വായ്പ തേടുന്നവരുടെ ശ്രദ്ധയ്ക്ക്, റീട്ടെയില്‍ വായ്പകള്‍ക്ക് പ്രത്യേക ആനുകൂല്യങ്ങളുമായി എസ്ബിഐ

മുംബൈ: പുതിയ റീട്ടെയില്‍ വായ്പ ഇടപാടുകാര്‍ക്ക് ആകര്‍ഷക ഓഫറുകളുമായി എസ്ബിഐ. വാഹനം, സ്വര്‍ണം, പേഴ്‌സണല്‍ ലോണ്‍ എന്നിവയ്ക്ക് 100 ശതമാനം പ്രോസസിംഗ് ഫീസ് ഇളവുണ്ട്. ബാങ്കിന്റെ മൊബൈല്‍ ആപ്ലിക്കേഷനായ യോനോ ആപ്പ് വഴി വായ്പയ്ക്ക് അപേക്ഷിക്കുന്നവര്‍ക്കാണ് ഈ ആനൂകൂല്യം ലഭിക്കുക.

ഭവന വായ്പ അംഗീകൃത പാര്‍പ്പിടപദ്ധതിക്കാണെങ്കില്‍ 100 ശതമാനം പ്രോസസിംഗ് ഫീസ് ഇളവ് ബാങ്ക് നല്‍കും. ഇതുകൂടാതെ മികച്ച ക്രഡിറ്റ് സ്‌കോര്‍ ഉള്ളവര്‍ക്ക് ഭവന വായ്പ പലിശയില്‍ 0.10 ശതമാനം ഇളവ് നല്‍കുകയും ചെയ്യും. ആപ്പ് വഴിയാണ് വായ്പയ്ക്ക് അപേക്ഷിക്കുന്നതെങ്കില്‍ അധികമായി 0.05 ശതമാനം പലിശ ഇളവും നേടാം.

എസ്്ബിഐയുടെ നിലവിലെ ഏറ്റവും കുറഞ്ഞ വായ്പ പലിശ 7.5 ശതമാനമാണ്. വാഹന വായ്പയില്‍ 100 ശതമാനം ഓണ്‍റോഡ് വിലയിലും വായ്പ് നേടാന്‍ സാധിക്കും. സ്വര്‍ണപ്പണയ വായ്പയുടെ കാര്യം പരിശോധിക്കുമ്പോള്‍ 7.5 ശതമാനം നിരക്കില്‍ സ്വര്‍ണ പണയ വായ്പ എടുക്കുന്നവര്‍ക്ക് 36 മാസത്തിനുള്ളില്‍ തിരിച്ചടക്കാന്‍ കഴിയുന്ന രീതിയിലുള്ള കലാവധി ലഭിക്കും. പേഴ്‌സണല്‍ ലോണ്‍ പലിശ നിരക്ക് 9.6 ശതമാനമാണ്.