സ്വകാര്യബാങ്കുകള്ക്ക് പിന്നാലെ രാജ്യത്തെ് ഏറ്റവും വലിയ പൊതുമേഖല ബാങ്കായ എസ്ബിഐ വിവിധ സേവനങ്ങള്ക്ക് ഇനി ചാര്ജ് ചുമത്തും. പണം പിന്വലിക്കുന്നതിനും നിക്ഷേപിക്കുന്നതിനും അക്കൗണ്ടുകളില് മിനിമം ബാലന്സ് ഇല്ലെങ്കിലും ഇനി എസ്ബിഐക്ക് പണം നല്കേണ്ടി വരും.
ഒരുമാസം അഞ്ചുതവണയില് കൂടുതല് എസ്ബിഐ എടിഎമ്മില്നിന്ന് പണം പിന്വലിച്ചാല് ഈടാക്കുന്ന തുക അഞ്ചില്നിന്നു പത്തുരൂപയാക്കി. മറ്റു ബാങ്കുകളുടെ എടിഎമ്മില് നിന്നാണെങ്കില് 20 രൂപ ഈടാക്കും. പണരഹിത ഇടപാടുകള്ക്ക് ഇതു യഥാക്രമം അഞ്ചുരൂപയും എട്ടുരൂപയുമാണ്.
മിനിമം ബാലന്സ് ഇല്ലെങ്കില് പിഴ
അക്കൗണ്ടില് മിനിമം ബാലന്സില്ലെങ്കിലും ഇനി പിഴ നല്കണം. മിനിമം ബാലന്സ് ഇല്ലെങ്കില് 20 രൂപ മുതല് 100 രൂപവരെ പിഴ ഈടാക്കും. എല്ലാ ചാര്ജുകള്ക്കും പിഴകള്ക്കും 14.5% സേവനനികുതിയും അടക്കണം.മെട്രോ നഗരങ്ങളില് 5,000 രൂപയാണ് മിനിമം ബാലന്സായി വേണ്ടത്. ഈ തുക അക്കൗണ്ടിലില്ലെങ്കില് 100 രൂപ പിഴ നല്കണം. കേരളത്തിന് ഇത് ബാധകമാവുകയില്ല. കൊച്ചി, കോഴിക്കോട്, തിരുവനന്തപുരം ഉള്പ്പടെയുള്ള വന് നഗരങ്ങളില് 3,000 രൂപ അക്കൗണ്ടിലില്ലെങ്കില് 40 രൂപ വരെ പിഴയിടാക്കും. ചെറു നഗരങ്ങളില് 2,000 രൂപയും ഗ്രാമീണ മേഖലയില് 1,000 രൂപയുമാണ് മിനിമം ബാലന്സായി വേണ്ടത്. ഇതില്ലെങ്കില് 20 മുതല് 50 രൂപ പിഴയടക്കണം.
25,000 രൂപയില് താഴെ മിനിമം ബാലന്സുള്ള അക്കൗണ്ട് ഉടമ ബാങ്ക് ശാഖയില്നിന്നു രണ്ടുതവണയില് കൂടുതല് പണം പിന്വലിച്ചാല് 50 രൂപ സര്വീസ് ചാര്ജ്. മുമ്പ് നാലുതവണ സൗജന്യമായി പിന്വലിക്കാമായിരുന്നു.