ഐടിസിയിൽ ഡബിൾ ഡിവിഡന്റ്; എസ്ബിഐ, എയർടെൽ അടക്കം ലാഭവിഹിതം പ്രഖ്യാപിച്ച് 8 മുൻനിര കമ്പനികൾ; എത്ര രൂപ ലഭിക്കും

കമ്പനികളുടെ ലാഭത്തിൽ നിന്നുള്ളൊരു പങ്കാണ് ലാഭവിഹിതമായി ഓഹരി ഉടമകൾക്ക് ലഭിക്കുന്നത്. 2023 സാമ്പത്തിക വർഷത്തിലെ അവസാന പാദ റിസൾട്ടും പുറത്ത് വന്നതോടെ പല കമ്പനികളും ലാഭവിഹിതം പ്രഖ്യാപിച്ചിട്ടുണ്ട്. മികച്ച ലാഭവിഹിതം നൽകുന്ന കമ്പനികളുടെ ഓഹരികൾ കയ്യിലുണ്ടെങ്കിൽ മികച്ച വരുമാനമാണ് നിക്ഷേപകനെ കാത്തിരിക്കുന്നത്.

മികച്ച പാദഫലമായതിനാൽ സമീപ ഭാവിയിൽ ഉയരാൻ സാധ്യതയുണ്ടെന്ന് ബ്രോക്കറേജുകൾ ചൂണ്ടിക്കാട്ടിയ ഓഹരികളാണ് ഭൂരിഭാ​ഗവും. അതിനാൽ ഇവ വാങ്ങിയിടുന്നത് ഹ്രസ്വകാലം കൊണ്ട് ലാഭവിഹിതവും മൂലധന നേട്ടവും ലഭിക്കാൻ കാരണമാകും. ഐടിസി, എസ്ബിഐ, ഭാരതി എയർടെൽ, ബാങ്ക് ഓഫ് ബറോഡ, പവർ ഗ്രിഡ് കോർപ്പറേഷൻ തുടങ്ങിയ 9 ലാർജ് കാപ് കമ്പനികൾ ഈയിടെ ലാഭവിഹിതം പ്രഖ്യാപിച്ചിട്ടുണ്ട്, ഇവ വിശദമായി നോക്കാം.

ഐടിസി ലിമിറ്റഡ്

മുൻനിര എഫ്എംസിജി കമ്പനിയായ ഐടിസി ലിമിറ്റഡ് രണ്ട് ലാഭവിഹിതമാണ് ഈയിടെ പ്രഖ്യാപിച്ചത്. 2023 മാർച്ച് 31 ന് അവസാനിച്ച സാമ്പത്തിക വർഷത്തിൽ ഐടിസി പ്രതിയോഹരി 6.75 രൂപ അന്തിമ ലാഭവിഹിതവും 2.75 രൂപ പ്രത്യേക ലാഭവിഹിതവും പ്രഖ്യാപിച്ചു. റെക്കോർഡ് തീയതി മേയ് 30 ആണ്. 2023 സാമ്പത്തിക വർഷത്തിൽ 15.50 രൂപയാണ് ആകെ ലാഭവിഹിതം നൽകിയത്. 

എസ്ബിഐ

2023 സാമ്പത്തിക വർഷത്തിൽ എസ്ബിഐ 1 രൂപ മുഖ വിലയുള്ള ഓഹരിക്ക് 1130 ശതമാനം ലാഭവിഹിതം പ്രഖ്യാപിച്ചിട്ടുണ്ട്. 11.30 രൂപ ലാഭവിഹിതം ലഭിക്കും. പേയ്‌മെന്റ് തീയതി ജൂൺ 14-ന് ആണ്.

ഭാരത് എയർടെൽ

നാലാം പാദഫലത്തിന് ശേഷം ഭാരതി എയർടെൽ ബോർഡ് പ്രതിയോഹരി ഓഹരിക്ക് 4 രൂപ അന്തിമ ലാഭവിഹിതം നൽകാൻ ശുപാർശ ചെയ്തിട്ടുണ്ട്. കഴിഞ്ഞ 12 മാസങ്ങൾക്കിടെ എയർടെൽ 3 രൂപയാണ് ലാഭവിഹിതം നൽകിയത്. 805.75 രൂപ വിലയുള്ള ഓഹരികൾക്ക് 0.37 ശതമാനമാണ് ഡിവിഡന്റ് യീൽഡ്. 

ബാങ്ക് ഓഫ് ബറോഡ

നാലാം പാദഫലത്തിന് ശേഷം ഓഹരിക്ക് 5.50 രൂപയാണ് ബാങ്ക് ഓഫ് ബറോഡ അന്തിമ ലാഭവിഹിതം നൽകുന്നത്. ഇതിനുള്ള റെക്കോർഡ് തീയതിയായി ജൂൺ 30 ആണ് നിശ്ചയിച്ചിട്ടുള്ളത്. ഈ തീയതിക്ക് മുൻപ് ഓഹരികൾ വാങ്ങിയവർക്ക് ലാഭവിഹിതത്തിന് അർഹതയുണ്ടാകും. 12 മാസത്തിനിടെ 2.85 രൂപയാണ് ബാങ്ക് ലാഭവിഹിതം നൽകിയത്. 181.90 രൂപ വിലയുള്ള ഓഹരിയുടെ ഡിവിഡന്റ് യീൽഡ് 1.57 ശതമാനാമണ്. 

ജിൻഡാൽ സ്റ്റീൽ

മുൻനിര സ്റ്റീൽ കമ്പനിയായ ജിൻഡാൽ സ്റ്റീൽ 2022-23 സാമ്പത്തിക വർഷത്തിൽ 1 രൂപ മുഖവിലയുള്ള ഓരോ ഇക്വിറ്റി ഷെയറിനും 2 രൂപയാണ് അന്തിമ ലാഭവിഹിതം നൽകുന്നത്. 12 മാസത്തിനിടെ 2 രൂപ ലാഭവിഹിതമാണ് കമ്പനി നൽകിയത്. 522.40 രൂപ വിലയുള്ള ഓഹരിയുടെ ഡിവിഡന്റ് യീൽഡ 0.38 ശതമാനമാണ്.

പവർ ഗ്രിഡ് കോർപ്പറേഷൻ

പവർ ഗ്രിഡ് കോർപ്പറേഷൻ മാർച്ചിൽ അവസാനിച്ച സാമ്പത്തിക വർഷത്തിൽ ഒരു ഓഹരിക്ക് 4.75 രൂപ അന്തിമ ലാഭവിഹിതം ശുപാർശ ചെയ്തിട്ടുണ്ട്. 12 മാസത്തിനിടെ 12.25 രൂപ കമ്പനി ലാഭവിഹിതം നൽകി കഴിഞ്ഞു. ഡിവിഡന്റ് യീൽഡ് 5.24 ശതമാനം. 

എൻടിപിസി

എൻടിപിസി 2023 സാമ്പത്തിക വർഷത്തിൽ അന്തിമ ലാഭവിഹിതമായി പ്രതിയോഹരി 3 രൂപ നൽകും. 12 മാസത്തിനിടെ 7.25 രൂപ ലാഭവിഹിതം കമ്പനി നൽകിയിട്ടുണ്ട്. 173.30 രൂപ വിലയുള്ള ഓഹരിക്ക് 4.18 ശതമാനമാണ് ഡിവിഡന്റ് യീൽഡ്.

അറിയിപ്പ്

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നല്‍കുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.