തുടരെ 2 ബാങ്കുകൾ സ്ഥിര നിക്ഷേപ പലിശ നിരക്ക് കുറച്ചു; 2-3 വർഷ എഫ്ഡിക്ക് മികച്ച പലിശ എവിടെ

ഒക്ടോബർ ഒന്നു മുതൽ എച്ച്ഡിഎഫ്സി ബാങ്ക് പ്രത്യേക സ്ഥിര നിക്ഷേപങ്ങളുടെ പലിശ നിരക്ക് കുറച്ചിരുന്നു. 35 മാസം, 55 മാസ കാലാവധിയപുള്ള രണ്ട് പ്രത്യേക സ്ഥിര നിക്ഷേപങ്ങൾക്ക് നൽകിയിരുന്ന 0.05 ശതമാനം അധിക നിരക്ക് ബാങ്ക് നിർത്തലാക്കി. ഇതിന് പിന്നാലെ ഒക്ടോബർ ആദ്യ ആഴ്ചയിൽ യെസ് ബാങ്കും സ്ഥിര നിക്ഷേപങ്ങലുടെ പലിശ നിരക്ക് കുറച്ചു. വിവിധ കാലയളവുകളിൽ 25 അടിസ്ഥാന നിരക്ക് വരെ കുറവ് വന്നിട്ടുണ്ട്.

ഒരു വർഷം മുതൽ 18 മാസത്തിൽ താഴെയും 18 മാസം മുതൽ 36 മാസത്തിൽ താഴെയുമുള്ള കാലാവധിയിലാണ് യെസ് ബാങ്ക് പലിശ നിരക്ക് കുറച്ചത്. ഒക്ടോബർ നാലിന് വരുത്തിയ പലിശ നിരക്ക് മാറ്റത്തിന് ശേഷം ഏഴ് ദിവസം മുതൽ 10 വർഷം വരെയുള്ള കാലാവധിയിൽ 3.25 ശതമാനം മുതൽ 7.25 ശതമാനം വരെ പലിശ നേടാം

മുതിർന്ന പൗരന്മാർക്ക് 3.75 ശതമാനം മുതൽ 8 ശതമാനം വരെയും പലിശ ലഭിക്കും. ബാങ്കുകൾ പലിശ നിരക്കുകൾ കുറയ്ക്കാൻ ആരംഭിച്ചതോടെ മികച്ച പലിശ നിരക്ക് ലഭിക്കുന്ന 2-3 വർഷ കാലയളവിൽ വിവിധ ബാങ്കുകളുടെ പലിശ നിരക്ക് നോക്കാം.

എസ്ബിഐ

രാജ്യത്തെ ഏറ്റവും വലിയ പൊതുമേഖല ബാങ്കായ സ്റ്റേറ്റ് ബാങ്ക് ഓഫ് ഇന്ത്യയിൽ റെ​ഗുലർ നിക്ഷേപകർക്ക് 2 കോടി രൂപയിൽ താഴെയുള്ള നിക്ഷേപങ്ങൾക്ക് 3 ശതമാനം മുതൽ 7 ശതമാനം പലിശ ലഭിക്കും. 2 വർഷം മുതൽ 3 വർഷം വരെ കാലാവധിയിൽ 7 ശതമാനം ആണ് ഉയർന്ന പലിശ നിരക്കായി നൽകുന്നത്. 444 ദിവസത്തെ അമൃത് കലാഷ് നിക്ഷേപത്തിന് സാധാരണക്കാർക്ക് 7.10 ശതമാനമാണ് പലിശ നിരക്ക്.

എച്ച്ഡിഎഫ്സി ബാങ്ക്

റെ​ഗുലർ നിക്ഷേപകർക്ക് 3 ശതമാനം മുതൽ 7.20 ശതമാനം വരെയാണ് എച്ച്ഡിഎഫ്സി ബാങ്കിൽ ലഭിക്കുന്ന സ്ഥിര നിക്ഷേപ പലിശ നിരക്കുകൾ. 15 മാസം മുതൽ 18 മാസത്തിൽ താഴെ വരെയുള്ള കാലയളവിൽ സാധാരണ പൗരന്മാർക്ക് 7.15 ശതമാനവും മുതിർന്ന പൗരന്മാർക്ക് 7.65 ശതമാനം എന്നിങ്ങനെയാണ് പലിശ നിരക്ക്.

ഐസിഐസിഐ ബാങ്ക്

ഐസിഐസിഐ ബാങ്ക് സ്ഥിര നിക്ഷേപങ്ങളുടെ പലിശ നിരക്ക് 3 ശതമാനം മുതൽ 7.10 ശതമാവം വരെയാണ്. 15 മാസം മുതൽ 2 വർഷത്തിൽ താഴെ വരെയുള്ള കാലയളവിൽ 7.10 ശതമാനം പലിശ നിരക്കാണ് ഐസിഐസിഐ ബാങ്ക് നൽകുന്നത്. മുതിർന്ന പൗരന്മാർക്ക് ഇതേ കാലയളവിൽ 7.60 ശതമാനം പലിശയും ലഭിക്കും.

പഞ്ചാബ് നാഷണൽ ബാങ്ക്

പഞ്ചാബ് നാഷണൽ ബാങ്കിൽ സ്ഥിര നിക്ഷേപങ്ങൾക്ക് 3.50 ശതമാനം മുതൽ 7.25 ശതമാവം വരെ പലിശ ലഭിക്കും. 444 ദിവസ കാലയളവിലാണ് 7.25 ശതമാനം പലിശ ലഭിക്കുന്നത്. കാനറ ബാങ്കും അതേ കാലയളവിൽ 7.25 ശതമാനം പലിശ റെ​ഗുലർ നിക്ഷേപകർക്ക് നൽകും.

യെസ് ബാങ്ക്

സ്ഥിര നിക്ഷേപങ്ങൾക്ക് 3.25 ശതമാനം മുതൽ 7.50 ശതമാനം പലിശയാണ് യെസ് ബാങ്ക് നൽകുന്നത്. 10 മാസം മുതൽ 24 മാസത്തിൽ താഴെ വരെയുള്ള കാലയളവിലേക്കാണ് 7.50 ശതമാനം പലിശ നൽകുന്നത്. യെസ് ബാങ്ക് ഒരു വർഷം മുതൽ 18 മാസത്തിൽ താഴെ വരെയുള്ള സ്ഥിര നിക്ഷേപങ്ങൾക്കും 18 മുതൽ 36 മാസത്തേക്കുള്ള എഫ്ഡികൾക്കുമാണ് നിരക്ക് കുറച്ചത്.

നിലവിൽ ഇവയ്ക്ക് യഥാക്രമം 7.25 ശതമാനം, 7.50 ശതമാനം എന്നിങ്ങനെ പലിശ ലഭിക്കും.