത്തെ സ്വർണവില

പവന് 54,280 രൂപ എന്ന നിരക്കിലായിരുന്നു സംസ്ഥാനത്ത് ഇന്നലെ സ്വർണവ്യാപാരം നടന്നത്. എന്നാൽ ഇന്ന് പവന് 100 രൂപയും, ഗ്രാമിന് 720 രൂപയും വർധിച്ചു. അതോടെ ഒരു പവൻ സ്വർണ്ണത്തിന് 55,000 രൂപയും, ഗ്രാമിന് 6,875 രൂപയുമാണ് വില.

ആഭരണം വാങ്ങുമ്പോൾ കീശ കീറും

കഴിഞ്ഞ രണ്ട് മാസത്തിനിടെ സംസ്ഥാനത്ത് രേഖപ്പെടുത്തുന്ന ഏറ്റവും ഉയർന്ന സ്വർണവിലയാണ് ഇന്നത്തേത്. അതോടെ വലിയ അളവിൽ സ്വർണാഭരണം വാങ്ങുന്നവരുടെ കീശ കീറും എന്നുറപ്പായി. സ്വർണാഭരണം വാങ്ങുമ്പോൾ പവന്‍റെ വിലയോടൊപ്പം പണിക്കൂലി, നികുതി, ഹാൾമാർക്കിംങ് നിരക്കുകൾ തുടങ്ങിയ കൂടി നൽകണം. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടുമ്പോൾ ഒരു പവൻ സ്വർണാഭരണം വാങ്ങാൻ ഏകദേശം 60,000 രൂപ നൽകേണ്ടി വരും.

വില വർധനവിന് കാരണം

ആഗോള തലത്തിൽ, മികച്ച നേട്ടത്തിലാണ് ബുധനാഴ്ച്ച രാവിലെ സ്വർണ്ണ വ്യാപാരം നടക്കുന്നത്. ട്രോയ് ഔൺസിന് 49.72 ഡോളർ (2.05%) കുതിച്ചുയർന്ന് 2,472.21ഡോളർ എന്നതാണ് നിരക്ക്.

അമേരിക്കയിൽ പണപ്പെരുപ്പം നിയന്ത്രണ വിധേയമാണെന്ന യു.എസ് ഫെഡ് പ്രസിഡന്റ് ജെറോം പവലിന്റെ പരാമർശമാണ് നിലവിൽ സ്വർണ്ണ വില ഉയരാനുള്ള പ്രധാന കാരണം. ഇതോടെ അടുത്ത സെപ്തംബറിൽ പലിശ നിരക്കുകൾ കുറയുമെന്ന പ്രതീക്ഷ ശക്തമായി. ഇത്തരത്തിൽ പലിശ കുറയുന്നത് യു.എസ് ബോണ്ട്, ട്രഷറി വരുമാനങ്ങൾ കുറയാൻ കാരണമാകും. ഇതോടെ വൻകിട നിക്ഷേപകർ സ്വർണ്ണത്തിൽ കൂടുതൽ നിക്ഷേപം നടത്തും.

അഡ്വാന്‍സ് ബുക്കിംഗ് ഗുണം ചെയ്യും

വരും ദിവസങ്ങളിലും സ്വർണവില മുകളിലേക്ക് കുതിക്കാനുള്ള സാധ്യതകളുണ്ട്. അതുകൊണ്ടു തന്നെ വലിയ അളവിൽ സ്വർണാഭരണം വാങ്ങാൻ ഉദ്ദേശിക്കുന്നവർ അഡ്വാന്‍സ് ബുക്കിംഗ് നടത്തുന്നതാണ് നല്ലത്. കാരണം പവന്‍റെ വിലയിൽ വർധനവുണ്ടായാൽ അതുവഴി ഉണ്ടാകുന്ന സാമ്പത്തിക നഷ്ടം കുറയ്ക്കാൻ അഡ്വാന്‍സ് ബുക്കിംഗ് സഹായിക്കും.

സ്വര്‍ണവിലയുടെ 10 ശതമാനം മുതല്‍അഡ്വാന്‍സ് നല്‍കി സ്വര്‍ണം ബുക്ക് ചെയ്യാം. സ്വര്‍ണ വില കൂടിയാല്‍ബുക്ക് ചെയ്ത വിലയിലും വില കുറഞ്ഞാല്‍കുറഞ്ഞ വിലയിലും സ്വര്‍ണം ലഭിക്കും എന്നതാണ് അഡ്വാൻസ് ബുക്കിം​ഗിന്‍റെ പ്രത്യേകത.

വർധനവ് നേട്ടമാക്കാം

സ്വർണവില അരലക്ഷം രൂപയ്ക്ക് മുകളിൽ തുടരുന്നത് കൊണ്ട് തന്നെ പണം അത്യാവശ്യമുള്ളവർക്ക് സ്വർണപ്പണയത്തിലൂടെ നേട്ടമുണ്ടാക്കാം. പണയം വെച്ച സ്വർണത്തിൻ്റെ ശുദ്ധതയും തൂക്കവും അടിസ്ഥാനമാക്കിയാണ് വായ്പയുടെ മൂല്യം നിശ്ചയിക്കുന്നത്. ഈ ലോണുകൾ സാധാരണഗതിയിൽ വേഗത്തിലുള്ള വിതരണവും, കുറഞ്ഞ ഡോക്യുമെൻ്റേഷൻ ആവശ്യകതകളും, സുരക്ഷിതമല്ലാത്ത ലോണുകളെ അപേക്ഷിച്ച് കുറഞ്ഞ പലിശ നിരക്കുകളും വാഗ്ദാനം ചെയ്യുന്നു. പെട്ടെന്ന് തന്നെ ഉയർന്ന തുക കയ്യിൽ കിട്ടുമെന്നതാണ് സ്വർണപ്പണയത്തിന്‍റെ ഏറ്റവും വലിയ നേട്ടം.