അടുത്തിടെ കോവിഡ് ചികിത്സയ്ക്കായി ആദായ നികുതി വകുപ്പ് പണ ഇടപാടുകള് നടത്തുന്നതില് ഇളവുകള് പ്രഖ്യാപിച്ചിരുന്നു. ഇതനുസരിച്ച് ഏപ്രില് 1 മുതല് മെയ് 30 വരെയുള്ള കാലയളവില് കോവിഡ് രോഗിയ്ക്കോ, കുടുംബാംഗങ്ങള്ക്കോ, സുഹൃത്തുക്കള്ക്കോ 2 ലക്ഷമോ അതിലധികം രൂപമായി പണമായി നല്കുവാന് സാധിക്കും.
രോഗിയുടേയും ആരാണോപണം നല്കുന്നത് ആ വ്യക്തിയുടേയും ആധാറിന്റെയും പാന് കാര്ഡിന്റെയും പകര്പ്പുകള് ആശുപത്രിയില് വാങ്ങി സൂക്ഷിക്കേണ്ടതുണ്ട്. രോഗിയുടേയും പണം അടച്ചിരിക്കുന്ന വ്യക്തിയുടേയും ബന്ധം എന്തെന്ന് ആശുപത്രിയില് വ്യക്തമാക്കുകയും ചെയ്യേണ്ടതുണ്ട്.
2 ലക്ഷം രൂപയ്ക്ക് മുകളില് പണ ഇടപാടുകള് നടത്തുന്നതിന് നേരത്തേ നിരോധനമുണ്ടായിരുന്നു. ഉദാഹരണത്തിന് നിങ്ങള് 3 ലക്ഷം രൂപയുടെ ഒരു സ്വര്ണാഭരണം വാങ്ങിക്കുന്നുവെന്ന് കരുതുക. തുക അനുവദനീയ പരിധിയിലും അധികമായതിനാല് ഈ ഇടപാട് പണമായി നടത്തുവാന് നിങ്ങള്ക്ക് സാധിക്കുകയില്ല. അതുപോലെ ഒരു വ്യക്തിയ്ക്ക് അടുത്ത ബന്ധുവില് നിന്നും നിശ്ചയിച്ചിരിക്കുന്ന പരിധിക്ക് മുകളിലുള്ള പണം ഒരു ദിവസത്തിനുള്ളില് സ്വീകരിക്കുവാന് പാടില്ല. എന്നാല് ചില ഇടപാടുകള്ക്ക് ഇളവുകളുണ്ട്. ഉദാഹരണത്തിന് നിങ്ങള് ബിസിനസ് നടത്തുന്ന ഒരു വ്യക്തിയാണെങ്കില് ഒരു ദിവസം നടത്തിയ പല ഇടപാടുകളില് നിന്നായുള്ള 2 ലക്ഷം രൂപ അതേ ദിവസം തന്നെ നിങ്ങള്ക്ക് ബാങ്കില് നിക്ഷേപിക്കാം.
ഒരു വ്യക്തി ഏതെങ്കിലും ധനകാര്യ സ്ഥാപനത്തില് നിന്നോ ഒരു സുഹൃത്തില് നിന്നോ വായ്പ എടുക്കുകയാണെങ്കില് പണ പരിധി 20,000 രൂപയാണ്. വായ്പയുടെ തിരിച്ചടവിനും ഇതേ നിയമം ബാധകമാണ്.
പണ ഇടപാടുകള് നടത്തുന്നതില് ബിസിനസുകളെയും ആദായ നികുതി വകുപ്പ് പ്രോത്സാഹിപ്പിക്കുന്നില്ല. ഒരു ബിസിനസ് ഉടമ 10,000 രൂപയ്ക്ക് മുകളില് പണ ഇടപാട് നടത്തിയാല് അയാള്ക്ക് അത് ചിലവായി കണക്കില്പ്പെടുത്താന് സാധിക്കുകയില്ല.
നികുതി ആസൂത്രണം നടത്തുമ്പോള് ആരോഗ്യ ഇന്ഷുറന്സിന് നല്കുന്നത് പണമായല്ല എന്ന്് ഉറപ്പുവരുത്തേണ്ടതുണ്ട്. ഇന്ഷുറന്സ് പ്രീമിയം പണമായി നല്കിയാല് വകുപ്പ് 80ഡി പ്രകാരമുള്ള നികുതി നേട്ടം ലഭിക്കൂകയില്ല. ബാങ്കുകള് മുഖേന മാത്രമേ ഇത്തരം ഇടപാടുകള് നടത്താന് പാടുള്ളൂ.
പണം സ്വീകരിക്കുന്ന വ്യക്തിയ്ക്കാണ് ആദായ നികുതി വകുപ്പ് പിഴ ഈടാക്കുക. പണം സ്വീകരിച്ച് ഉടന് തന്നെ ബാങ്കുകളില് നിക്ഷേപിക്കുന്നതും പിഴ നല്കുന്നതില് നിന്നും രക്ഷ നേടാന് കഴിയില്ല.