നിങ്ങളുടെ പാൻ കാർഡ് ഈ തീയതി മുതൽ പ്രവർത്തനരഹിതമാവും: നികുതി വകുപ്പിൻ്റെ പുതിയ വിജ്ഞാപനം എത്തി

ആധാർ എൻറോൾമെന്റ് ഐഡി ഉപയോഗിച്ച് പാൻ കാർഡ് നേടിയ എല്ലാ പാൻ ഉടമകളും ആദായനികുതി വകുപ്പിൻ്റെ പുതിയ നിർദ്ദേശം. ഇത് ഉടൻ തന്നെ പാലിക്കണമെന്ന് സർക്കാർ ആവശ്യപ്പെട്ടിട്ടുണ്ട്. പുറപ്പെടുവിച്ച വിജ്ഞാപനം അനുസരിച്ച് 2024 ഒക്ടോബർ 1-നോ അതിനുമുമ്പോ ആധാർ അപേക്ഷയുടെ എൻറോൾമെന്റ് ഐഡി നൽകി പാൻ കാർഡ് ലഭിച്ച പാൻ ഉടമകൾ 2025 ഡിസംബർ 31-നകം അവരുടെ ആധാർ നമ്പർ ആദായനികുതി വകുപ്പിനെ അറിയിക്കേണ്ടതുണ്ട്. 

"1961-ലെ ആദായനികുതി നിയമത്തിലെ (1961-ലെ 43) സെക്ഷൻ 139AA-യിലെ ഉപവകുപ്പ് (2A) നൽകുന്ന അധികാരങ്ങൾ വിനിയോഗിച്ച്, 2024 ഒക്ടോബർ 1-ന് മുമ്പ് സമർപ്പിച്ച ആധാർ അപേക്ഷാ ഫോമിന്റെ എൻറോൾമെന്റ് ഐഡിയുടെ അടിസ്ഥാനത്തിൽ പാൻ അനുവദിച്ച ഓരോ വ്യക്തിയും 2025 ഡിസംബർ 31-നോ അതിനുമുമ്പോ ആദായനികുതി വകുപ്പിൻ്റെ പ്രിൻസിപ്പൽ ഡയറക്ടർ ജനറലിനെയോ, ഡയറക്ടർ ജനറലിനെയോ അല്ലെങ്കിൽ പ്രസ്തുത അധികാരികൾ അധികാരപ്പെടുത്തിയ വ്യക്തിയെയോ അവരുടെ ആധാർ നമ്പർ അറിയിക്കേണ്ടതാണ്." വിജ്ഞാപനത്തിൽ ഇങ്ങനെ പറയുന്നു.

നിങ്ങളുടെ ആധാർ നമ്പർ ആദായനികുതി വകുപ്പിനെ എങ്ങനെ അറിയിക്കാം?

"പാൻ-ആധാർ ലിങ്ക് ചെയ്യാൻ ഉപയോ​ഗിച്ച അതേ രീതിയിലായിരിക്കും ആദായനികുതി വകുപ്പിനെ ആധാർ നമ്പർ അറിയിക്കാൻ ഉപയോഗിക്കുന്നതെന്ന് Taxmann.com ന്റെ ഉപദേശക, ഗവേഷണ വൈസ് പ്രസിഡന്റ് നവീൻ വാധ്വ പറയുന്നു. അതിനായി പാൻ ഉടമകൾ ആദായനികുതി വകുപ്പിന്റെ ഇ-ഫയലിംഗ് പോർട്ടൽ സന്ദർശിച്ച് പാൻ-ആധാർ ലിങ്കിംഗ് പ്രക്രിയ ചെയ്യുക. ഇവിടെ നിർദ്ദിഷ്ട പാൻ ഉടമകൾ പാൻ-ആധാർ ലിങ്ക് ചെയ്യുന്നതിന് പിഴ ബാധകമാകില്ലെന്ന് പ്രതീക്ഷിക്കുന്നു. എന്നിരുന്നാലും, ആദായനികുതി വകുപ്പിൽ നിന്നുള്ള കൂടുതൽ വ്യക്തത അത്തരം പാൻ ഉടമകൾക്ക് സഹായകരമാകും." അദ്ദേഹം കൂട്ടിച്ചേർത്തു.

സത്യത്തിൽ പിഴ ഈടാക്കാതെ പാൻ ആധാറുമായി ലിങ്ക് ചെയ്യുന്നതിനുള്ള അവസാന തിയ്യതി നേരത്തെ അവസാനിച്ചതാണ്. അതായത് പിഴ ഈടാക്കാതെ ലിങ്ക് ചെയ്യാവുന്ന അവസാന തീയതി 2023 ജൂൺ 30 നായിരുന്നു. എന്നാൽ പല കാരണത്താൽ ഒന്നിലധികം തവണ ഈ തിയ്യതി നീട്ടിവെക്കേണ്ടി വന്നിട്ടുണ്ട്. എന്നാൽ ഇനിയും ലിങ്ക് ചെയ്യാത്തവരുണ്ടെങ്കിൽ തീർച്ചയായും പിഴ ഈടാക്കും.

പക്ഷേ ആധാർ എൻറോൾമെന്റ് ഐഡി മാത്രം ഉപയോഗിച്ച് പാൻ കാർഡ് നേടിയ വ്യക്തികളും ഉണ്ട്. അത്തരം വ്യക്തികൾക്ക് ആ സമയത്ത് യഥാർത്ഥ ആധാർ നമ്പർ ഉണ്ടായിരുന്നില്ല, അതിനാൽ, 2023 ജൂൺ 30നുള്ളിൽ ആധാറും പാനും ലിങ്ക് ചെയ്യാൻ സാധിച്ചിരുന്നില്ല. ഇത്തരം പാൻ ഉടമകൾക്ക് ആധാർ ലിങ്ക് ചെയ്യുവാൻ പിഴ അടയ്ക്കേണ്ടി വരില്ല.

2025 ഡിസംബർ 31-നകം പാൻ ഉടമകൾ അവരുടെ ആധാർ നമ്പർ ആദായനികുതി വകുപ്പിനെ അറിയിക്കണമെന്ന് വിജ്ഞാപനത്തിൽ പറയുന്നു.
"2025 ഡിസംബർ 31-നകം ആധാർ നമ്പർ ആദായനികുതി വകുപ്പിനെ അറിയിച്ചില്ലെങ്കിൽ 2026 ജനുവരി 1 മുതൽ പാൻ പ്രവർത്തനരഹിതമാകാൻ സാധ്യതയുണ്ട്. പക്ഷേ ഇത് ആദായനികുതി വകുപ്പ് വ്യക്തമാക്കിയിട്ടില്ല.

ഡിസംബർ 31-നകം പാൻ-ആധാർ ലിങ്ക് ചെയ്തില്ലെങ്കിൽ എന്തെല്ലാം സംഭവിക്കുമെന്ന് നോക്കാം;

• മറ്റ് നികുതിദായകരുടെ കാര്യത്തിൽ പാൻ-ആധാർ ലിങ്ക് ചെയ്യാൻ വൈകിയാൽ 1,000 രൂപ പിഴ നൽകേണ്ടിവരും. എന്നാൽ 01.01.2026 മുതൽ (അല്ലെങ്കിൽ CBDT നിർദ്ദേശിക്കുന്ന തീയതി മുതൽ) ഈ പ്രത്യേക നികുതിദായകർക്ക് പിഴ ചുമത്തുമെന്ന് വ്യക്തമാക്കിയിട്ടില്ല.

• ആധാർ നമ്പറുമായി ലിങ്ക് ചെയ്യാതിരുന്നാൽ പാൻ പ്രവർത്തനരഹിതമാകും.

• ഇവ രണ്ടും ലിങ്ക് ചെയ്യാതെ ഇതിനകം ഫയൽ ചെയ്ത ഐടിആറും അസാധുവാകും

• പ്രവർത്തനരഹിതമായ പാൻ നമ്പറിൽ റീഫണ്ടുകൾ പ്രോസസ്സ് ചെയ്യാൻ പാടില്ല.

• പ്രവർത്തനരഹിതമായ പാൻ ഉപയോഗിച്ച് വരുമാന റിട്ടേൺ സമർപ്പിക്കാൻ കഴിയില്ല.

• ടിഡിഎസ് അല്ലെങ്കിൽ ടിസിഎസ് പിൻവലിക്കുന്നതും ശേഖരിക്കുന്നതും ഉയർന്ന നിരക്കിലായിരിക്കും.

• നികുതിദായകർക്ക് ഫോം 15G / ഫോം 15H സമർപ്പിക്കാൻ കഴിയില്ല.

• പാൻ പ്രവർത്തനരഹിതമായ നികുതിദായകർക്ക് റീഫണ്ടുകളുടെ പലിശ അനുവദിക്കാൻ പാടില്ല.

വ്യക്തി​ഗത വായ്പയിൽ കെവൈസി എന്തിനാണ്? ഓഫ്‌ലൈനായും ഓൺലൈനായും കെവൈസി പൂർത്തിയാക്കാം

നിങ്ങളുടെ പാൻ ആധാറുമായി ലിങ്ക് ചെയ്യുന്നത് എങ്ങനെ?

• ഇ-ഫയലിംഗ് പോർട്ടൽ സന്ദർശിക്കുക

• പോർട്ടലിൽ ഇടതുവശത്തുള്ള ക്വിക്ക് ലിങ്കുകൾ വിഭാഗത്തിലെ 'ലിങ്ക് ആധാർ' ഓപ്ഷൻ ക്ലിക്ക് ചെയ്യുക.

• ഇ-പേ ടാക്സ് വഴി പണമടയ്ക്കാൻ നിങ്ങളുടെ പാൻ, ആധാർ നമ്പർ എന്നിവ നൽകി 'തുടരുക' എന്നതിൽ ക്ലിക്കുചെയ്യുക.

• നിങ്ങളുടെ മൊബൈൽ നമ്പർ നൽകി OTP സ്വീകരിക്കുക. അതിനുശേഷം നിങ്ങളെ ഇ-പേ ടാക്സ് പേജിലേക്ക് റീഡയറക്ട് ചെയ്യും. എന്നിട്ട് 'തുടരുക' ക്ലിക്ക് ചെയ്യുക.

• ഇതിനുശേഷം വിലയിരുത്തൽ വർഷം തിരഞ്ഞെടുക്കുക. പേയ്‌മെന്റ് തരം 'മറ്റ് രസീതുകൾ' (500) എന്ന ഓപ്ഷനും തിരഞ്ഞെടുക്കുക.

• ഇനി പേയ്‌മെന്റ് വിജയകരമായി പൂർത്തിയാക്കിയ ശേഷം, 'ലിങ്ക് ആധാർ' പേജ് വീണ്ടും സന്ദർശിക്കുക.

• നിങ്ങളുടെ വിവരങ്ങൾ പരിശോധിച്ചാൽ പാൻ-ആധാർ ലിങ്ക് റിക്വസ്റ്റ് 'തുടരാൻ' ക്ലിക്ക് ചെയ്യുക.