യോനോ ഷോപ്പിംഗ് ഫെസ്‌റ്റിവൽ; ഹോം ലോൺ, വാഹന വായ്പകൾക്ക് ആകർഷകമായ ഓഫറുകൾ

ഡിജിറ്റല്‍ ബാങ്കിംഗിനെ പ്രോല്‍സാഹിപ്പിക്കുന്നതിന്റെ ഭാഗമായി സ്റ്റേറ്റ് ബാങ്ക് ഓഫ് ഇന്ത്യ പുറത്തിറക്കിയ ഡിജിറ്റൽ ആപ്പായ യോനോയിൽ ഷോപ്പിംഗ് ഫെസ്റ്റിവലിന് തുടക്കമായി. ഡിസംബർ 10 മുതൽ 14 വരെയാണ് 'യോനോ ഷോപ്പിംഗ് ഫെസ്റ്റിവൽ 2.0' നടക്കുക. ഈ അഞ്ച് ദിവസത്തെ ഷോപ്പിംഗ് ഫെസ്റ്റിവലിൽ എസ്‌ബിഐ ധാരാളം ഓഫറുകളാണ് ഉപഭോക്താക്കൾക്കായി ഒരുക്കിയിരിക്കുന്നത്. കഴിഞ്ഞ തവണത്തെ ഷോപ്പിംഗ് ഫെസ്റ്റിവലിന് ഉപഭോക്താക്കളിൽ നിന്ന് ലഭിച്ച മികച്ച പ്രതികരണത്തിന്റെ ഭാഗമായാണ് ഈ തവണയും ഫെസ്റ്റിവൽ ഒരുക്കുന്നതെന്ന് എസ്ബിഐ അധികൃതർ പറഞ്ഞു.

ഈ ഉത്സവ സീസണിൽ ആമസോൺ, ലൈഫ് സ്റ്റൈൽ സ്റ്റോറുകൾ, തോമസ് കുക്ക്, ഈസിമൈട്രിപ്പ്, ഒയോ, പെപ്പർഫ്രൈ തുടങ്ങി 17 ഇ-കൊമേഴ്‌സ് സ്ഥാപനങ്ങളും പങ്കെടുക്കുന്നുണ്ട്. കൂടാതെ എസ്‌ബിഐ ആകർഷകമായ വായ്‌പാ പദ്ധതികളും ഒരുക്കിയിട്ടുണ്ട്. ഡിസംബർ 31 വരെയുള്ള വാഹന വായ്‌പകൾക്ക് സീറോ പ്രോസസ്സിംഗ് ഫീസ് സൗകര്യവും ലഭിക്കുന്നതാണ്. ഹോം ലോണിന് ഉടൻ തന്നെയുള്ള ഇൻ-പ്രിൻസിപ്പൽ അംഗീകാരവും ഏകീകൃത പ്രോസസ്സിംഗ് ഫീസിൽ 50% കുറവും ലഭിക്കും.

ഇലക്‌ട്രോണിക്‌സ്, ഫാഷൻ, ആഭരണങ്ങൾ, ഗിഫ്റ്റിംഗ്, തുണിത്തരങ്ങൾ, ഫർണീച്ചർ തുടങ്ങിയ ഉൽപ്പന്നങ്ങളും ട്രാവൽ, ഹോസ്പിറ്റാലിറ്റി പോലുള്ള നിരവധി സൗകര്യങ്ങളും 'യോനോ ഷോപ്പിംഗ് ഫെസ്റ്റിവൽ 2.0'യിൽ ലഭ്യമാണ്. കൂടാതെ മേളയിൽ പങ്കെടുക്കുന്ന എല്ലാ വ്യാപാരികളിൽ നിന്നും 5% മുതൽ 50% വരെ കിഴിവുകൾ ലഭിക്കുന്നതുമാണ്. ക്രെഡിറ്ര്, ഡെബിറ്റ് കാർഡ് ഉപയോഗിച്ചുള്ള പർച്ചേസുകൾക്ക് പത്തു ശതമാനം കാഷ് ബാക്ക് ഓഫറും ലഭിക്കും.