ഇൻഫോസിസ് മുൻ സിഇഒ വിശാൽ സിക്കയുടെ ഭാര്യ വന്ദന സിക്കയും ഇൻഫോസിസിൽ നിന്ന് രാജി വച്ചു. യു.എസ്.എയിലെ ഇൻഫോസിസ് ഫൗണ്ടേഷൻ ചെയർപേഴ്സണായിരുന്നു വന്ദന സിക്ക. ഇൻഫോസിസിൽ നിന്ന് രാജിവയ്ക്കുന്ന കാര്യം സമൂഹമാധ്യമങ്ങളിലൂടെയാണ് വന്ദന സിക്ക അറിയിച്ചത്.

താൻ രാജിവെക്കുന്ന തീരുമാനം അറിയിച്ചു കൊണ്ട് കമ്പനിയിക്ക് ഇ-മെയിൽ അയച്ചതായാണ് വന്ദന സോഷ്യൽ മീഡിയയിലൂടെ പങ്കുവച്ചിരിക്കുന്നത്. ഈ മാസം ആദ്യവാരത്തിലാണ് വിശാൽ സിക്ക ഇൻഫോസിസിൽ നിന്ന് രാജി വച്ചത്. ആരോപണങ്ങളില്‍ മനംമടുത്ത് വിശാൽ സിക്ക ഇൻഫോസിസ്​ സിഇഒ സ്​ഥാനം രാജിവച്ചു

ആരോപണങ്ങളില്‍ മനം മടുത്താണ് താൻ രാജി വയ്ക്കുന്നതെന്ന് വിശാൽ സിക്കയുടെ രാജിക്കത്തില്‍ പറഞ്ഞിരുന്നു. വ്യക്​തിപരമായ ആക്രമണങ്ങളാണ്​ രാജിക്കിടയാക്കിയതെന്നും അദ്ദേഹം പറഞ്ഞു. ഇൻഫോസിസ് സ്ഥാപകനും മുൻ സിഇഒയുമായ നാരായണ മൂർത്തിക്ക് വിശാൽ സിക്കയോടുണ്ടായിരുന്ന നീരസമാണ് രാജിയിലേക്ക് നയിച്ചതെന്ന് സിക്ക തന്നെ സൂചന നൽകിയിരുന്നു.

നന്ദൻ നിലേക്കനിയാണ് ഇൻഫോസിസിന്റെ പുതിയ ചെയർമാൻ. മൂന്നു ദശാബ്ദം മുമ്പ് ഇൻഫോസിസ് സ്ഥാപിച്ച ഏഴ് സ്ഥാപകരിലൊരാളാണ് നിലേക്കനി. നന്ദൻ നിലേക്കനി ഇൻഫോസിസ് ചെയർമാനായി തിരിച്ചെത്തി

malayalam.goodreturns.in