ഫോണിൽ ട്രൂകോളറുണ്ടോ? ഇനി ട്രൂകോളർ വഴി ഇന്റർനെറ്റ് കോളിംഗും ചെയ്യാം സൗജന്യമായി

പരീക്ഷണ ഘട്ടത്തിൽ

നിലവിൽ ട്രൂ കോളറിന്റെ വോയിസ് കോൾ നിലവിൽ വന്നിട്ടില്ല. എന്നാൽ പരീക്ഷണാടിസ്ഥാനത്തിൽ തിരഞ്ഞെടുക്കപ്പെട്ടിരിക്കുന്ന കുറച്ച് ഉപഭോക്താക്കൾക്ക് സേവനം ലഭിച്ചു തുടങ്ങിയിട്ടുണ്ടെന്നും റിപ്പോർട്ടുകളുണ്ട്.
നിലവിൽ, ഈ സേവനം ബീറ്റ പരിശോധനയിലാണെന്നാണ് വിവരം. എന്നാൽ ട്രൂകോളർ സെക്യൂരിറ്റി പേജിൽ ആപ്ലിക്കേഷനിൽ ഇങ്ങനെ ഒരു VoIP സേവനത്തെക്കുറിച്ച് ഒന്നും തന്നെ വ്യക്തമാക്കിയിട്ടില്ല.

ട്രൂകോളറിന്റെ വളർച്ച

ഏറ്റവുമധികം ആളുകൾ ഡൗൺലോഡ് ചെയ്ത് ഉപയോഗിക്കുന്ന ഒരു ആപ്പാണ് ട്രൂകോളർ. അറിയാത്ത ഒരു നമ്പറിൽ നിന്നും ഒരു കോൾ വന്നാൽ അത് ആരാണെന്ന് എളുപ്പം കണ്ടുപിടിക്കാനുള്ള സൗകര്യം ഉള്ളതാണ് ഈ ആപ്പിനെ ജനകീയമാക്കിയത്. എന്നാൽ ഒരു കോളർ ഐഡി, സ്പാം ഡിറ്റക്ഷൻ ആപ്ലിക്കേഷൻ എന്നറിയപ്പെടുന്ന ട്രൂകോളർ കഴിഞ്ഞ രണ്ട് വർഷമായി നിരവധി മാറ്റങ്ങളാണ് കൈവരിച്ചിരിക്കുന്നത്. അവയിൽ ചിലതാണ് ട്രൂകോളർ പേ, ട്രൂകോളർ ചാറ്റ് തുടങ്ങിയവ.

ട്രൂകോളർ പേ

ട്രൂകോളർ 2017 ൽ ഐസിഐസിഐ ബാങ്കുമായി സഹകരിച്ചാണ് സ്വന്തമായി യുപിഐ പേയ്‌മെന്റ് ഗേറ്റ്‌വേ ആരംഭിച്ചത്. അടുത്ത വർഷം തന്നെ ഭാരത് ബിൽ പേയ്‌മെന്റ് സിസ്റ്റവുമായി ചേർന്ന് വൈദ്യുതി, ഡിടിഎച്ച് സേവനം, ഗ്യാസ്, വാട്ടർ ബിൽ, മൊബൈൽ പോസ്റ്റ്പെയ്ഡ്, ബ്രോഡ്‌ബാൻഡ്, ലാൻഡ്‌ലൈൻ ബില്ലുകൾ ട്രൂ കോളർ വഴി അടയ്ക്കാവുന്ന സംവിധാനവും ആരംഭിച്ചു. പണമടച്ചു കഴിഞ്ഞാൽ ഉപയോക്താക്കൾക്ക് തൽക്ഷണ സ്ഥിരീകരണവും ലഭിക്കും.

ട്രൂകോളർ ചാറ്റ്

2018ലാണ് ട്രൂ കോളറില്‍ ട്രൂകോളര്‍ ചാറ്റ് ഫീച്ചര്‍ അവതരിപ്പിച്ചത്. ആന്‍ഡ്രോയിഡ് വേര്‍ഷനുകളില്‍ മാത്രമാണ് ഈ ഫീച്ചര്‍ ലഭ്യമാകുക. സ്പാം മെസ്സേജുകളും മറ്റും റിപ്പോര്‍ട്ട് ചെയ്യാനുള്ള സംവിധാനവും ലഭ്യമാണഅ. വ്യാജ ആര്‍ട്ടിക്കിളുകള്‍, അറിവില്ലാത്ത ബ്ലോഗുകള്‍, ലിങ്കുകള്‍, വെബ്‌സൈറ്റുകള്‍ എന്നിങ്ങനെയുള്ള സ്പാം മെസ്സേജുകളെല്ലാം ഇതുവഴി റിപ്പോര്‍ട്ട് ചെയ്യാം.

ട്രൂ കോളർ വിവരങ്ങൾ വിൽപ്പനയ്ക്ക്

ട്രൂ കോളറിലുള്ള ഇന്ത്യൻ ഉപഭോക്താക്കളുടെ വിവരങ്ങൾ 1.5 ലക്ഷം രൂപയ്ക്ക് ഇന്റർനെറ്റിൽ വിൽപ്പനയ്ക്ക് വച്ചിരിക്കുന്നതായി കഴിഞ്ഞ മാസം ഇക്കണോമിക് ടൈംസ് റിപ്പോർട്ട് പുറത്തു വിട്ടിരുന്നു. ഈ റിപ്പോർട്ട് പ്രകാരം ഉപഭോക്താവിന്റെ പേര്, ഫോൺ നമ്പറുകൾ, ഇ - മെയിൽ വിലാസങ്ങൾ, മേൽവിലാസം, മൊബൈൽ സർവീസ് ഓപ്പറേറ്റർ എന്നീ വിവരങ്ങളാണ് വിൽക്കുന്നത്. ട്രൂ കോളർ ഈ ആരോപണം നിഷേധിച്ചിട്ടില്ല. എന്നാൽ ഡേറ്റകൾ നഷ്ടപ്പെട്ടത് തങ്ങളുടെ അനുമതിയില്ലാതെയാണെന്ന് കമ്പനി വ്യക്തമാക്കിയിരുന്നു.