രണ്ട് ദിവസത്തെ നേട്ടം കൈവിട്ട് വിപണി; നിഫ്റ്റി റെക്കോർഡ് ഉയരത്തിൽ നിന്ന് താഴേക്ക്; ഇന്നത്തെ ഇടിവിന് കാരണമെന്ത്

വിവിധ സാമ്പ്ത്തിക ഡാറ്റയ്ക്ക് മുന്നോടിയായി നിക്ഷേപകർ ജാ​ഗ്രത പാലിച്ചതിന് പിന്നാലെ ആഭ്യന്തര സൂചികകൾ രണ്ട് ദിവസത്തെ നേട്ടം കൈവിട്ടു. ചൊവ്വാഴ്ച വ്യാപാരത്തിനിടെ 21,037.90 ല്‍ പുതിയ ഉയരം കുറിച്ച നിഫ്റ്റിക്ക് നേട്ടം നിലനിര്‍ത്താനായില്ല. 91 പോയിന്റ് നഷ്ടത്തോടെ 20,96.40 ലാണ് സൂചിക വ്യാപാരം അവസാനിപ്പിച്ചത്. സെന്‍സെക്‌സ് 378 പോയിന്റ് ഇടിഞ്ഞ് 69,511.03 ലും ക്ലോസ് ചെയ്തു. രണ്ടാം പകുതിയിലെ ലാഭമെടുപ്പാണ് വിപണിയെ നഷ്ടത്തിലേക്ക് തള്ളിയിട്ടത്.

ബിപിസിഎൽ, അപ്പോളോ ഹോസ്പിറ്റൽസ്, മാരുതി സുസുക്കി, സൺ ഫാർമ, ഐഷർ മോട്ടോഴ്‌സ് എന്നിവ നിഫ്റ്റിയിൽ നഷ്ടത്തിൽ ക്ലോസ് ചെയ്തു. എച്ച്‌ഡിഎഫ്‌സി ലൈഫ്, അൾട്രാടെക് സിമന്റ്, ബജാജ് ഓട്ടോ, എസ്ബിഐ ലൈഫ് ഇൻഷുറൻസ്, ആക്‌സിസ് ബാങ്ക് എന്നിവ നേട്ടമുണ്ടാക്കി. മെറ്റൽ ഒഴികെ എല്ലാ സെക്ടറൽ സൂചികകളും നഷ്ടത്തിൽ ക്ലോസ് ചെയ്തു.

ക്യാപിറ്റൽ ​ഗുഡ്സ്, ഓയിൽ ആൻഡ് ​ഗ്യാസ്, പവർ, റിയൽറ്റി എന്നിവ 1 ശതമാനം വീതം ഇടിഞ്ഞു. ബിഎസ്ഇ മിഡ്കാപ് സൂചിക 0.4 ശതമാനവും സ്മോൾകാപ് സൂചിക 0.2 ശതമാനവും ഇടിഞ്ഞു.

ശ്രദ്ധേയമായ ഓഹരികൾ

ഐആർഇഡിഎ ലിസ്റ്റ് ചെയ്ത് 10 ദിവസത്തിനുള്ളിൽ ഐപിഒ വിലയിൽ നിന്ന് മൂന്ന് മടങ്ങ് നേട്ടമുണ്ടാക്കി. ഓഹരി ചൊവ്വാഴ്ച 20 ശതമാനം ഉയർന്ന അപ്പർസർക്യൂട്ട് പരിധിയായ 102 രൂപയിലെത്തി. ബ്ലോക്ക് ഡീൽ നടന്ന മാൻകൈൻഡ് ഫാർമ ഏകദേശം 4 ശതമാനം ഇടിഞ്ഞു
എച്ച്‌ഡിഎഫ്‌സി ലൈഫ് 5 ശതമാനത്തിലധികം ഉയർന്നു. രണ്ടാം പാദഫലത്തിന് പിന്നാലെ സ്‌പൈസ്‌ജെറ്റ് 5 ശതമാനം ഇടിഞ്ഞു.

അലംബിക്, ബിഎൽഎസ് ഇന്റർനാഷണൽ, സെഞ്ച്വറി പ്ലൈബോർഡ്, ഇക്വിറ്റാസ് ബാങ്ക്, എച്ച്‌ഡിഎഫ്‌സി ലൈഫ്, ഹൈഡൽബർഗ് സിമന്റ്, ഹഡ്‌കോ, ഇൻഫിബീം അവന്യൂ, ഐനോക്‌സ് ഗ്രീൻ, ജിൻഡാൽ സ്റ്റീൽ, ജമ്മു ആൻഡ് കാശ്മീർ ബാങ്ക്, കെപിഐ ഗ്രീൻ, മിഷ്‌ടാൻ ഫുഡ്‌സ് എന്നിങ്ങനെ 400 ഓളം ഓഹരികൾ 52 ആഴ്ചയിലെ ഉയർന്ന നിലവാരത്തിലെത്തി.

ഇടിവിന് കാരണം

മുന്‍നിര ഓഹരികളില്‍ നിക്ഷേപകര്‍ ലാഭമെടുത്തതും വരാനിരിക്കുന്ന ആഗോള ആഭ്യന്തര ഡാറ്റയ്ക്ക് മുന്നോടിയായി നിക്ഷേപകരുടെ ജാഗ്രതയുമാണ് ചൊവ്വാഴ്ച വിപണിയെ നഷ്ടത്തിലേക്ക് തള്ളിയിട്ടത്. നംവബര്‍ മാസത്തെ ഉപഭോക്തൃ വില സൂചിക അടിസ്ഥാനമക്കിയുള്ള പണപ്പെരുപ്പ കണക്കുകള്‍ ചൊവ്വാഴ്ച പുറത്തു വരും.

പച്ചക്കറി വില വര്‍ധനവിന്റെ സ്വാധീനത്തില്‍ നംവബറിലെ റീട്ടെയില്‍ പണപ്പെരുപ്പം 6 ശതമാനമായി ഉയരാമെന്നാണ് പ്രതീക്ഷിക്കുന്നത്. ഒക്ടോബറില്‍ 4.87 ശതമാനമായിരുന്നു പണപ്പെരുപ്പം. ഇന്‍ഡസ്ട്രിയല്‍ പ്രൊഡക്ഷന്‍ പ്രിന്റ്, അമേരിക്കയിലെ പണപ്പെരുപ്പ ഡാറ്റ, ഫെഡറല്‍ റിസര്‍വ് യോഗ തീരുമാനം എന്നിവയ്ക്കായി നിക്ഷേപകര്‍ കാത്തിരിക്കുകയാണ്.