ദില്ലി: റിസര്‍വ് ബാങ്ക് ഓഫ് ഇന്ത്യ റിപ്പോ നിരക്കില്‍ വരുത്തുന്ന ഓരോ മാറ്റവും എസ്ബിഐ ലോണുകളെയും നിക്ഷേപങ്ങളെയും ബാധിക്കും. സേവിംഗ്‌സ് ബാങ്ക് ഡെപ്പോസിറ്റുകളുടെയും ഹ്രസ്വകാല വായ്പകളുടെയും പലിശ നിരക്കിനെ ആര്‍ബിഐയുടെ റിപ്പോ നിരക്കുമായി നേരിട്ട് ബന്ധിപ്പിക്കാന്‍ എസ്ബിഐ തീരുമാനമെടുത്തതിനെ തുടര്‍ന്നാണിത്. രാജ്യത്ത് ആദ്യമായാണ് ഒരു ബാങ്കിന്റെ പലിശ നിരക്കുകള്‍ ഒരു ബാഹ്യ ഘടകവുമായി ബന്ധിപ്പിക്കുന്നത്. 2019 മേയ് 1 മുതല്‍ ഈ മാറ്റം പ്രാബല്യത്തില്‍ വരുമെന്ന് എസ്ബിഐ അറിയിച്ചു.

ആര്‍ബിഐ പലിശ നിരക്കില്‍ വരുത്തുന്ന മാറ്റങ്ങളുടെ ഗുണഫലം ബാങ്കുകളില്‍ നിന്ന് വായ്പയെടുത്തവര്‍ക്ക് നേരിട്ട് ലഭിക്കാത്ത സ്ഥിതിയാണ് ഇപ്പോഴുള്ളത്. ബാങ്കുകളുടെ ഈ സമീപനത്തില്‍ ആര്‍ബിഐക്ക് അതൃപ്തിയുണ്ട്. ഇതില്‍ മാറ്റം വരുത്തി, ആര്‍ബിഐ റിപ്പോ റേറ്റില്‍ വരുത്തുന്ന മാറ്റങ്ങള്‍ക്കനുസരിച്ച് മോണിറ്ററി ട്രാന്‍സ്മിഷന്‍ പ്രക്രിയ വേഗത്തിലാക്കാന്‍ പുതിയ തീരുമാനത്തിലൂടെ സാധിക്കുമെന്ന് എസ്ബിഐ അറിയിച്ചു.

അതേസമയം, പുതിയ നീക്കം ചെറിയ സേവിംഗ്‌സ് നിക്ഷേപങ്ങളെ ബാധിക്കില്ലെന്ന് എസ്ബിഐ അറിയിച്ചു. ഒരു ലക്ഷം രൂപയ്ക്ക് മുകളിലുള്ള സേവിംഗ്‌സ് ഡെപ്പോസിറ്റുകള്‍ മാത്രമാണ് ആര്‍ബിഐ റിപ്പോ നിരക്കുമായി ബന്ധിപ്പിക്കുക. ഡിസംബര്‍ ഏഴിന് റിവ്യൂവിന് ശേഷം ആര്‍ബിഐയുടെ റിപ്പോ നിരക്ക് 25 ബേസിക് പോയിന്റുകള്‍ കുറച്ച് 6.25 ആക്കിയിരുന്നു. ഇതനുസരിച്ചായിരിക്കും നിലവിലെ ഡിപ്പോസിറ്റുകളുടെ പലിശ നിരക്കും തീരുമാനിക്കുക. ഇപ്പോഴത്തെ റിപ്പോ നിരക്കായ 6.25 ശതമാനത്തേക്കാള്‍ 2.75 ശതമാനം കുറച്ച് 3.5 ശതമാനമാണ് ബാങ്കുകള്‍ നല്‍കുന്ന പലിശ നിരക്ക്.

ഒരു ലക്ഷം രൂപയിലധികമുള്ള എല്ലാ കാഷ് ക്രെഡിറ്റ് എക്കൗണ്ടുകളും, ഓവര്‍ ഡ്രാഫ്റ്റുകളും റിപ്പോയുമായി ബന്ധിപ്പിക്കുമെന്നും എസ്ബിഐ അറിയിച്ചു. ഇതിന്റെ പലിശ നിരക്ക് റിപ്പോ റേറ്റിനോട് 2.25 ശതമാനം ചേര്‍ത്ത് 8.5 ശതമാനമായിരിക്കും.