'ചലോ ലക്ഷദ്വീപ്' ക്യാമ്പയിൻ നേട്ടമാകും; മാലദ്വീപ് വിവാദത്തിന് പിന്നാലെ കുതിച്ച് സ്മോൾകാപ് കമ്പനി; നോക്കുന്നോ

പ്രധാനമന്ത്രി നരേന്ദ്ര മോദിയുടെ ലക്ഷദ്വീപ് സന്ദർശനത്തെ പരിഹസിക്കുകയും അപമാനിക്കുകയും ചെയ്ത മാലദ്വീപ് മന്ത്രിമാരുടെ പ്രസ്താവനകളോടെയാണ് ഇന്ത്യയ്ക്കും മാലദ്വീപിനും ഇടയിൽ നയതന്ത്ര തലത്തിൽ തർക്കം തുടങ്ങിയത്. പ്രധാനമന്ത്രിക്കെതിരായ പരമാർശത്തിന്റെ പേരിൽ മാലദ്വീപിനെതിരെ സോഷ്യൽ മീഡിയയിലും വലിയ പ്രചാരണങ്ങൾ തുടങ്ങി.

വിനോദ സഞ്ചാരം പ്രധാന വരുമാന മാലദ്വീപിനെതിരെ #BoycottMaldives എന്ന പേരിൽ എക്സിലടക്കം വലിയ രീതിയിൽ സോഷ്യൽ മീഡിയ പ്രചാരണം ആരംഭിച്ചത്. ഇതോടൊപ്പം #ExploreIndianIslands എന്ന ഹാഷ്‌ടാഗിൽ 'ചലോ ലക്ഷദ്വീപ്' എന്ന പ്രചാരണത്തിനും സോഷ്യൽ മീഡിയയിൽ പ്രചാരണം ഏറുകയാണ്.

ഇന്ത്യ- മാലദ്വീപ് നയതന്ത്ര തർക്കത്തിൽ നേട്ടമുണ്ടാക്കുകയാണ് ചില ഓഹരികൾ. മാലദ്വീപിലേക്കുള്ള വിമാന ബുക്കിം​ഗ് നിർത്തലാക്കിയ ഈസിമൈട്രിപ്പ് കമ്പനിയുടെ ഓഹരികൾ നേട്ടത്തിലാണ്. അതോടൊപ്പം 'ചലോ ലക്ഷദ്വീപ്' എന്ന പേരിൽ ലക്ഷദ്വീപിലേക്കുള്ള യാത്രകളെ പ്രോത്സാഹിപ്പിക്കുന്ന പ്രചാരണത്തിൽ നേട്ടമുണ്ടാക്കുകയാണ് ലക്ഷദ്വീപ് കണക്ഷനുള്ള സ്മോൾകാപ് ഹോസ്പ്പിറ്റാലിറ്റി ഓഹരിയായ പ്രവേ​ഗ് ലിമിറ്റഡ്.

പ്രവേ​ഗ് ലിമിറ്റഡ്

എക്‌സിബിഷൻ മാനേജ്‌മെന്റ് കമ്പനിയായി ആരംഭിച്ച ഇവന്റ് മാനേജ്മെന്റ്, ടൂറിസം ആൻഡ് ഹോസ്പിറ്റാലിറ്റി, പബ്ലിക്കേഷൻ എന്നിവയുൾപ്പെടെ വൈവിധ്യമാർന്ന പോർട്ട്ഫോളിയോ ഉള്ള കമ്പനിയാണ് പ്രവേ​ഗ് ലിമിറ്റഡ്. അഹമ്മദാബാദ് ആസ്ഥാനമായ കമ്പനി കഴിഞ്ഞ 20 വർഷത്തിനിടെ ഇന്ത്യയിലും വിദേശത്തുമായി 3000-ലധികം പരിപാടികളും എക്സിബിഷനുകളും കമ്പനി കൈകാര്യം ചെയ്തിട്ടുണ്ട്. കച്ച് റാൻ ഉത്സവിലെ വൈറ്റ് റാൻ റിസോർട്ട്, സ്റ്റാച്യു ഓഫ് യൂണിറ്റിയിലെ ടെന്റ് സിറ്റി നർമ്മദ എന്നിവയുടെ നടത്തിപ്പ് പ്രവേ​ഗ് ലിമിറ്റഡിന് കീഴിലാണ്.

ഓഹരിയുടെ ലക്ഷദ്വീപ് കണക്ഷൻ

ഇന്ത്യ- മാലദ്വീപ് വിഷയത്തിന്റെ ഭാഗമായി നടക്കുന്ന 'ചലോ ലക്ഷ്വദീപ്' ക്യാമ്പയിന്റെ നേട്ടം ലഭിക്കുന്നൊരു ഓഹരിയാണ് പ്രവേഗ്. കേന്ദ്രഭരണ പ്രദേശമായ ലക്ഷദ്വീപിലെ അഗത്തി ദ്വീപില്‍ 50 ടെന്റുകളുടെ പ്രവര്‍ത്തനത്തിനും പരിപാലനത്തിനുമുള്ള വര്‍ക്ക് ഓര്‍ഡര്‍ കഴിഞ്ഞ മാസമാണ് കമ്പനി സ്വന്തമാക്കിയത്.

ലക്ഷദ്വീപിലെ റിസോര്‍ട്ടുകളില്‍ സ്‌കൂബാ ഡൈവിംഗ്, ഡെസ്റ്റിനേഷന്‍ വെഡ്ഡിംഗ്, കോര്‍പ്പറേറ്റ് ഫംഗ്ഷനുകള്‍ തുടങ്ങിയ വാണിജ്യ പ്രവര്‍ത്തനങ്ങളും കമ്പനി ന‌ൽകും. മൂന്ന് വര്‍ഷത്തേക്കാണ് വർക്ക് ഓർഡർ. ഇത് രണ്ട് വര്‍ഷം വരെ നീട്ടാമെന്നും കമ്പനി അടുത്തിടെ അറിയിച്ചിരുന്നു.

ഓഹരികൾ കുതിപ്പ്

സ്‌മോള്‍കാപ് ഓഹരിയായ പ്രവേഗ് ഈ വാര്‍ത്തയ്ക്ക് പിന്നാലെ കുതിക്കുകയാണ്. തിങ്കളാഴ്ച 20 ശതമാനം ഉയര്‍ന്ന ഓഹരി ചൊവ്വാഴ്ച 15 ശതമാനത്തിലധികം ഉയര്‍ന്ന് 1,187.95 രൂപയില്‍ 52 ആഴ്ചയിലെ ഉയര്‍ന്ന നിലവാരം കുറിച്ചിട്ടുണ്ട്. നിലവിൽ 1,170 രൂപയിലാണ് ഓഹരിയുടെ വ്യാപാരം. സമീപകാലത്ത് ഹോസ്പിറ്റാലിറ്റി ഓഹരികളുടെ മികച്ച പ്രകടനം പ്രവേ​ഗ് ഓഹരിയിലും കാണാം.

മൂന്ന് മാസത്തിനിടെ മള്‍ട്ടിബാഗര്‍ റിട്ടേണാണ് ഈ ഹോസ്പ്പിറ്റാലിറ്റി ഓഹരി നല്‍കിയത്. 112.50 ശതമാനം വളര്‍ച്ച ഓഹരി ഇതിനോടകം കാഴ്ചവെച്ചു. മറ്റൊരു ശ്രദ്ധേയമായ കാര്യം 2024 ല്‍ ഇതിനോടകം ഓഹരി 58.85 ശതമാനം റിട്ടേണ്‍ നല്‍കിയെന്നതാണ്. ഒരാഴ്ചയ്ക്കിടെ ഈ മള്‍ട്ടിബാഗര്‍ ഓഹരി 37.54 ശതമാനം ഉയര്‍ന്നു. ഒരു വര്‍ഷത്തിനിടെ ഓഹരി ഉടമകള്‍ക്ക് 263 ശതമാനവും റിട്ടേണ്‍ നല്‍കിയ ഓഹരിയാണ് പ്രവേഗ് ലിമിറ്റഡ്.

ഓഹരി പങ്കാളിത്തം

55 ശതമാനത്തിന്റെ ഉയര്‍ന്ന പ്രമോട്ടര്‍ ഹോള്‍ഡിംഗുള്ള കമ്പനിയാണ് പ്രവേഗ് ലിമിറ്റഡ്. കമ്പനിയില്‍ 5.14 ശതമാനം ഓഹരികള്‍ വിദേശ നിക്ഷേപകരുടെ പക്കലാണ്. 2024 സെപ്റ്റംബർ പാദത്തിൽ പ്രമോട്ടർമാർ 2 ശതമാനത്തോളം ഓഹരികൾ വിറ്റഴിയിച്ചിരുന്നു. അതേസമയം വിദേശ നിക്ഷേപകർ 3 ശതമാനത്തിലധികം ഓഹരികൾ അധികമായി സ്വന്തമാക്കി.

അറിയിപ്പ്

മുകളില്‍ കൊടുത്തിരിക്കുന്ന ലേഖനം വിവിധ റിപ്പോര്‍ട്ടുകളെ അടിസ്ഥാനമാക്കിയും പഠനാവശ്യത്തിന് നല്‍കുന്നതുമാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭ നഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.