ലാഭകരമാകുന്നൊരു ഐപിഒ; 39-41 രൂപ പ്രൈസ് ബാൻഡിൽ അപേക്ഷിക്കാം; ഓഹരി 20 രൂപ പ്രീമിയത്തിൽ

ഈ ആഴ്‌ചയിൽ ഒരു മെയിൻബോർഡ് ഐപിഒയും അഞ്ച് എസ്എംഇ ഐപിഒകളുമായി വിപണി തിരക്കിലാണ്. അതോടൊപ്പമാണ് കഴിഞ്ഞ വാരം സബ്സ്ക്രിപ്ഷൻ പൂർത്തിയായ കമ്പനികളുടെ ലിസ്റ്റിം​ഗും. തിരക്കുള്ള ഈ ആഴ്ചയിൽ നോവ അ​ഗ്രിടെക് ആണ് വിപണിയിലെ ഏക മെയിൻ ബോർഡ് ഐപിഒ. ചൊവ്വാഴ്ച സബ്സ്ക്രിപ്ഷൻ ആരംഭിച്ച ഐപിഒയുടെ ​ഗ്രേ മാർക്കറ്റ് പ്രീമിയം ഉയർന്ന് നിൽക്കുകയാണ്. നിക്ഷേപകർ ശ്രദ്ധിക്കേണ്ട കാര്യങ്ങൾ നോക്കാം.

നോവ അ​ഗ്രിടെക്

ഹൈദരാബാദ് ആസ്ഥാനമായി പ്രവർത്തിക്കുന്ന അ​ഗ്രിടെക് കമ്പനിയാണ് നോവ അ​ഗ്രിടെക്. വിള സംരക്ഷണം, വിള പോഷണം, മണ്ണിന്റെ ആരോഗ്യ പരിപാലനം എന്നിവയിൽ കമ്പനി സ്പെഷ്യലൈസ് ചെയ്യുന്നു. ഗവേഷണത്തിലും വികസനത്തിലും ശ്രദ്ധ കേന്ദ്രീകരിച്ച് പോഷകാഹാര സന്തുലിതവും പരിസ്ഥിതി സുസ്ഥിരവുമായ ഉൽപ്പന്നങ്ങൾ നൽകാൻ സാങ്കേതികവിദ്യാധിഷ്ഠിത സേവനങ്ങളാണ് കമ്പനി നൽകുന്നത്.

നോവ അ​ഗ്രിടെക് ഐപിഒ

143.81 കോടി രൂപ പ്രാരംഭ ഓഹരി വിൽപ്പനയിലൂടെ സമാഹരിക്കാനാണ് നോവ അ​ഗ്രിടെക് ലക്ഷ്യമിടുന്നത്. ഇതിൽ 112 കോടി രൂപയുടെ പുതിയ ഇഷ്യൂവും ബാക്കിയുള്ള 31.81 കോടി രൂപയുടെ ഓഫർ ഫോർ സെയിലും ഉൾപ്പെടും. ചൊവ്വാഴ്ച ആരംഭിച്ച ഐപിഒ സബ്സ്ക്രിപ്ഷൻ ജനുവരി 25 വരെ നീണ്ട് നിൽക്കും. സബ്‌സ്‌ക്രിപ്‌ഷനായി തുറക്കുന്നതിന് ഒരു ദിവസം മുൻപ് കമ്പനി ആങ്കർ നിക്ഷേപകരിൽ നിന്ന് 43.14 കോടി രൂപ സമാഹരിച്ചിരുന്നു.

നോവ അ​ഗ്രിടെക് ഐപിഒയിൽ 50 ശതമാനം ഓഹരികൾ ക്വാളിഫൈഡ് ഇൻസ്റ്റിറ്റ്യൂഷനൽ ബയർമാർക്കായി മാറ്റിവെച്ചിട്ടുണ്ട്. 15% ഇൻസ്റ്റിറ്റ്യൂഷണൽ സ്ഥാപന നിക്ഷേപകർക്കും 35 ശതമാനം കുറയാത്തത് റീട്ടെയിൽ നിക്ഷേപകർക്കായും നീക്കിവച്ചിട്ടുണ്ട്.

ഐപിഒ വില നിലവാരം

39- 41 രൂപ നിലവാരത്തിലാണ് നോവ അ​ഗ്രിടെക് ഐപിഒ പ്രൈസ് ബാൻഡ് നിശ്ചയിച്ചിട്ടുള്ളത്. 365 ഓഹരികൾ അടങ്ങുന്ന ഒരു ലോട്ട് മുതൽ നിക്ഷേപിക്കാം. തുടർന്ന് 365 ഓഹരികളുടെ ഗുണിതങ്ങളായി അപേക്ഷിക്കാം. കുറഞ്ഞത് 14,965 രൂപ നിക്ഷേപത്തിനായി ആവശ്യമാണ്. ഷെയർ അലോക്കേഷൻ ജനുവരി 29 ന് അന്തിമമാക്കും. ശേഷം ജനുവരി 31 ന് കമ്പനി ബിഎസ്ഇയിലും എൻഎസ്ഇയിലും ലിസ്റ്റ് ചെയ്യും

​ഗ്രേ മാർക്കറ്റിൽ പ്രീമിയം

നോവ അ​ഗ്രിടെക് ഓഹരികൾ ഗ്രേ മാർക്കറ്റിൽ പ്രീമിയത്തിലാണ് വ്യാപാരം നടക്കുന്നത്. ഐപിഒവാച്ച് വെബ്സൈറ്റ് പ്രകാരം ഗ്രേ മാർക്കറ്റിൽ നോവ അഗ്രിടെക് ഓഹരി 20 രൂപ പ്രീമിയത്തിലാണുള്ളത്. ഐ‌പി‌ഒ പ്രൈസ് ബാൻഡിന്റെ ഉയർന്ന വിലയും ഗ്രേ മാർക്കറ്റിലെ നിലവിലെ പ്രീമിയവും കണക്കിലെടുക്കുമ്പോൾ നോവ അഗ്രിടെക് ഓഹരി 61 രൂപയിൽ ലിസ്റ്റ് ചെയ്യാനുള്ള സാധ്യതയുണ്ട്. ഇത് ഐ‌പി‌ഒ വിലയായ 41രൂപയേക്കാൾ 48.78 ശതമാനത്തിന്റെ വർധനവാണ്.

നിക്ഷേപകർ ശ്രദ്ധിക്കാൻ

നോവ അ​ഗ്രിടെകിന്റെ അടിസ്ഥാന കാര്യങ്ങൾ കൂടി പരി​ഗണിച്ച ശേഷം മാത്രമെ നിക്ഷേപിക്കാൻ പാടുള്ളൂ. ചില സാമ്പത്തിക വർഷങ്ങളിൽ കമ്പനിക്ക് നെഗറ്റീവ് പണമൊഴുക്ക് ഉണ്ടായിരുന്ന കാര്യം നിക്ഷേപകർ പരി​ഗൻിക്കണം. സുസ്ഥിരമായ നെഗറ്റീവ് പണമൊഴുക്ക് ബിസിനസ്, സാമ്പത്തിക സ്ഥിതി, പ്രവർത്തന ഫലങ്ങൾ എന്നിവയെ പ്രതികൂലമായി ബാധിക്കും. കമ്പനിക്ക് കാര്യമായ പ്രവർത്തന മൂലധന ആവശ്യകതയുണ്ട്. ഭാവിയിൽ അധിക മൂലധനവും ധനസഹായവും ആവശ്യമായി വന്നേക്കാം.

ഡീലർമാരുടെ പേയ്‌മെന്റിൽ വീഴ്ച വരുത്തുകയോ കാലതാമസമോ ബിസിനസിനെയും സാമ്പത്തിക പ്രവർത്തനത്തെയും പ്രതികൂലമായി ബാധിക്കും. കാർഷിക മേഖലയോടുള്ള സർക്കാർ നയങ്ങളിൽ വരുന്ന മാറ്റങ്ങൾ, കർഷകർക്ക് നൽകുന്ന സബ്‌സിഡികളും പ്രോത്സാഹനങ്ങളും കുറയ്ക്കുന്നത് എന്നിവ ബിസിനസിനെയും പ്രവർത്തന ഫലങ്ങളെയും ബാധിക്കും.

അറിയിപ്പ്

മുകളിൽ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങൾ എടുക്കും മുൻപ് സാമ്പത്തിക വിദഗ്ധന്റെ നിർദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകൾക്ക് വിധേയമാണ്. സ്വന്തം റിസ്‌കിൽ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തിൽ സംഭവിക്കുന്ന ലാഭനഷ്ടങ്ങൾക്ക് ഗ്രേനിയം ഇൻഫർമേഷൻ ടെക്നോളജീസും ലേഖകനും ഉത്തരവാദികളല്ല.