ന്യൂഡല്ഹി: റെയില് ബജറ്റ് ഇനി പൊതുബജറ്റിന്റെ ഭാഗം. അടുത്ത വര്ഷം മുതല് റെയില്വേ ബജറ്റില്ല. റെയില് ബജറ്റും ഉള്പ്പെടുത്തിയുള്ള പൊതുബജറ്റ് അവതരിപ്പിക്കും.കേന്ദ്ര മന്ത്രിസഭയുടേതാണ് തീരുമാനം. റെയില്വേയ്ക്കായി പ്രത്യേക ബജറ്റ് അവതരിപ്പിക്കുകയെന്ന പതിവ് അവസാനിപ്പിക്കണമെന്ന നിതി ആയോഗ് ശുപാര്ശയാണ് കേന്ദ്ര മന്ത്രിസഭ അംഗീകരിച്ചത്.
1924ല് തുടങ്ങിയ രീതിയാണ് ഇപ്പോള് അവസാനിപ്പിക്കുന്നത്. പ്രത്യേക ബജറ്റുകൊണ്ട് റെയില്വേക്ക് ഗുണമില്ലെന്നാണ് നിതി ആയോഗിന്റെ വിലയിരുത്തല്.
റെയില്വേയുടെ ദീര്ഘകാല താത്പര്യം കണക്കിലെടുക്കുമ്പോള് റെയില് ബജറ്റും ഉള്പ്പെടുത്തിയുള്ള പൊതുബജറ്റാണ് അഭികാമ്യമെന്നാണ് റെയില്വേയുടെ അഭിപ്രായം. ഫ്രെബ്രുവരിയിലെ അവസാന പ്രവര്ത്തി ദിവസം ബജറ്റ് അവതരിപ്പിക്കുന്നതിന് പകരം ഫെബ്രുവരി ഒന്നിന് അവതരിപ്പിക്കും.
ഫെബ്രുവരി ഒന്നിന് ബജറ്റ് അവതരിപ്പിക്കാന് കഴിയാത്ത സാഹചര്യം ഉണ്ടാകുകയാണെങ്കില്, പകരം ജനുവരി 31 ന് ബജറ്റ് അവതരിപ്പിക്കാനാണ് ധനമന്ത്രാലയം ലക്ഷ്യമിടുന്നത്. ജനുവരി 30 ന് സാമ്പത്തിക സര്വെ റിപ്പോര്ട്ട് പാര്ലമെന്റില് വെയ്ക്കും.