സ്വർണം വാങ്ങാൻ പോവുകയാണോ, പവന്‍റെ വില ചെറുതായി കുറഞ്ഞിട്ടുണ്ട്, ഒരു പവൻ വാങ്ങാൻ എത്ര രൂപ നൽകണം എന്നറിയാം

സ്വർണവിലയിലെ ചാഞ്ചാട്ടം തുടരുകയാണ്. ശനിയാഴ്ച 54,000 രൂപയും കടന്ന് മുന്നോട്ട് പോയ പവന്‍റെ വിലയിൽ നേരിയ കുറവുണ്ട്. എന്നാൽ ഈ കുറവ് വരും ദിവസങ്ങളിലും കുറയുമോ എന്ന് പറയാൻ സാധിക്കില്ല. കഴിഞ്ഞ 7 ദിവസത്തെ വില പരിശോധിച്ചാൽഏകദേശം 900 രൂപയ്ക്ക് മുകളിലാണ് സ്വർണത്തിന് വില കൂടിയത്. ജൂലൈ ഒന്നാം തീയ്യതി 53,000 രൂപയായിരുന്നു ഒരു പവൻ സ്വർണത്തിന്‍റെ വില. എന്നാൽ പിന്നീടുള്ള ദിവസങ്ങളിൽ അത് ഏറിയും കുറഞ്ഞും 54,120 രൂപ വരെ എത്തിയിരുന്നു.

ഇന്നത്തെ വില

54,120 രൂപ എന്ന ജൂലൈ മാസത്തെ ഏറ്റവും ഉയർന്ന നിരക്കിലായിരുന്നു സംസ്ഥാനത്ത് ഇന്നലെ സ്വർണവ്യാപാരം നടന്നത്. എന്നാൽ ഇന്ന് പവന്‍റെ വിലയിൽ 160 രൂപ കുറഞ്ഞു. 53,960 രൂപയാണ് ഒരു പവൻ സ്വർണത്തിന്‍റെ വില. ഗ്രാമിന് 6745 രൂപ.

ആഗോള സ്വർണ്ണവില

അന്താരാഷ്ട്ര തലത്തിൽ, ഫ്ലാറ്റ് നിലവാരത്തിലാണ് തിങ്കളാഴ്ച്ച രാവിലെ സ്വർണ്ണ വ്യാപാരം നടക്കുന്നത്. ട്രോയ് ഔൺസിന് 2.24 ഡോളർ (0.09%) താഴ്ന്ന് 2,383.70 ഡോളർ എന്നതാണ് നിരക്ക്.

വില അധികം കുറയാൻ സാധ്യതയില്ല

യു.എസ് ജോബ് ഡാറ്റ പുറത്തു വന്നത് നിലവിൽ സ്വർണ്ണത്തിന്‍റെ ഡിമാൻഡ് വർധിപ്പിക്കുന്ന ഘടകമാണ്. കൂടാതെ ഡോളർ സൂചിക ദുർബലമാകുന്നതും, യു.എസ് ഫെഡ് പലിശ നിരക്കുകൾ കുറയ്ക്കുമെന്ന പ്രതീക്ഷയും മഞ്ഞലോഹത്തിന്റെ തിളക്കം വർധിപ്പിക്കുന്ന ഘടകങ്ങളാണ്. താഴെ നിലകളിൽ സ്വർണ്ണത്തിന് എപ്പോഴും ഡിമാൻഡ് വർധിക്കുന്ന സാഹചര്യം നിലവിലുണ്ട്. ഇക്കാരണത്താൽ നാളുകളായി ഒരു പരിധിയുടെ താഴേക്ക് വില കുറയുന്നില്ലെന്ന് വിദഗ്ധർ ചൂണ്ടിക്കാട്ടുന്നു.

ഒരു പവൻ വാങ്ങാൻ എത്ര രൂപ നൽകണം..?

സ്വർണവില നേരിയ തോതിൽ കുറഞ്ഞ സാഹചര്യത്തിൽ ഒരു പവൻ ആഭരണം വാങ്ങാൻ എത്ര രൂപ നൽകേണ്ടി വരും എന്ന് നോക്കാം. സ്വർണാഭരണം വാങ്ങുമ്പോൾ പവന്‍റെ വിലയോടൊപ്പം പണിക്കൂലി, നികുതി, ഹാൾമാർക്കിംങ് നിരക്കുകൾ തുടങ്ങിയ കൂടി നൽകണം. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടുമ്പോൾ ഒരു പവൻ സ്വർണാഭരണം വാങ്ങാൻ ഏകദേശം 59,000 രൂപ നൽകേണ്ടി വരും.

 

അഡ്വാന്‍സ് ബുക്കിംഗ് ഗുണം ചെയ്യും

വരും ദിവസങ്ങളിൽ വലിയ അളവിൽ സ്വർണാഭരണം വാങ്ങാൻ ഉദ്ദേശിക്കുന്നവർ അഡ്വാന്‍സ് ബുക്കിംഗ് നടത്തുന്നതാണ് നല്ലത്. കാരണം പവന്‍റെ വിലയിൽ വർധനവുണ്ടായാൽ അതുവഴി ഉണ്ടാകുന്ന സാമ്പത്തിക നഷ്ടം കുറയ്ക്കാൻ അഡ്വാന്‍സ് ബുക്കിംഗ് സഹായികികും.

സ്വര്‍ണവിലയുടെ 10 ശതമാനം മുതല്‍അഡ്വാന്‍സ് നല്‍കി സ്വര്‍ണം ബുക്ക് ചെയ്യാം. സ്വര്‍ണ വില കൂടിയാല്‍ബുക്ക് ചെയ്ത വിലയിലും വില കുറഞ്ഞാല്‍കുറഞ്ഞ വിലയിലും സ്വര്‍ണം ലഭിക്കും എന്നതാണ് അഡ്വാൻസ് ബുക്കിം​ഗിന്‍റെ പ്രത്യേകത.

വില വർധനവിന്‍റെ ചരിത്രം

സംസ്ഥാനത്തിന്‍റെ ചരിത്രത്തിലെ ഏറ്റവും ഉയർന്ന വില രേഖപ്പെടുത്തിയ മാസം 2024 മെയ് ആണ്. മെയ് 20-ആം തീയ്യതി ഒരു പവൻ സ്വർണ്ണത്തിന് 55,120 രൂപയും ഗ്രാമിന് 6,890 രൂപയുമായിരുന്നു വില.

കഴിഞ്ഞ നാല് വർഷം കൊണ്ട് 30,000 രൂപയ്ക്കടുത്താണ് സ്വർണവില വർധിച്ചത്. പവന്‍റെ വില 25,000 കടക്കുന്നത് 2019 ലാണ്. 2020 ൽ വില 30,000 രൂപയ്ക്ക് മുകളിലെത്തി. രണ്ട് വർഷത്തിന് ശേഷം പവന്‍റെ വില 40,000 രൂപ കടന്നു. 2023-ൽ 45,000 രൂപയും 2024 മാർച്ച് 29-ന് പവന്‍റെ വില അരലക്ഷം രൂപയും കടന്നു.