ഒറ്റദിവസം കൊണ്ട് 13% വരെ നേട്ടമുണ്ടാക്കി യെസ് ബാങ്ക് ഓഹരികൾ; നേട്ടത്തിന് കാരണമെന്ത്? ലക്ഷ്യവില അറിയാം

തിങ്കളാഴ്ചയിലെ അവസാന നിമിഷത്തിലെ ഇടിവിന് ശേഷം വിപണി ചൊവ്വാഴ്ച തിരിച്ചു വരവിന്റെ പാതയിലാണ്. ചൊവ്വാഴ്ച ഉച്ചയോടെ നിഫ്റ്റി 136 പോയിന്റും സെൻസെക്സ് 423.35 പോയിന്റും ഉയർന്നാണ് വ്യാപാരം നടക്കുന്നത്. ഈ ഘട്ടത്തിൽ ശ്രദ്ധേയമാകുന്നൊരു ഓഹരിയാണ് സ്വകാര്യ ബാങ്കായ യെസ് ബാങ്ക്. ഇൻട്രാ ഡേയിൽ 13 ശതമാനം വരെ നേട്ടമുണ്ടാക്കിയാണ് ഓഹരി വ്യാപാരം നടക്കുന്നത്. യെസ് ബാങ്കുമായി ബന്ധപ്പെട്ടുണ്ട് പുറത്ത് വന്ന വാർത്തകളാണ് ഓഹരിയെ മുന്നോട്ട് നയിക്കുന്നത്.

നേട്ടത്തിന് കാരണം

യെസ് ബാങ്കിൽ എച്ച്ഡിഎഫ്സ് ബാങ്ക് ​ഗ്രൂപ്പ് അധിക ഓഹരികൾ വാങ്ങുമെന്ന വാർത്തയാണ് ചൊവ്വാഴ്ച യെസ് ബാങ്ക് ഓഹരികളെ നേട്ടത്തിലെത്തിച്ചത്. യെസ് ബാങ്ക് അടക്കം അഞ്ച് ബാങ്കുകളിൽ നിക്ഷേപത്തിന് എച്ച്‌ഡിഎഫ്‌സി ബാങ്ക് ഗ്രൂപ്പിന് റിസർവ് ബാങ്ക് അനുമതി ലഭിച്ചു.

വാർത്ത പുറത്ത് വന്നതിന് പിന്നാലെ ഇൻട്രാ ഡേയിൽ യെസ് ബാങ്ക് 13 ശതമാനം വരെ നേട്ടമുണ്ടാക്കി. ഉച്ചയ്ക്ക് 1.30 ഓടെ യെസ് ബാങ്ക് ഓഹരികൾ ചൊവ്വാഴ്ചയിലെ ക്ലോസിം​ഗിനേക്കാൾ 10.75 ശതമാനം ഉയർന്ന് 25.25 രൂപയിലാണ് വ്യാപാരം നടക്കുന്നത്.

എച്ച്ഡിഎഫ്സി ബാ്ങ്ക് ഓഹരികൾ വാങ്ങും

ഇൻഡസ്ഇൻഡ് ബാങ്ക്, യെസ് ബാങ്ക്, ആക്‌സിസ് ബാങ്ക്, ഐസിഐസിഐ ബാങ്ക്, സൂര്യോദയ് സ്‌മോൾ ഫിനാൻസ് ബാങ്ക്, ബന്ധൻ ബാങ്ക് എന്നിവയിൽ 9.5 ശതമാനം വരെ ഓഹരികൾ വാങ്ങാനാണ് റിസർവ് ബാങ്ക് ഓഫ് ഇന്ത്യ എച്ച്ഡിഎഫ്സി ബാങ്ക് ഗ്രൂപ്പിന് അനുമതി നൽകിയത്. ഓഹരികൾ ഏറ്റെടുക്കുന്നതിനുള്ള അനുമതി ഒരു വർഷത്തേക്കാണെന്ന് എച്ച്‌ഡിഎഫ്‌സി ബാങ്ക് റെഗുലേറ്ററി ഫയലിംഗിൽ വ്യക്തമാക്കുന്നു.

എച്ച്‌ഡിഎഫ്‌സി അസറ്റ് മാനേജ്‌മെൻ്റ് കമ്പനി (എഎംസി), എച്ച്‌ഡിഎഫ്‌സി എർഗോ, എച്ച്‌ഡിഎഫ്‌സി ലൈഫ് ഇൻഷുറൻസ് എന്നിവ വഴിയാകും നിക്ഷേപമെന്നും ഫയലിം​ഗിൽ ചൂണ്ടിക്കാട്ടുന്നു. ആർബിഐ അനുമതി ഒരു വർഷത്തേക്കുള്ളതാണ്. ഈ സമയത്തിനുള്ളിൽ എച്ച്ഡിഎഫ്‌സി ബാങ്ക് ഗ്രൂപ്പ് ഓഹരികൾ ഏറ്റെടുക്കുന്നതിൽ പരാജയപ്പെട്ടാൽ അനുമതി അസാധുവാകും.

യെസ് ബാങ്ക് ഓഹരികൾ

ചൊവ്വാഴ്ച 23.10 രൂപയിൽ വ്യാപാരം ആരംഭിച്ച യെസ് ബാങ്ക് ഓഹരികളിൽ തുടർന്ന് ശക്തമായ വാങ്ങൽ താൽപര്യം പ്രകടമായിരുന്നു. തുടർന്ന് ഇൻട്രാ ഡേയിലെ ഉയർന്ന നിലവാരമായ 25.70 രൂപയിലേക്ക് ഓഹരി കുതിച്ചുയർന്നു, ചൊവ്വാഴ്ച ഏകദേശം 13 ശതമാനമാണ് ഓഹരി വില വർധിച്ചത്.

ഓഹരി 52 ആഴ്ചയിലെ ഉയർന്ന നിലവാരത്തിന് സമീപമാണ് വ്യാപാരം നടക്കുന്നത്. 26.25 രൂപയാണ് ഒരു വർഷകാലത്തിനിടയിലെ ഉയർന്ന വില നിലവാരം. ഒരു വർഷത്തിനിടെ 51.65 ശതമാനം റിട്ടേൺ നൽകിയ ഓഹരിയാണ് യെസ് ബാങ്ക്. 2024ൽ ഇതുവരെ 11.48 ശതമാനം റിട്ടേൺ ഓഹരി നൽകിയിട്ടുണ്ട്.

2024 സാമ്പത്തിക വർഷത്തിലെ മൂന്നാം പാദത്തിൽ യെസ് ബാങ്കിൻ്റെ അറ്റാദായം 349.7 ശതമാനം ഉയർന്ന് 231.6 കോടി രൂപയായിരുന്നു. കഴിഞ്ഞ സാമ്പത്തിക വർഷത്തെ 51.5 കോടി രൂപയിൽ നിന്ന് ഇതേ കാലയളവിലെ പ്രവർത്തന ലാഭം 5.4 ശതമാനം വർധിച്ച് 864 കോടി രൂപയായി.

ഓഹരി വില 30 രൂപ കടക്കുമോ?

യെസ് ബാങ്ക് ഓഹരികളിൽ കൂടുതൽ ഉയർച്ച പ്രതീക്ഷിക്കാം എന്നാണ് ചോയ്‌സ് ബ്രോക്കിംഗിലെ എക്‌സിക്യൂട്ടീവ് ഡയറക്ടർ സുമീത് ബഗാഡിയയുടെ വിലയിരുത്തൽ. യെസ് ബാങ്ക് ഓഹരികൾ 26 രൂപ നിരക്കിൽ പുതിയ ബ്രേക്ക്ഔട്ട് പ്രതീക്ഷിക്കാം. ഈ ബ്രേക്ക്ഔട്ടിനുശേഷം, യെസ് ബാങ്ക് ഓഹരികൾ ഹ്രസ്വകാലത്തേക്ക് 27.50- 30 രൂപ നിലവാരത്തിലേക്ക് ഉയർന്നേക്കാമെന്നാണ് സുമീ​ഗ് ബ​ഗാഡിയ വിലയിരുത്തുന്നത്.

ഓഹരി 22.50 രൂപയിൽ ശക്തമായ പിന്തുണയുണ്ട്. അതിനാൽ യെസ് ബാങ്ക് ഓഹരി ഉടമകൾക്ക് 22.50 രൂപ നിലവാരത്തിൽ സ്റ്റോപ്പ് ലോസ് ക്രമീകരിക്കാനും അദ്ദേ​ഗം നിർദ്ദേശിക്കുന്നു. പുതിയ നിക്ഷേപകരാണെങ്കിൽ ഇതേ സ്റ്റോപ്പ് ലോസ് നിലനിർത്തി ബൈ-ഓൺ-ഡിപ്സ് തന്ത്രം ഉപയോ​ഗിക്കാമെന്നും അദ്ദേഹം കൂട്ടിച്ചേർത്തു.

അറിയിപ്പ്

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിനു നല്‍കുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ സ്വീകരിക്കും മുമ്പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്‌നോളജീസും ലേഖകനും ഉത്തരവാദികളല്ല.