ഐടി, മെറ്റൽ, ഫാർമ ഓഹരികൾ മുന്നേറി; റിലയൻസ് ​ഗ്രൂപ്പ് ഓഹരികളിൽ കുതിപ്പ് വിപണി നേട്ടത്തിൽ

വ്യാഴാഴ്ച പുറത്തു വരാനിരിക്കുന്ന ത്രൈമാസ പാദഫലങ്ങളൾക്ക് മുന്നോടിയായി ഐടി ഓഹരികളുടെ കുതിപ്പിൽ ആഭ്യന്തര സൂചികകൾക്ക് നേട്ടം. സെൻസെക്‌സ് 271.50 പോയിന്റ് നേട്ടത്തോടെ 71,657.71 നിലവാരത്തിലും നിഫ്റ്റി 73.85 പോയിന്റ് ഉയർന്ന് 21,618.70 നിലവാരത്തിലും ക്ലോസ് ചെയ്തു. ഐടി ഓഹരികൾക്കൊപ്പം മെറ്റൽ, ഫാർമ ഓഹരികളും ബുധനാഴ്ച നേട്ടമുണ്ടാക്കി. കനത്ത ചാഞ്ചാട്ടത്തിന് ഒടുവിലാണ് വിപണി നേട്ടത്തിൽ ക്ലോസ് ചെയ്യുന്നത്. തുടർച്ചയായ മൂന്നാം ദിവസമാണ് വിപണിയിലെ നേട്ടം.

നിഫ്റ്റിയിൽ സിപ്ല, റിലയൻസ് ഇൻഡസ്ട്രീസ്, അദാനി എന്റർപ്രൈസസ്, എച്ച്സിഎൽ ടെക്നോളജീസ്, അദാനി പോർട്ട്സ് എന്നിവ നേട്ടമുണ്ടാക്കി. ഒഎൻജിസി, ദിവിസ് ലാബ്സ്, ബിപിസിഎൽ, എൻടിപിസി, പവർ ഗ്രിഡ് കോർപ്പറേഷൻ എന്നിവ നഷ്ടത്തിലാണ്.

സെക്ടറൽ സൂചികകളിൽ ഹെൽത്ത് കെയർ, ഇൻഫർമേഷൻ ടെക്നോളജി, മെറ്റൽ എന്നിവ 0.4 ശതമാനം ഉയർന്നു. നിഫ്റ്റി മീഡിയ 3.4 ശതമാനം ഉയർന്നു. ഓയിൽ ആൻഡ് ​ഗ്യാസ് സൂചിക 0.5 ശതമാനം ഇടിഞ്ഞു. ബിഎസ്‌ഇ മിഡ്‌കാപ്, സ്‌മോൾകാപ് സൂചികകൾ നേരിയ നേട്ടത്തിലാണ് വ്യാപാരം അവസാനിപ്പിച്ചത്.

ടാറ്റ കൺസൾട്ടൻസി സർവീസസ്, ഇൻഫോസിസ് എന്നിവയുടെ ത്രൈമാസ പാദഫലങ്ങൾ വ്യാഴാഴ്ച പുറത്ത് വരും. ഡിസംബർ പാദത്തിലെ കമ്പനികളുടെ വരുമാന കണക്കുകൾ പുറത്തു വരുന്നത് ഐടി കമ്പനികളുടെ പാദഫലത്തോടെയാണ്. കൂടാതെ, ഡിസംബറിലെ യുഎസ് ഉപഭോക്തൃ വില സൂചികയും (സിപിഐ) അതേ ദിവസമാണ് പുറത്തുവരുന്നത്. ഇക്കാരണങ്ങളാണ് ബുധനാഴ്ച വിപണിയിലെ നേട്ടത്തിന് കാരണം.

പാദഫലങ്ങൾക്ക് മുന്നോടിയായി ടിസിഎസ് നേട്ടമുണ്ടാക്കി. മിക്ക റിലയൻസ് ​ഗ്രൂപ്പ് ഓഹരികളിലും ശക്തമായ വാങ്ങൽ കണ്ടു. ടിവി18, നെറ്റ്‍വർക്ക്18 എന്നിവ 15-20 ശതമാനം വരെ ഉയർന്നു. ഈ ഓഹരികളുടെ ബലത്തിൽ നിഫ്റ്റി മീഡിയ 3.4 ശതമാനം ഉയർന്നു. ഇൻഡസ് ടവർ ഓഹരികളും നേട്ടമുണ്ടാക്കി.

വാർഷിക ജനറൽ ബോഡിക്ക് മുന്നോടിയായി സ്പൈസ് ജെറ്റ് 5 ശതമാനം ഉയർന്നു. അനുബന്ധ കമ്പനിയായ ശീർവാദ് മൈക്രോഫിനിന്റെ ഐ‌പി‌ഒ സെബി നിർത്തിവെച്ചെന്ന വാർത്തയിൽ മണപ്പുറം ഫിനാൻസ് 7.50 ശതമാനത്തോളം ഇടിഞ്ഞു. ഇരുമ്പയിര് വിലയിലെ ഇടിവ് കാരണം എൻഎംഡിസി ഓഹരി 3 ശതമാനത്തിലധികം ഇടിഞ്ഞു. സീ എന്റർടെയിൻമെന്റ് 3 ശതമാനം ഇടിഞ്ഞു.