കേരളത്തില്‍ പ്രളയം ബാധിച്ച് തകര്‍ന്ന വീടുകളുടെ അറ്റകുറ്റ പണി നടത്തുന്നതിനും നവീകരിക്കുന്നതിനും പ്രത്യേക വായ്പയുമായി സ്റ്റേറ്റ് ബാങ്ക് ഓഫ് ഇന്ത്യ. 8.45% പലിശ നിരക്കില്‍ 10 ലക്ഷം രൂപ വരെയാണ് വായ്പ അനുവദിക്കുക.

വായ്പാ നടപടിക്രമങ്ങള്‍ക്ക് പ്രോസസിംഗ് ഫീ ഈടാക്കുന്നതല്ല. ഈ വർഷം നവംബര്‍ 30 വരെ അപേക്ഷ നല്‍കുന്നവര്‍ക്കാണ് ഈ ഇളവുകള്‍ ലഭിക്കുക. പ്രളയക്കെടുതി അനുഭവിക്കുന്നവര്‍ക്ക് ഏറെ സഹായകമാകുന്നതാണ് വായ്പയെന്നാണ് പ്രതീക്ഷിക്കപ്പെടുന്നത്.

സംസ്ഥാനത്ത് കനത്ത മഴയും പ്രളയ ദുരിതങ്ങളും തുടർന്ന സാഹചര്യത്തിൽ തന്നെ പണമിടപാടുകൾക്കും വായ്പകൾക്കും സ്റ്റേറ്റ് ബാങ്ക് ഓഫ് ഇന്ത്യ ഇളവുകൾ പ്രഖ്യാപിച്ചിരുന്നു. വെള്ളപ്പൊക്ക ദുരിതാശ്വാസ പ്രവർത്തനവുമായി ബന്ധപ്പെട്ട വായ്പയ്ക്ക് ഉള്ള പ്രോസസിംഗ് ഫീസാണ് എസ്.ബി.എെ ആദ്യം ഒഴിവാക്കിയത്.

ദുരിതത്തിൽ പെട്ടവർക്ക് നഷ്ട്ടപ്പെട്ട പാസ് ബുക്കിന്റെ ഡ്യൂപ്ലിക്കേറ്റ്, ചെക്ക് ബുക്ക്, എ.ടി.എം കാ‍ർഡുകൾ തുടങ്ങിയവ ചാ‍ർജുകൾ ഈടാക്കാതെ തന്നെ ബാങ്ക് നൽകുന്നതാണ്. കൂടാതെ വായ്പ തിരിച്ചടവ് ഗഡു വൈകിയാൽ ഈടാക്കുന്ന ലേറ്റ് ഫീയിൽ നിന്നും ഇവരെ ഒഴിവാക്കും. പ്രളയത്തിൽ തിരിച്ചറിയൽ രേഖകളും മറ്റും നഷ്ടപ്പെട്ടവർക്ക് അക്കൗണ്ട് എടുക്കാൻ ഫോട്ടോയും ഒപ്പും മാത്രം മതിയെന്നും ബാങ്ക് അറിയിച്ചിരുന്നു. ഇതും ദുരിത ബാധിതർക്ക് ആശ്വാസമാകും.

malayalam.goodreturns.in