നൂതന ആശയങ്ങളോ പ്രോട്ടോടൈപ്പോ സ്വന്തമായുണ്ടോ, സഹായിക്കാന്‍ കേരള സ്റ്റാര്‍ട്ടപ്പ് മിഷനുണ്ട്

തിരുവനന്തപുരം: പ്രോട്ടോടൈപ്പോ നൂതന ആശയങ്ങളോ സ്വന്തമായുള്ള സ്റ്റാര്‍ട്ടപ്പുകളെയോ വ്യക്തികളെയോ സഹായിക്കാന്‍ കേരള സ്റ്റാര്‍ട്ടപ്പ് മിഷന്‍ (കെഎസ്‌യുഎം) നടത്തുന്ന പ്രത്യേക പ്രോഗ്രാമിലേക്ക് അപേക്ഷ ക്ഷണിച്ചു. മുന്നോട്ടുവയ്ക്കുന്ന ആശയങ്ങള്‍ വിലയിരുത്തി ബിസ്‌നസ് സാധ്യത വിലയിരുത്തി അന്തിമ ഘട്ടത്തിലെ പരാജയം ഒഴിവാക്കുകയാണ് ഫെയില്‍ ഫാസ്റ്റ് ഓര്‍ സക്‌സീഡ് എന്ന പരിപാടിയുടെ ലക്ഷ്യം.

തിരഞ്ഞെടുക്കപ്പെടുന്ന സ്റ്റാര്‍ട്ടപ്പുകള്‍ക്കും വ്യക്തികള്‍ക്കും സ്റ്റാര്‍ട്ടപ്പ് സ്ഥാപകര്‍ മാര്‍ഗനിര്‍ദ്ദേശങ്ങള്‍ സാമ്പത്തിക വിദഗ്ദര്‍ എന്നിവരുമായി ചര്‍ച്ച നടത്തി ആശയങ്ങളുടെ ബിസ്‌നസ് സാധ്യത വിലയിരുത്തുന്നതിനുള്ള അവസരം ലഭിക്കും. സ്റ്റാര്‍ട്ടപ്പുകളെ ശാസ്ത്രീയമായി മുന്നോട്ട് കൊണ്ടുപോകാന്‍ സഹായിക്കുന്ന നിരവധി സെഷനുകള്‍ പരിപാടിയില്‍ ഉണ്ടാകും.

നൂതന ആശയങ്ങളുള്ള സ്റ്റാര്‍ട്ടപ്പുകളെ മിനിമം മൂല്യങ്ങളുള്ള ഉത്പന്നങ്ങള്‍ എന്ന ഘട്ടത്തിലേക്ക് എത്തിച്ച് നിക്ഷേപം, സാമ്പത്തിക സഹായം എന്നിവ ലഭ്യമാക്കാന്‍ പ്രാപ്തരാക്കുന്നതാണ് പരിപാടി. മൂന്ന് മാസം കാലാവധിയില്‍ നടത്തുന്ന പരിപാടി സൗജന്യമായാണ് സംഘടിപ്പിക്കുക. കൊവിഡ് സാഹചര്യം നിലനില്‍ക്കുന്നതിനാല്‍ തിരഞ്ഞെടുക്കപ്പെടുന്നവര്‍ക്കുള്ള പ്രോഗ്രാം ഫീസ് സബ്‌സിഡിയായി സര്‍ക്കാര്‍ നല്‍കും. വ്യക്തിഗത മെന്റിംഗും പരിപാടിയുടെ ഭാഗമായിരിക്കും.