ലാഭമുണ്ടാക്കുന്നതിനൊപ്പം ലാഭവിഹിതവും; മുന്‍നിര കമ്പനികളില്‍ 'ഡിവിഡന്റ് രാജാവ്' ഐടിസി തന്നെ; കൂട്ടത്തിലാരൊക്കെ

ലാർജ്കാപ് കമ്പനികളുടെ ഒരു നേട്ടം അസ്ഥിരമായ വിപണിയിൽ കനത്ത ചാഞ്ചാട്ടമില്ലാതെ നിലനിൽക്കും എന്നത് തന്നെയാണ്. ഇതിനൊപ്പം ലാഭവിഹിതവും കൂടിയായാൽ നിക്ഷേപകന് ഇരട്ട നേട്ടം. മികച്ച ഡിവിഡന്റ് യീല്‍ഡുള്ള കമ്പനികള്‍ ലാഭത്തിന്റെ ഒരു ഭാഗം നിക്ഷേപകര്‍ക്ക് നല്‍കും.

ഓഹരികളുടെ വിലയിലുണ്ടാകുന്ന മുന്നേറ്റത്തിനൊപ്പം മികച്ച സമ്പാദ്യം ഉണ്ടാക്കാനും ഇതുവഴി സാധിക്കും. ഇന്ത്യയിലെ മികച്ച 7 കമ്പനികളില്‍ ഉയര്‍ന്ന ഡിവിഡന്റ് യീല്‍ഡുള്ള കമ്പനികളെ നോക്കിയാല്‍ എഫ്എംസിജി കമ്പനിയായ ഐടിസിയാണ് മുന്നിലെന്ന് കാണാം. കൂട്ടത്തിലെ മറ്റ് കമ്പനികളുടെ ഡിവിഡന്റ് പ്രകടനം നോക്കാം.

റിലയന്‍സ് ഇന്‍ഡസ്ട്രീസ്

എണ്ണ, ടെലികോം, റീട്ടെയില്‍ തുടങ്ങി വൈവിധ്യ ബിസിനസുകളുള്ള രാജ്യത്തെ ഏറ്റവും വലിയ കമ്പനികളിലൊന്നാണ് റിലയന്‍സ് ഇന്‍ഡസ്ട്രീസ്. 17.39 ലക്ഷം കോടി രൂപ വിപണി മൂല്യമുള്ള കമ്പനിയുടെ ഡിവിഡന്റ് യീല്‍ഡ് 0.38 ശതമാനമാണ്. 12 മാസത്തിനിടെ 9 രൂപയാണ് റിലയന്‍സ് നല്‍കിയ ലാഭവിഹിതം. 2,656 രൂപയാണ് നിലവിലെ ഓഹരി വില.

ടിസിഎസ്

ടാറ്റ ഗ്രൂപ്പിന് കീഴിലുള്ള ഐടി സേവന,കണ്‍സള്‍ട്ടേഷന്‍ കമ്പനിയാണ് ടാറ്റ കണ്‍സള്‍ട്ടന്‍സി സര്‍വീസ്. 13.87 ലക്ഷം കോടി രൂപ വിപണി മൂല്യമുള്ള ടിസിഎസ് എല്ലാ ത്രൈമാസത്തിലും ലാഭവിഹിതം നല്‍കുന്ന കമ്പനിയാണ്. 12 മാസത്തിനിടെ 117 രൂപയാണ് കമ്പനി ലാഭവിഹിതമായി ഓഹരി ഉടമകള്‍ക്ക് കൈമാറിയത്. 3,824 രൂപയില്‍ വ്യാപാരം നടക്കുന്ന ഓഹരിക്ക് 3.06 ശതമാനമാണ് ഡിവിഡന്റ് യീല്‍ഡ്.

എച്ച്ഡിഎഫ്‌സി ബാങ്ക്

12.74 ലക്ഷം വിപണി മൂല്യമുള്ള രാജ്യത്തെ ഏറ്റവും വലിയ സ്വകാര്യ ബാങ്കാണ് എച്ച്ഡിഎഫ്‌സി ബാങ്ക്. 12 മാസത്തിനിടെ 19 രൂപയാണ് കമ്പനി ലാഭവിഹിതമായി കൈമാറിയത്. 1,607.85 രൂപയില്‍ ലഭ്യമായ ഓഹരിക്ക് 1.14 ശതമാനം ഡിവിഡന്റ് യീല്‍ഡുണ്ട്.

ഐസിഐസിഐ ബാങ്ക്

സ്വകാര്യ ബാങ്കിംഗ് മേഖല ഭരിക്കുന്ന രണ്ടാമത്തെ വലിയ ബാങ്കാണ് ഐസിഐസിഐ ബാങ്ക്. 7 ലക്ഷം കോടി രൂപ വിപണി മൂല്യമുള്ള ബാങ്ക് 8 രൂപയാണ് 12 മാസത്തിനിടെ ലാഭവിഹിതം നല്‍കിയത്. 994.30 രൂപ വിലയുള്ള ഓഹരിയുടെ ഡിവിഡന്റ് യീല്‍ഡ് 0.80 ശതമാനമാണ്.

ഹിന്ദുസ്ഥാന്‍ യൂണിലെവര്‍

മുംബൈ ആസ്ഥാനമായി പ്രവര്‍ത്തിക്കുന്ന ബിട്ടീഷ് ഉടമസ്ഥതയിലുള്ള എഫ്എംസിജി കമ്പനിയാണ് ഹിന്ദുസ്ഥാന്‍ യൂണിലെവര്‍. 6 ലക്ഷം കോടി രൂപ വിപണി മൂല്യമുള്ള കമ്പനിക്ക് 1.58 ശതമാനം ഡിവിഡന്റ് യീല്‍ഡുണ്ട്. 12 മാസത്തിനിടെ 40രൂപ കമ്പനി ലാഭവിഹിതം നല്‍കി. 2,575 രൂപയാണ് ഓഹരി വില.

ഇന്‍ഫോസിസ്

ഐടി കമ്പനിയായ ഇന്‍ഫോസിസ് 6.39 ലക്ഷം കോടി രൂപ വിപണിമൂല്യമുള്ള കമ്പനിയാണ്. 12 മാസത്തിനിടെ 35.50 രൂപ ഇന്‍ഫോസിസ് ലാഭവിഹിതം കൈമാറി. 1,562.90 രൂപയില്‍ ലഭ്യമായ ഓഹരിക്ക് 2.27 ശതമാനം ഡിവിഡന്റ് യീല്‍ഡുണ്ട്.

ഐടിസി

കൊല്‍ക്കത്ത ആസ്ഥാനമായി പ്രവര്‍ത്തിക്കുന്ന ഇന്ത്യന്‍ മള്‍ട്ടി നാഷണല്‍ കമ്പനിയാണ് ഐടിസി. എഫ്എംസിജി, ഹോട്ടല്‍, സോഫ്‌റ്റ്വെയര്‍, അഗ്രി ബിസിനസ് എന്നിങ്ങനെ വൈവിധ്യമാര്‍ന്ന മേഖലയില്‍ കമ്പനിക്ക് ബിനിസിനസ് സാന്നിധ്യമുണ്ട്. 12 മാസത്തിനിടെ 15.50 രൂപയാണ് കമ്പനി ലാഭവിഹിതം നല്‍കിയത്. 455.20 രൂപ വിലയുള്ള ഓഹരി 3.41 ശതമാനം ഡിവിഡന്റ് യീല്‍ഡുണ്ട്.

അറിയിപ്പ്

മുകളിൽ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങൾ എടുക്കും മുൻപ് സാമ്പത്തിക വിദഗ്ധന്റെ നിർദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകൾക്ക് വിധേയമാണ്. സ്വന്തം റിസ്‌കിൽ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തിൽ സംഭവിക്കുന്ന ലാഭനഷ്ടങ്ങൾക്ക് ഗ്രേനിയം ഇൻഫർമേഷൻ ടെക്നോളജീസും ലേഖകനും ഉത്തരവാദികളല്ല.