കേന്ദ്ര ബജറ്റ് 2024; നികുതി ഘടനയിൽ മാറ്റങ്ങളൊന്നുമില്ല; ശ്രദ്ധ ആരോ​ഗ്യ മേഖലയിൽ; സാധാരണക്കാരന് എന്തുണ്ട്

ബജറ്റ് അവതരണത്തിന് മുൻപ് കേന്ദ്ര ധനമന്ത്രി നിർമലാ സീതാരാമൻ വ്യക്തിമാക്കിയത് പോലെ വലിയ പ്രഖ്യാപനങ്ങളില്ലാത്ത ഇടക്കാല ബജറ്റ് പ്രഖ്യാപനമാണ് വ്യാഴാഴ്ച നടന്നത്. 58 മിനിറ്റ് നീണ്ട ഇടക്കാല ബജറ്റ് പ്രസം​ഗം അവസാനിപ്പിച്ചത് നികുതി മാറ്റമില്ലെന്ന പ്രഖ്യാപനത്തോടെയാണ്. അതേസമയം പൊതുതിരഞ്ഞെടുപ്പിന് ശേഷം സമ്പൂർണ ബജറ്റുമായി ഇതേ സർക്കാർ തിരിച്ചെത്തുമെന്ന ശുഭാപ്തി വിശ്വാസവും ധനമന്ത്രി പ്രകടിപ്പിച്ചു.

ഇതുവരെയുള്ള നിർമലാ സീതാരമന്റെ ബജറ്റ് പ്രസം​ഗങ്ങളിൽ ഏറ്റവും ചെറിയ പ്രസംഗമാണിത്. 2025 സാമ്പത്തിക വർഷത്തിൽ രാജ്യത്തിന്റെ മൂലധനച്ചെലവ് 11.1 ശതമാനം വർധിപ്പിച്ച് 11.11 ലക്ഷം കോടി രൂപയായതായി നിർമലാ സീതാരമൻ പ്രഖ്യാപിച്ചു. ആദായ നികുതിയിൽ യാതൊരു മാറ്റവും പ്രഖ്യാപിക്കാതിരുന്നപ്പോൾ ആരോ​ഗ്യമേഖലയിൽ ചില പ്രഖ്യാപനങ്ങൾ നിർമലാ സീതാരമൻ നടത്തി. വിശദമായി നോക്കാം.

നികുതിയിൽ മാറ്റങ്ങളൊന്നുമില്ല

പ്രത്യക്ഷ, പരോക്ഷ നികുതി നിരക്കുകളിൽ മാറ്റങ്ങളോ നികുതി സ്ലാബുകളിൽ മാറ്റമോ വരുത്തിയിട്ടില്ലെന്ന് ധനമന്ത്രി നിർമലാ സീതാരാമൻ ബജറ്റ് പ്രസം​ഗത്തിനിടെ വ്യക്തിമാക്കി. ഇറക്കുമതി ചുങ്കത്തിലും മാറ്റമില്ല. പുതിയ നികുതി വ്യവസ്ഥയിൽ പ്രതിവർഷം 7 ലക്ഷം രൂപ വരെ നികുതി അടയ്ക്കേണ്ടതില്ല.

നികുതിദായകരുടെ എണ്ണത്തിൽ 2.5 മടങ്ങ് വർധനവ് ഉണ്ടായതായും റീഫണ്ട് കാലയളവ് കുറഞ്ഞതായും ധനമന്ത്രി ബജറ്റ് പ്രസം​ഗത്തിൽ സൂചിപ്പിച്ചു. 2013-2014 ലെ 93 ദിവസമെടുത്തിരുന്ന ആദായ നികുതി റീഫണ്ട് കഴിഞ്ഞ വർഷം വെറും 10 ദിവസമായി കുറഞ്ഞെന്ന് നിർമലാ സീതാരാമൻ പറഞ്ഞു.

സ്റ്റാർട്ടപ്പിനുള്ള നികുതി ഇളവ് 2025 മാർച്ച് 31 വരെ നീട്ടിയതാണ് നികുതിയുമായി ബന്ധപ്പെട്ട് ബജറ്റിലുള്ള വ്യത്യാസം. 

പരി​ഗണന ആരോ​ഗ്യ രം​ഗത്ത്

കൂടുതൽ മെഡിക്കൽ കോളേജുകൾ സ്ഥാപിക്കാൻ അടക്കമുള്ള പ്രഖ്യാപനങ്ങളോടെ സാധാരണക്കാരെ ആരോ​ഗ്യ രം​ഗത്ത് പരി​ഗണിക്കുന്ന ചില പ്രഖ്യാപനങ്ങൾ ധനമന്ത്രി നിർമലാ സീതാരാമൻ നടത്തി.

നിലവിലുള്ള ആശുപത്രികളെ മെഡിക്കൽ കോളേജായി ഉയർത്തുന്നതിന് സർക്കാർ പദ്ധതിയിടുന്നുണ്ടെന്നും പ്രശ്‌നങ്ങൾ പരിശോധിച്ച് തുടർനടപടികൾക്കായി ഒരു കമ്മിറ്റി രൂപീകരിക്കുമെന്നും നിർമലാ സീതാരാമൻ പറഞ്ഞു. സെർവിക്കൽ ക്യാൻസർ തടയുന്നതിനായി 9-14 വയസിനിടയിലുള്ള പെൺകുട്ടികൾക്ക് സെർവിക്കൽ ക്യാൻസർ വാക്സിനേഷനും ബജറ്റിൽ പ്രഖ്യാപിച്ചു.

ആയുഷ്മാൻ ഭാരത് പദ്ധതിക്ക് കീഴിലുള്ള ആരോഗ്യ പരിരക്ഷ എല്ലാ ആശാ, അങ്കണവാടി പ്രവർത്തകർക്കും ഹെൽപ്പർമാർക്കും കൂടി ലഭിക്കുന്ന തരത്തിൽ വ്യാപിപ്പിക്കും. മാതൃ-ശിശു ആരോഗ്യ പരിരക്ഷാ പദ്ധതികളും ഒരു സമഗ്ര പരിപാടിക്ക് കീഴിൽ കൊണ്ടുവരും. പോഷകാഹാര വിതരണം, കുട്ടിക്കാലത്തെ പരിചരണം എന്നിവ മെച്ചപ്പെടുത്തുന്നതിനായി 'സാക്ഷം അങ്കണവാടി', പോഷൻ 2.0 എന്നിവയുടെ കീഴിലുള്ള അങ്കണവാടി കേന്ദ്രങ്ങളുടെ നവീകരണം വേ​ഗത്തിലാക്കും എന്നിവ ആരോ​ഗ്യ മേഖലയുമായി ബന്ധപ്പെട്ട പ്രഖ്യാപനങ്ങളാണ്.