ക്രെഡിറ്റ് കാർഡിന് ഇനി പുതിയ മുഖം; ബട്ടണുകളുള്ള ക്രെഡിറ്റ് കാർഡ് ഉപയോ​ഗിക്കേണ്ടത് എങ്ങനെ?

ക്രെഡിറ്റ് കാർഡുകൾക്ക് പുതിയ മുഖവുമായി ഇൻഡസെന്റ് ബാങ്ക്. ബട്ടണുകളോട് കൂടിയ പുതിയ ജനറേഷൻ ക്രെഡിറ്റ് കാർഡുകളാണ് ഇൻഡസെന്റ് ബാങ്ക് പുറത്തിറക്കിയിരിക്കുന്നത്. ഈ കാർഡിന്റെ പ്രത്യേകതകളും ഉപയോ​ഗിക്കേണ്ടത് എങ്ങനെയെന്നും പരിശോധിക്കാം.

മൂന്ന് ബട്ടണുകൾ

മൂന്ന് ഓപ്ഷനുകളായി മൂന്ന് സ്വൈപ്പ് ബട്ടൺ അടങ്ങുന്നതാണ് ബാങ്ക് പുറത്തിറക്കിയ നെക്സ്റ്റ് ക്രെഡിറ്റ് കാർഡ്. ക്രെഡിറ്റ് കാർഡിന്റെ ഉപയോ​ഗത്തിനനുസരിച്ച് ഓരോ ബട്ടണും തിരഞ്ഞെടുക്കാവുന്നതാണ്.

ബട്ടണുകളും ഉപയോ​ഗവും

ഒന്നാമത്തെ ബട്ടൺ കാർഡ് ഉപയോ​ഗിച്ച് ഇഎംഐകൾ അടയ്ക്കുന്നതിന് വേണ്ടിയുള്ളതാണ്. രണ്ടാമത്തെ ബട്ടൺ തിരഞ്ഞെടുത്താൽ നിങ്ങളുടെ റിവാർഡ് പോയിന്റ് ഉപയോ​ഗിച്ച് പേയ്മെന്റുകൾ നടത്താം. മൂന്നാമത്തെ ഓപ്ഷനാണ് തിര‍ഞ്ഞെടുക്കുന്നതെങ്കിൽ സാധാരണയുള്ള ക്രെഡിറ്റ് കാർഡ് ഉപയോ​ഗം തന്നെ നടത്താം.

ലൈറ്റ് തെളിയും

നിങ്ങൾ ഈ മൂന്ന് ഓപ്ഷനുകളിൽ ഏതാണോ തിരഞ്ഞെടുക്കുന്നത്, അതിനനുസരിച്ച് ബട്ടണുകളിൽ ലൈറ്റ് തെളിയും. ഉപയോ​ഗിക്കുന്നതിന് മുമ്പ് ഈ മൂന്ന് ഓപ്ഷനുകളിൽ ഏതെങ്കിലും തീർച്ചയായും തിര‍ഞ്ഞെടുക്കുകയും വേണം.

ഇഎംഐ ഓപ്ഷൻ തിരഞ്ഞെടുത്താൽ

നിങ്ങൾ ഇഎംഐ ഓപ്ഷനാണ് തിര‍ഞ്ഞെടുക്കുന്നതെങ്കിൽ കുറഞ്ഞത് 2000 രൂപയുടെയെങ്കിലും ഇടപാട് കാർഡ് ഉപയോ​ഗിച്ച് നടത്തണം. റിവാർഡ് പോയിന്റുകൾ ഉപയോഗിച്ച് പണമടയ്ക്കാൻ കുറഞ്ഞത് 500 റിവാർഡ് പോയിൻറുകൾ എങ്കിലും നിങ്ങൾക്ക് ഉണ്ടായിരിക്കണം.

യുവാക്കളെ ലക്ഷ്യമിട്ട്

ഇന്ത്യയിലുടനീളമുള്ള എല്ലാ ഷോപ്പുകളിലും നെക്സ്റ്റ് കാർഡ് ഉപയോ​ഗിച്ച് ഇടപാടുകൾ നടത്താം. ക്രെഡിറ്റ് കാർഡ് ഉപയോഗിച്ച് പണമിടപാട് നടത്തുന്ന യുവാക്കളെ ലക്ഷ്യമിട്ടാണ് ഇൻഡസെന്റ് ബാങ്ക് നെക്സ്റ്റ് കാർഡുകൾ പുറത്തിറക്കിയത്.

malayalam.goodreturns.in