കൊട്ടക് ബാങ്ക്

ബുധനാഴ്ചത്തെ വ്യാപാരത്തിനൊടുവില്‍ 1.58 ശതമാനം ഇടിഞ്ഞ് 1,642 രൂപയിലായിരുന്നു കൊട്ടക് മഹീന്ദ്ര ബാങ്ക് (BSE: 500247, NSE : KOTAKBANK) ഓഹരികള്‍ ക്ലോസ് ചെയ്തത്. ഈ നിലവാരത്തില്‍ നിന്നും ഓഹരിയില്‍ ഷോര്‍ട്ട് സെല്‍ ചെയ്യാമെന്നാണ് എല്‍കെപി സെക്യൂരിറ്റീസ് നിര്‍ദേശിച്ചത്. ഇവിടെ നിന്നും 1,570 രൂപയിലേക്ക് ഓഹരിയുടെ വില ഇടിയാം. ഈ ട്രേഡിനുള്ള സ്‌റ്റോപ് ലോസ് 1,670 രൂപ നിലവാരത്തില്‍ ക്രമീകരിക്കണമെന്നും ബ്രോക്കറേജ് സ്ഥാപനം വ്യക്തമാക്കി.

കാരണം

അടുത്തിടെ സ്ഥിരതയാര്‍ജിക്കുകയായിരുന്ന നിലവാരത്തിന്റെ താഴേത്തട്ട് തകര്‍ത്ത് കൊട്ടക് മഹീന്ദ്ര ബാങ്ക് ഓഹരികള്‍ വീണു. ഇത് ലാര്‍ജ് കാപ് ഓഹരിയിലെ ദുര്‍ബലാവസ്ഥയിലേക്ക് വിരല്‍ചൂണ്ടുന്നു. കൂടാതെ ഓഹരിയുടെ ദിവസ ചാര്‍ട്ടില്‍ ബെയറിഷ് സൂചനയായ 'ലോവര്‍ ടോപ് ലോവര്‍ ബോട്ടം' പാറ്റേണും പ്രകടമാണ്. കൂടാതെ മൊമന്റം ഇന്‍ഡിക്കേറ്ററായ ആര്‍എസ്‌ഐ സൂചകത്തില്‍ 'ബെയറിഷ് ക്രോസ്ഓവര്‍' തെളിഞ്ഞിട്ടുണ്ട്. ഇതും വരാനിരിക്കുന്ന തിരിച്ചടിയുടെ സൂചനയാണ്.

അതേസമയം കൊട്ടക് മഹീന്ദ്ര ബാങ്ക് ഓഹരിയുടെ 52 ആഴ്ച കാലയളവിലെ ഉയര്‍ന്ന വില 2,253 രൂപയും താഴ്ന്ന വില 1,626 രൂപയുമാണ്. അതായത് ഒരു വര്‍ഷ കാലയളവിലെ ഉയര്‍ന്ന നിലവാരത്തില്‍ നിന്നും 25 ശതമാനത്തോളം താഴെയും താഴ്ന്ന നിലവാരത്തില്‍ നിന്നും 4 ശതമാനം മാത്രം അകലെയുമാണ്.

കൂടാതെ ഹ്രസ്വകാല, ഇടക്കാല, ദീര്‍ഘകാല മൂവിങ് ആവറേജ് നിലവാരങ്ങള്‍ക്ക് താഴെയാണ് ഇപ്പോള്‍ കൊട്ടക് മഹീന്ദ്ര ബാങ്ക് ഓഹരി നില്‍ക്കുന്നത്. കൂടാതെ ടെക്‌നിക്കല്‍ ഇന്‍ഡിക്കേറ്റര്‍, മൂവിങ് ആവറേജ് ക്രോസ്ഓവര്‍ അടിസ്ഥാനമാക്കിയാലും ഓഹരിയില്‍ 'ബെയറിഷ് ട്രെന്‍ഡ്' സ്പഷ്ടമാണ്.

നിഫ്റ്റി എങ്ങനെ ?

അത്യാവേശം അകന്നുനിന്ന വിപണിയില്‍ ആദ്യം ഇടിവോടെയും പിന്നീട് നേട്ടത്തിലേക്കും ഒടുവില്‍ ചെറിയ നഷ്ടത്തോടെ വ്യാപാരം അവസാനിപ്പിക്കുന്നതാണ് കാണാനായത്. നിഫ്റ്റി സൂചികയില്‍ 15,650- 15,700 നിലവാരം പിന്തുണ നല്‍കുന്നുണ്ട്. കഴിഞ്ഞ ദിവസത്തെ ക്ലോസിങ് നിലവാരത്തില്‍ നിന്നും പ്രതിരോധം നേരിടുകയും ചെയ്യുന്നു. ഹ്രസ്വകാലയളവില്‍ സൂചികയുടെ ട്രെന്‍ഡ്, നെഗറ്റീവ് ആഭിമുഖ്യത്തോടെ പാര്‍ശ്വവഴിയിലായിരിക്കും. എന്നാല്‍ 15,650 നിലവാരം തകര്‍ക്കപ്പെട്ടാല്‍ വീണ്ടും ശക്തമായ വില്‍പന സമ്മര്‍ദം അനുഭവപ്പെടാം. നിലവില്‍ 15,900/ 16,000 നിലവാരത്തില്‍ ശക്തമായ പ്രതിരോധം പ്രതീക്ഷിക്കാം.

അറിയിപ്പ്

മുകളില്‍ കൊടുത്തിരിക്കുന്ന ലേഖനം എല്‍കെപി സെക്യൂരിറ്റീസ് പുറത്തിറക്കിയ റിപ്പോര്‍ട്ടിനെ അടിസ്ഥാനമാക്കിയതും പഠനാവശ്യത്തിന് നല്‍കുന്നതുമാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭ നഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്‌നോളജീസും ലേഖകനും ഉത്തരവാദികളല്ല.