സ്റ്റേറ്റ് ബാങ്ക് ഓഫ് ഇന്ത്യ നിക്ഷേപ പലിശ ഉയ‍ർത്തിയതിന് പിന്നാലെ വായ്പാ പലിശ നിരക്കും ഉയര്‍ത്തി. ഒരു വര്‍ഷം കാലാവധിയുള്ള, മാര്‍ജിനല്‍ കോസ്റ്റ് അടിസ്ഥാനമാക്കിയുള്ള വായ്പ നിരക്ക് 7.95 ശതമാനത്തില്‍ നിന്ന് 8.15ശതമാനമായാണ് ഉയര്‍ത്തിയത്.

വിവിധ കാലാവധികളിലുള്ള വായ്പകള്‍ക്കും വര്‍ധിപ്പിച്ച നിരക്ക് ബാധകമാകും. മറ്റു പല ബാങ്കുകളും ഈയിടെ വായ്പ പലിശ നിരക്കുകള്‍ ഉയര്‍ത്തിയിരുന്നു.

വിവിധ കാലാവധികളിലുള്ള നിക്ഷേപത്തിന്റെ പലിശ നിരക്ക് ഉയ‍ർത്തിയതിന് പിന്നാലെയാണ് എസ്ബിഐ വായ്പാ പലിശയും കൂട്ടിയത്. 7 മുതൽ 45 ദിവസം വരെയുള്ള നിക്ഷേപങ്ങൾക്ക് വാർഷിക പലിശനിരക്ക് 5.25 ശതമാനത്തിൽ നിന്ന് 5.75 ശതമാനമായാണ് ഉയ‍ർത്തിയിരിക്കുന്നത്. 1 വർഷം കാലാവധിയുള്ള നിക്ഷേപത്തിന് ഉപഭോക്താക്കൾക്ക് ഇപ്പോൾ 6.40 ശതമാനം പലിശ ലഭിക്കും. നേരത്തെ ഇത് 6.25 ശതമാനമായിരുന്നു.

രണ്ട് വർഷം മുതൽ 10 വർഷം വരെ കാലാവധിയുള്ള നിക്ഷേപങ്ങളുടെ പലിശ നിരക്ക് 6 ശതമാനത്തിൽ നിന്ന് 6.50 ശതമാനമായി ഉയരും. മുതിർന്ന പൗരന്മാർക്ക് അവരുടെ നിക്ഷേപങ്ങൾക്ക് 7 ശതമാനം വരെ പലിശ ലഭിക്കും. നിലവിൽ ഇത് 6.50 ശതമാനമാണ്.

malayalam.goodreturns.in