ബാങ്കിം​ഗ് ഓഹരികൾ ദുർബലമായി; നേട്ടം വാരാന്ത്യത്തിലേക്ക് അടുപ്പിക്കാനായില്ല; വിപണി ഇടിവിൽ

രണ്ട് ദിവസത്തെ നേട്ടങ്ങൾക്ക് ശേഷം ആഭ്യന്തര വിപണി വെള്ളിയാഴ്ച ഇടിവിൽ അവസാനിച്ചു. സെൻസെക്‌സ് 187.75 പോയിന്റ് താഴ്ന്ന് 65,794.73 നിലവാരത്തിലും നിഫ്റ്റി 33.40 പോയിന്റ് ഇടിവോടെ 19,731.80 നിലവാരത്തിലും ക്ലോസ് ചെയ്തു.

എസ്ബിഐ, ആക്സിസ് ബാങ്ക്, ഒഎൻജിസി, ബിപിസിഎൽ, ബജാജ് ഫിനാൻസ് തുടങ്ങിയ ഓഹരികളാണ് നിഫ്റ്റിയിൽ ഏറ്റവും കൂടുതൽ നഷ്ടം നേരിട്ടത്. എസ്ബിഐ ലൈഫ് ഇൻഷുറൻസ്, എച്ച്ഡിഎഫ്സി ലൈഫ്, അപ്പോളോ ഹോസ്പിറ്റൽസ്, ലാർസൻ ആൻഡ് ടൂബ്രോ, ഹീറോ മോട്ടോകോർപ്പ് തുടങ്ങിയ ഓഹരികൾ നേട്ടത്തിൽ ക്ലോസ് ചെയ്തു.

സെക്ടറൽ സൂചികകളിൽ ഓട്ടോ, ക്യാപിറ്റൽ ഗുഡ്‌സ്, എഫ്എംസിജി, ഫാർമ, റിയൽറ്റി എന്നിവ 0.5 ശതമാനം വീതം ഉയർന്നു. പിഎസ്‌യു ബാങ്ക് സൂചിക 2.5 ശതമാനവും ഓയിൽ ആൻഡ് ഗ്യാസ് സൂചിക 1.3 ശതമാനവും ഇടിഞ്ഞു. ബിഎസ്‌ഇ മിഡ്‌കാപ്, സ്‌മോൾകാപ് സൂചികകൾ ബെഞ്ച്മാർക്ക് സൂചികകളെ മറികടന്ന് നേട്ടത്തിലാണ് ക്ലോസ് ചെയ്തത്.

ഈ വാരം നേട്ടത്തിൽ

വാരാന്ത്യത്തിൽ ഇടിവിലാണെങ്കിലും ഈ ആഴ്ച നിഫ്റ്റിയും സെൻസെക്സും 1 ശതമാനത്തിലധികം നേട്ടമുണ്ടാക്കി. മിഡ്കാപ് സൂചിക 3 ശതമാനം വരെ ഉയർന്നു. ബാങ്ക് നിഫ്റ്റി 1 ശതമാനത്തിലധികം ഇടിവാണ് ഈ വാരത്തിലുണ്ടായത്. നിഫ്റ്റിയിൽ ആക്സിസ് ബാങ്ക്, ബജാജ് ഫിനാൻസ്, ഐസിഐസിഐ ബാങ്ക് എന്നിവ ഈ വാരം കാര്യമായ നഷ്ടം രേഖപ്പെടുത്തി. ഐഷർ മോട്ടോഴ്സ്, ഹീറോ മോട്ടക്രോപ്പ്, കോൾ ഇന്ത്യ, ടെക് മഹീന്ദ്ര എന്നിവ നിഫ്റ്റിയിൽ നേട്ടമുണ്ടാക്കിയവായാണ്.

ശ്രദ്ധേയമായ ഓഹരികൾ

സുരക്ഷിതമല്ലാത്ത വായ്പകൾക്കുള്ള റിസ്‌ക് വെയ്റ്റ് ഉയർത്താനുള്ള ആർബിഐയുടെ നടപടി ബാങ്കിംഗ് സ്റ്റോക്കുകളെ ദുർബലപ്പെടുത്തി. ഇത് വിപണി സാഹചര്യങ്ങളെ ബാധിച്ചു. നിഫ്റ്റി ബാങ്ക് 1.31 ശതമാനം ഇടിഞ്ഞു. സ്റ്റേറ്റ് ബാങ്ക് ഓഫ് ഇന്ത്യ, ആക്സിസ് ബാങ്ക്, ഐസിഐസിഐ ബാങ്ക് എന്നിവയാണ് കൂടുതൽ നഷ്ടമുണ്ടാക്കിയത്. ആർബിഎൽ ബാങ്ക് ഓഹരികൾ 7.70 ശതമാനം ഇടിഞ്ഞു. 

ടിവിഎസ് മോട്ടോർ, ബജാജ് ഓട്ടോ ഇൻട്രാ ഡേയിൽ മികച്ച നേട്ടമുണ്ടാക്കി. ഓഹരികൾ 4 ശതമാനം വരെ ഉയർന്നു. ഇൻഷുറൻസ് ഓഹരികളും നേട്ടമുണ്ടാക്കി. റെയിൽവേ ഓഹരികളിൽ ആർവിഎൻഎൽ ഏകദേശം 5 ശതമാനവും ടിറ്റാഗഡ് റെയിൽ 20 ശതമാനത്തോളവും ഉയർന്നു. നിഫ്റ്റി ഫാർമ റെക്കോർഡ് ഉയരത്തിലെത്തി. അരബിന്ദോ 3 ശതമാനവും ‌ഡോ. റെഡ്ഡി ലബോറട്ടറീസ് 1 ശതമാനവും നേട്ടമുണ്ടാക്കി.

വെള്ളിയാഴ്ച രൂപ നേരിയ നഷ്ടത്തോടെ ഡോളറിനെതിരെ 83.27 നിലവാരത്തിലാണ് ക്ലോസ് ചെയ്തത്. വ്യാഴാഴ്ച 83.23 നിലവാരത്തിലായിരുന്നു ക്ലോസിം​ഗ്.