ടിക്കറ്റിംഗ് ബിസിനസ്സ് സൊമാറ്റോയ്ക്ക് വിറ്റ് പേടിഎം, ഓഹരിയിൽ കുതിപ്പ്, പേടിഎം കരകയറുമോ..?

ഓഹരി വിപണിയിൽ വലിയ ഇടിവ് സംഭവിച്ചതിന് ശേഷം പേടിഎം ഓഹരികൾ തിരിച്ച് വരവിന്‍റെ പാതയിലാണ്. വ്യാഴാഴ്ച ആദ്യ സെഷനിൽ തന്നെ മികച്ച മുന്നേറ്റം കാഴ്ചവെക്കാൻ ഓഹരിക്ക് സാധിച്ചിട്ടുണ്ട്. അതുമാത്രമല്ല കഴിഞ്ഞ അഞ്ച് ട്രേഡിംഗ് ദിവസങ്ങളിൽ നിന്നും 6.73 ശതമാനം വളർച്ചയാണ് ഓഹരി നേടിയത്. വരും ദിവസങ്ങളിലും ഓഹരി വില മുകളിലേക്ക് ഉയരാനുള്ള സാധ്യത ബ്രോക്കറേജുകൾ ചൂണ്ടിക്കാട്ടുന്നുണ്ട്.

കുതിപ്പിന് കാരണം

പേടിഎമ്മിന്‍റെ വിനോദ ടിക്കറ്റിംഗ് ബിസിനസ്സ് 2,048 കോടി രൂപയ്ക്ക് ഓണ്‍ലൈന്‍ ഫുഡ് ഡെലിവറി പ്ലാറ്റ്ഫോമായ സൊമാറ്റോ ഏറ്റെടുക്കും എന്ന വാർത്ത പുറത്ത് വന്നതിന് പിന്നാലെയാണ് വ്യാഴാഴ്ച ഓഹരി വിപണിയിൽ നിന്നും പേടിഎം നേട്ടം കൊയ്തത്. സൊമാറ്റോയുടെയും വണ്‍ 97 കമ്മ്യൂണിക്കേഷന്‍സ് ലിമിറ്റഡിന്റെയും ബോര്‍ഡുകള്‍ പണമിടപാടിന് അംഗീകാരം നല്‍കി.

ഈ കരാറിന്റെ ഭാഗമായി, വണ്‍ 97 കമ്മ്യൂണിക്കേഷന്‍സ് ലിമിറ്റഡിന്റെ വിനോദ ടിക്കറ്റിംഗ് ബിസിനസ്സ് അതിന്റെ അനുബന്ധ സ്ഥാപനങ്ങളായ ഒടിപിഎല്‍, ഡബ്‌ളിയുഇപിഎല്‍ എന്നിവയിലേക്ക് ബിസിനസ്സ് കൈമാറും. തുടര്‍ന്ന് ഈ അനുബന്ധ സ്ഥാപനങ്ങളിലെ 100 ശതമാനം ഓഹരികള്‍ സൊമാറ്റോയ്ക്ക് വില്‍ക്കും. തുടര്‍ന്ന്, സൊമാറ്റോ പുതിയ ബിസിനസിനെ 'ഡിസ്ട്രിക്റ്റ്' എന്ന പുതിയ ആപ്പിലേക്ക് മാറ്റും.

ഓഹരി വിപണിയിലെ പ്രകടനം

എൻഎസ്ഇയിൽ 573.10 രൂപ എന്നതാണ് നിലവിൽ (11.35 AM, 22-08-24) പേടിഎം ഓഹരിയുടെ വില. കഴിഞ്ഞ ഒരു മാസത്തിനിടെ 26.67 ശതമാനം വളർച്ച കൈവരിക്കാൻ ഓഹരിക്ക് സാധിച്ചു. 47.57 ശതമാനമാണ് ആറ് മാസത്തിനിടെ പേടിഎം ഓഹരി നേടിയ മുന്നേറ്റം. അതേസമയം ഒരു വർഷത്തിനിടെ 33.15 ശതമാനം ഇടിവ് ഓഹരി നേരിട്ടിട്ടുണ്ട്. 998.30 രൂപയാണ് 52 ആഴ്ചയിലെ ഏറ്റവും ഉയർന്ന ഓഹരി വില. 310 രൂപയാണ് 52 ആഴ്ചയിലെ ഏറ്റവും താഴ്ന്ന ഓഹരി വില.

ടാർഗെറ്റ് വില ഉയർത്തി ബ്രോക്കറേജ്

ഗ്ലോബൽ ബ്രോക്കറേജ് സിഎൽഎസ്എ, പേടിഎം ഓഹരിയിൽ "ഹോൾഡ്" റേറ്റിംഗ് നിലനിർത്തിയിട്ടുണ്ട്, എന്നാൽ അതിൻ്റെ ടാർഗെറ്റ് വില 480 രൂപയിൽ നിന്ന് 530 രൂപയായി വർദ്ധിപ്പിച്ചു. അതുപോലെ ബ്രോക്കറേജ് സ്ഥാപനമായ സിറ്റി പേടിഎമ്മിൽ "സെൽ" റേറ്റിംഗ് നിലനിർത്തിയിട്ടുണ്ട്. എന്നാൽ ടാർഗെറ്റ് വില 410 രൂപയിൽ നിന്ന് 440 രൂപയായി ഉയർത്തി. വിനോദ ടിക്കറ്റിംഗ് ബിസിനസ്സ് സൊമാറ്റോയ്ക്ക് വിൽക്കുന്നത് ഒരു നല്ല സംഭവമായി ബ്രോക്കറേജ് വീക്ഷിക്കുന്നു. ഡീൽ മൂല്യം സൂചിപ്പിച്ചതിനേക്കാൾ ഉയർന്നതാണെന്നും ബ്രോക്കറേജ് ചൂണ്ടിക്കാണിക്കുന്നു.

യാത്ര, ക്യാഷ്ബാക്ക് സേവനങ്ങൾ എന്നിവയുൾപ്പെടെയുള്ള പ്രധാന ബിസിനസുകളിൽ കൂടുതൽ ശ്രദ്ധ കേന്ദ്രീകരിക്കാൻ വിനോദ ടിക്കറ്റിംഗ് ബിസിനസ്സ് വിൽപ്പന പേടിഎമ്മിനെ അനുവദിക്കുമെന്ന് മോത്തിലാൽ അനലിസ്റ്റുകൾ അഭിപ്രായപ്പെട്ടു. 550 രൂപ ടാർഗെറ്റ് വിലയുള്ള സ്റ്റോക്കിൽ നിഷ്പക്ഷ നിലപാട് പുലർത്തുന്ന ബ്രോക്കറേജ്, ഈ തന്ത്രപരമായ നീക്കത്തിന് ഉയർന്ന വളർച്ചാ മേഖലകളിൽ ശ്രദ്ധ കേന്ദ്രീകരിച്ച് ഓഹരി ഉടമകളുടെ മൂല്യം വർദ്ധിപ്പിക്കാൻ കഴിയുമെന്ന് വിശ്വസിക്കുന്നു.

ഇടപാട് ബാലൻസ് ഷീറ്റിനെ കൂടുതൽ ശക്തിപ്പെടുത്തും. 2027 സാമ്പത്തിക വർഷത്തോടെ കമ്പനിയുടെ ഇബിഐടിഡിഎ പോസിറ്റീവ് ആയി മാറുമെന്നാണ് കരുതുന്നതെന്നും ബ്രോക്കറേജ് കൂട്ടിച്ചേർത്തു.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.