ഒരു വർഷത്തിനിടെ മൾട്ടിബാഗർ റിട്ടേൺ; ഇനി ഓഹരി ഇരട്ടിക്കും; ബോണസ് ഇഷ്യൂ പ്രഖ്യാപിച്ച ഓഹരി കയ്യിലുണ്ടോ

കമ്പനികളുടെ കോർപ്പറേറ്റ് നടപടികളിലൊന്നാണ് ബോണസ് ഓഹരി. കമ്പനികൾ ബിസിനസിൽ നിന്നുണ്ടാക്കുന്ന ലാഭത്തിന്റെ ഒരു പങ്ക് നിക്ഷേപകരുമായി പങ്കിടാനാണ് പൊതുവെ ലാഭവിഹിതവും ബോണസ് ഓഹരികളും പ്രഖ്യാപിക്കുന്നത്. പണമായി ലാഭവിഹിതം നൽകാൻ സാധിക്കാത്ത സാഹചര്യത്തിലാണ് സൗജന്യ ഓഹരികൾ നൽകുന്നതിനായി കമ്പനികൾ ബോണസ് ഓഹരികൾ പ്രഖ്യാപിക്കുന്നത്.

സ്മോൾകാപ് ഐടി കമ്പനിയായ ആൽഫലോജിക് ടെക്‌സിസ് ലിമിറ്റഡാണ് ബോണസ് ഇഷ്യു പ്രഖ്യാപിച്ചിട്ടുള്ളത്. ഒരു വർഷത്തിനിടെ ഓഹരി ഉടമകൾക്ക് 112 ശതമാനം മൾട്ടിബാ​ഗർ റിട്ടേൺ സമ്മാനിച്ച ഓഹരി കൂടിയാണ് ആൽഫലോ​ഗിക് ടെക്സിസ്. 1:3 അനുപാതത്തിലാണ് കമ്പനി ബോണസ് ഓഹരികൾ നൽകുന്നത്. ഇതിനുള്ള റെക്കോർഡ് തീയതി നേരത്തെ ഡിസംബർ 15 ആയിരുന്നു. ഈ തീയതിയിലും കമ്പനി മാറ്റം വരുത്തി.

ആൽഫലോജിക് ടെക്‌സിസ്

പൂനെ ആസ്ഥാനമായി പ്രവർത്തിക്കുന്ന ഐടി കമ്പനിയാണ് ആൽഫലോജിക് ടെക്സിസ്. ഐടി, കൺസൾട്ടിംഗ് സേവനങ്ങളാണ് കമ്പനി വാ​ഗ്ദാനം ചെയ്യുന്നത്. പ്രെഡിക്റ്റീവ് അനലിറ്റിക്‌സ്, ഡാറ്റ വെയർഹൗസിംഗ് ആൻഡ് ബിഐ, ക്ലൗഡ് കൺസൾട്ടിംഗ്, വെബ്, മൊബൈൽ ആപ്ലിക്കേഷൻ ഡെവലപ്‌മെന്റ് തുടങ്ങിയ കമ്പനിയുടെ ബിസിനസിൽ ഉൾപ്പെടുന്നു. 292 കോടി രൂപ വിപണി മൂല്യമുള്ള കമ്പനിയുടെ ആസ്ഥാനം പൂനെയാണ്.

ബോണസ് ഓഹരി

2023 നവംബർ 7 ന് ചേർന്ന ആൽഫലോജിക് ടെക്‌സിസിന്റെ ഡയറക്‌ടർ ബോർഡ് യോ​ഗത്തിലാണ് കമ്പനി ബോണസ് ഇഷ്യുവിന് അം​ഗീകാരം നൽകിയത്. 1:3 എന്ന അനുപാതത്തിലാണ് ബോണസ് ഷെയർ ഇഷ്യൂ ചെയ്യുന്നത്. അതായത് ആൽഫലോജിക് ടെക്‌സിസിന്റെ 5 രൂപ മുഖവിലയുള്ള മൂന്ന് ഓഹരികൾ കയ്യിലുള്ളവർക്ക് 5 രൂപ മുഖവിലയുള്ള ഒരു ഓഹരി സൗജന്യമായിലഭിക്കും. 30 ഓഹരികൾ കയ്യിലുള്ളവർക്ക് 10 എണ്ണം സൗജന്യമായി സ്വന്തമാക്കാം.

നേരത്തെ ബോണസ് ഇഷ്യുവിനുള്ള റെക്കോർഡ് തീയതിയായി ഡിസംബർ 15 വെള്ളിയാഴ്ചയാണ് നിശ്ചയിച്ചിരുന്നത്. ബോണസ് ഇഷ്യു അം​ഗീകാരം സംബന്ധിച്ച് സാങ്കേതിക പ്രശ്നം നിലനിൽക്കുന്നതിനാൽ റെക്കോർ‍ഡ് തീയതി ഡിസംബർ 22 വെള്ളിയാഴ്ചയിലേക്ക് മാറ്റുന്നതായി കമ്പനി സ്റ്റോക്ക് എക്സ്ചേഞ്ച് ഫയലിംഗിൽ വ്യക്തമാക്കി. അതായത് ഡിസംബർ 22 ന് ആൽഫലോജിക് ടെക്‌സിസിന്റെ ഓഹരികൾ കയ്യിലുള്ള നിക്ഷേപകർക്ക് ബോണസ് ഓഹരി ലഭിക്കും.

ഓഹരി പ്രകടനം

ആല്‍ഫലോജിക് ടെക്സിസ് ഓഹരികള്‍ ബുധനാഴ്ച 2 ശതമാനം ഉയര്‍ന്ന് 83.18 രൂപയിലാണ് ക്ലോസ് ചെയ്തത്. 2023ല്‍ ഓഹരികള്‍ 118 ശതമാനത്തിന്റെ റിട്ടേണാണ് ഇതുവരെ നല്‍കിയത്. ഒരു വര്‍ഷത്തിനിടെ117.18ശതമാനം ഉയര്‍ന്ന ഓഹരികള്‍ 3 മാസ കാലയളവിനിടെ 44.91 ശതമാനവും ഉയര്‍ന്നു. 83.18 രൂപയാണ് ഓഹരിയുടെ 52 ആഴ്ചയിലെ ഉയര്‍ന്ന വില. 25.03 രൂപയാണ് 52 ആഴ്ചയിലെ താഴ്ന്ന നിലവാരം.

സാമ്പത്തികം

സെപ്തംബർ 30 ന് അവസാനിച്ച പാദത്തിൽ ആൽഫലോജിക് ടെക്‌സിസിന്റെ വിൽപ്പന മെച്ചപ്പെട്ടു. 2022 സെപ്റ്റംബറിലെ 4.14 കോടിയിൽ നിന്ന് 202.21 ശതമാനം വർധിച്ച് 12.51 കോടി രൂപയായിരുന്നു രണ്ടാം പാദത്തിലെ വിൽപ്പന. 2023 സെപ്റ്റംബറിൽ 1.30 കോടി രൂപയുടെ ത്രൈമാസ അറ്റാദായവും കമ്പനി നേടി. കഴിഞ്ഞ വർഷം ഇതേ കാലയളവിൽ 52 ലക്ഷമായിരുന്നു ലാഭം. 147.37 ശതമാനത്തിന്റെ വർധനവാണിത്.

ആൽഫലോജിക് ടെക്‌സിസിന്റെ ഇബിഐടിജിഎ രണ്ടാം പാദത്തിൽ 2.58 കോടി രൂപയായി കുതിച്ചു. കമ്പനിയുടെ പ്രതിയോഹരി വരുമാനം 2022 സെപ്റ്റംബറിലെ 0.15 രൂപയിൽ നിന്ന് 2023 സെപ്റ്റംബറിൽ 0.51 രൂപയുടെ വർധിച്ചു.

അറിയിപ്പ്

മുകളില്‍ കൊടുത്തിരിക്കുന്ന ലേഖനം വിവിധ സ്ഥാപനങ്ങള്‍ പുറത്തിറക്കിയ റിപ്പോര്‍ട്ടുകളെ അടിസ്ഥാനപ്പെടുത്തിയും പഠനാവശ്യത്തിന് മാത്രമായും നല്‍കുന്നതുമാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.