കേരളത്തില്‍ നിന്ന് ഒരു സ്ഥാപനം കൂടി ഓഹരി വിപണിയിലേക്ക്... കിംസ് ഹെല്‍ത്ത്! ഐപിഒ അടുത്ത വര്‍ഷം

തിരുവനന്തപുരം: കേരളത്തില്‍ നിന്ന് ഒരു സ്ഥാപനം കൂടി ഓഹരി വിപണിയിലേക്ക് ഇറങ്ങുകയാണ്. നിലവില്‍ കേരളത്തില്‍ നിന്നുള്ള 25 ഓളം സ്ഥാപനങ്ങള്‍ ആണ് ഓഹരി വിപണിയില്‍ ലിസ്റ്റ് ചെയ്തിട്ടുള്ളത്.

പുതിയ കാല്‍പയ്പിനൊരുങ്ങുന്നത് കിംസ് ഹെല്‍ത്ത് ആണ്. തിരുവനന്തപുരത്ത് തുടക്കമിട്ട കിംസ് ആശുപത്രി ഇന്ന് പലരാജ്യങ്ങളില്‍ പടര്‍ന്നുകിടക്കുന്ന ഹെല്‍ത്ത് കെയര്‍ ശൃംഖലയാണ്. അടുത്ത സാമ്പത്തിക വര്‍ഷമായിരിക്കും ഐപിഒ ഉണ്ടാവുക. വിശദാംശങ്ങള്‍...

കിംസ്

കേരളത്തിലെ പ്രമുഖ മള്‍ട്ടി സ്‌പെഷ്യാലിറ്റി ആശുപത്രികളില്‍ ഒന്നാണ് കിംസ്. കേരള ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസ് എന്നതിന്റെ ചുരുക്കമാണ് കിംസ്. ഇന്ന് കേരളത്തിലെ എണ്ണംപറഞ്ഞ ആശുപത്രി ശൃംഖലകളില്‍ ഒന്നാണ് കിംസ്.

ഹെല്‍ത്ത് കെയര്‍ ശൃംഖല

തിരുവനന്തപുരത്തെ കുമാരപുരത്താണ് കിംസിന്റെ ആസ്ഥാനം. കേരളത്തില്‍ തിരുവനന്തപുരത്തിന് പുറമേ കൊല്ലം, പെരിന്തല്‍മണ്ണ, കോട്ടയം എന്നിവിടങ്ങളിലാണ് മറ്റ് ആശുപത്രികള്‍ ഉള്ളത്. ആശുപത്രികളെ കൂടാതെ മെഡിക്കല്‍ സെന്ററുകളും ക്ലിനിക്കുകളും ലാബുകളും എല്ലാം കിംസിന് കീഴിലുണ്ട്.

ഐപിഒ

കിംസിന് കീഴിലുള്ള എല്ലാ സംരഭങ്ങളേയും ഒരുമിച്ചാക്കി കിംസ് ഹെല്‍ത്ത് എന്ന പേരില്‍ പുതിയ ബ്രാന്‍ഡ് ആയി മാറിക്കഴിഞ്ഞിട്ടുണ്ട് ഇപ്പോള്‍ തന്നെ. അടുത്ത സാമ്പത്തിക വര്‍ഷം ഐപിഒ വഴി ഓഹരി വിപണിയില്‍ ലിസ്റ്റ് ചെയ്യാനാണ് ലക്ഷ്യമിടുന്നത്. ഇതിന്റെ പ്രവര്‍ത്തനങ്ങള്‍ നടന്നുവരികയാണ്.

രണ്ടായിരം കിടക്കകള്‍

2002 ല്‍ ആയിരുന്നു തിരുവനന്തപുരത്തെ കുമാരപുരത്ത് കിംസ് ആശുപത്രിയുടെ പ്രവര്‍ത്തനം പൂര്‍ണതോതില്‍ ആരംഭിച്ചത്. 18 വര്‍ഷം കൊണ്ട് വിവിധ സ്ഥലങ്ങളില്‍ (ഗള്‍ഫിലേത് ഉള്‍പ്പെടെ) തുടങ്ങിയ ആശുപത്രികളും മെഡിക്കല്‍ സെന്ററുകളും ഉള്‍പ്പെടെ രണ്ടായിരം കിടക്കകള്‍ ആണ് കിംസ് ഹെല്‍ത്തിന് കീഴില്‍ ഇപ്പോഴുള്ളത്.

ഡോ എംഐ സഹദുള്ള

ഡോ എംഐ സഹദുള്ളയുടെ നേതൃത്വത്തിലാണ് കിംസ് എന്ന ഹെല്‍ത്ത് കെയര്‍ ശൃംഘലയുടെ തുടക്കം. കേരളത്തിലെ മെഡിക്കല്‍ കോളേജുകളില്‍ അധ്യാപകനായിരുന്ന ഡോ സഹദുള്ള പിന്നീട് പല വിദേശരാജ്യങ്ങളും ജോലി ചെയ്ത് തിരികെയെത്തിയാണ് കിംസിന് തുട്കമിടുന്നത്.