മൂന്ന് ദിവസത്തെ നഷ്ടത്തിന് വിരാമം; സെൻസെക്സ് 480 പോയിന്റ് ഉയർന്നു; നിഫ്റ്റി 19,500 ന് മുകളിൽ

മൂന്ന് ദിവസത്തെ തുടർച്ചയായ നഷ്ടങ്ങൾക്ക് ശേഷം നേട്ടത്തിന്റെ വഴിയിൽ തിരിച്ചെത്തി ഇന്ത്യൻ ആഭ്യന്തര സൂചികകൾ. സെൻസെക്സ് 480.57 പോയിന്റ് ഉയർന്ന് 65,721.25ലും നിഫ്റ്റി 135.30 പോയിന്റ് നേട്ടത്തിൽ 19,517ലുമാണ് വ്യാപാരം അവസാനിപ്പിച്ചത്. വെള്ളിയാഴ്ച നേട്ടത്തിലാണെങ്കിലും നിഫ്റ്റിയെ സംബന്ഘിച്ച മൂന്ന് മാസത്തിനിടയിലെ ഏറ്റവും മോശം ആഴ്ചയായിരുന്നു ഇത്. നിഫ്റ്റി ഈ ആഴ്‌ച ഇതുവരെ 1% ഇടിഞ്ഞു. യു‌എസ് റേറ്റിംഗ് കുറച്ചതും, ദുർബലമായ ചൈന ഡാറ്റയും അടക്കം ഈ വാരം വിപണി സമ്മർദ്ദത്തിലായിരുന്നു.  

സിപ്ല, ഇൻഡസ്ഇൻഡ് ബാങ്ക്, ടെക് മഹീന്ദ്ര, വിപ്രോ, ഭാരതി എയർടെൽ എന്നിവയാണ് നിഫ്റ്റിിയിൽ മുന്നേറ്റമുണ്ടാക്കിയത്. എസ്ബിഐ, ബജാജ് ഓട്ടോ, ബിപിസിഎൽ, എൻടിപിസി, മാരുതി സുസുക്കി എന്നിവ നഷ്ടത്തിൽ ക്ലോസ് ചെയ്തു. വെള്ളിയാഴ്ച ഏകദേശം 2,177 ഓഹരികൾ നേട്ടമുണ്ടാക്കി. 1,296 ഓഹരികളിൽ ഇടിവ് നേരിട്ടപ്പോൾ 139 ഓഹരികളുടെ വിലയിൽ മാറ്റമില്ല.

സെക്ടറൽ സൂചികയിൽ ഫാർമ, ഐടി സൂചിക 1 ശതമാനം വീതവും ബാങ്ക്, ക്യാപിറ്റൽ ​ഗുഡ്സ്, മെറ്റൽ സൂചികകൾ 0.5 ശതമാനം വീതവും ഉയർന്നു. ഓട്ടോ, പവർ ഓഹരികളിൽ വിൽപ്പന നടന്നു. ബിഎസ്ഇ മിഡ്കാപ്, സ്മോൾകാപ് സൂചികകൾ 0.6 ശതമാനം വീതം ഉയർന്നു.

പൊതു ചിത്രം

മരുന്ന് നിർമ്മാതാക്കളിൽ ബ്ലാക്ക്‌സ്റ്റോൺ ഓഹരി വാങ്ങാൻ പദ്ധതിയുടുന്ന എന്ന റിപ്പോർട്ടാണ് ഫാർമ ഓഹരിയായ സിപ്ലയെ തുണച്ചത്. ഓഹരി 6.25 ശതമാനം ഉയർന്നു. സിപ്ല, ലുപിൻ, മാരികോ, ഇൻഫോ എഡ്ജ് (നൗക്രി), സൊമാറ്റോ എന്നിവയുൾപ്പെടെ 250-ലധികം ഓഹരികൾ 52 ആഴ്ചയിലെ ഉയർന്ന നിലയിലെത്തി.

ബി‌എസ്‌ഇയിൽ ലിസ്റ്റ് ചെയ്തിട്ടുള്ള കമ്പനികളുടെ ആകെ വിപണി മൂലധനം മുൻ സെഷനിലെ 302.3 ലക്ഷം കോടി രൂപയിൽ നിന്ന് 304.1 ലക്ഷം കോടി രൂപയായി ഉയർന്നു, ഇത് നിക്ഷേപകരെ ഒറ്റ സെഷനിൽ 1.8 ലക്ഷം കോടി രൂപ സമ്പന്നരാക്കി.

രൂപ ഇടിയുന്നു

ഡോളർ ശക്തമാകുന്നതോടെ രൂപ ഇടിവിലാണ്. രൂപ ഡോളറിനെതിരെ 11 പൈസ ഇടിഞ്ഞ് 82.84 എന്ന നിലയിലാണ് വ്യാപാരം അവസാനിപ്പിച്ചത്. വ്യാഴാഴ്ച അവസാനിച്ച 82.73 നിലവാരത്തിലായിരുന്നു രൂപയുടെ ക്ലോസിം​ഗ്. ഡോളർ ശക്തിപ്പെടുന്നതും ഉയർന്ന ക്രൂഡ് ഓയിൽ വിലയും രൂപ ഇടിയുന്നതിന് കാരണമായി. കഴിഞ്ഞ ആഴ്ചയിൽ, വിദേശ സ്ഥാപനങ്ങൾ ആഭ്യന്തര ഓഹരികളിൽ നിന്ന് 273 മില്യൺ ഡോളറിന്റെ വില്പന നടത്തി. രൂപ 0.7 ശതമാനമാണ് ഇടിഞ്ഞത്.