റാലി തുടരുന്നു; സെന്‍സെക്‌സും നിഫ്റ്റിയും പുതിയ ക്ലോസിംഗ് നിലവാരത്തില്‍; ഈ വാരം 2% നേട്ടം

ബാങ്കിംഗ്, ഓട്ടോ, ഐടി സെഗ്മെന്റിലെ വമ്പന്‍ ഓഹരികളുടെ ബലത്തില്‍ വെള്ളിയാഴ്ച സെന്‍സെക്‌സും നിഫ്റ്റിയും പുതിയ ക്ലോസിംഗ് നിലവാരം കുറിച്ചു. വെള്ളിയാഴ്ച സെന്‍സെക്‌സ് 320 പോയിന്റ് നേട്ടത്തോടെ 67,838 ലും നിഫ്റ്റി 89 പോയിന്റ് നേട്ടത്തോടെ 20,193.25 ലും ക്ലോസ് ചെയ്തു. വ്യാപാകത്തിനിടെ സെന്‍സെക്‌സ് 67,927.23 ല്‍ പുതിയ ഉയരം കുറിച്ചു. 20,222.45 വരെ ഉയര്‍ന്ന നിഫ്റ്റിയും റെക്കോര്‍ഡ് ഉയരം കുറിച്ചു.

ബജാജ് ഓട്ടോ, ഗ്രാസിം ഇന്‍ഡസ്ട്രീസ്, മഹീന്ദ്ര ആന്‍ഡ് മഹീന്ദ്ര, ഹീറോ മോട്ടോക്രോപ്പ്, ഭാരതി എയര്‍ടെല്‍ എന്നിവ നിഫ്റ്റിയില്‍ നേട്ടമുണ്ടാക്കി. ബിപിസിഎല്‍, എഷ്യന്‍ പെയിന്റ്, എച്ച#യുഎല്‍, ജിയോ ഫിനാന്‍ഷ്യല്‍ സര്‍വീസ്, ടാറ്റ കണ്‍സ്യൂമര്‍ പ്രൊഡക്ട്‌സ് ഓഹരികള്‍ നഷ്ടത്തിലാണ്.

സെക്ടറല്‍ സൂചികകള്‍ സമ്മിശ്രമായ പ്രകടനം നടത്തി. എഫ്എംസിജി, ഓയില്‍ ആന്‍ഡ് ഗ്യാസ്, പവര്‍ ആന്‍ഡ് റിയലിറ്റി എന്നി സൂചികകള്‍ 0.40- 1 ശതമാനം വരെ ഇടിഞ്ഞു. ഓട്ടോ, ബാങ്ക്, ഫാര്‍മ, ഐടി സൂചികകള്‍ 0.3- 1 ശതമാനം നേട്ടമുണ്ടാക്കി. ബിഎസ്ഇ മിഡ്കാപ്, സ്‌മോള്‍ കാപ് സൂചികകളും നേട്ടത്തിലാണ് ക്ലോസ് ചെയ്തത്. മിഡ്കാപ് സൂചിക 0.09 ശതമാനവും സ്‌മോള്‍ കാപ് സൂചിക0.27 ശതമാനവും ഉയര്‍ന്നു.

റാലി തുടരുന്ന ഇന്ത്യന്‍ ഓഹരി വിപണിയില്‍ 2 ശതമാനം നേട്ടത്തോടെയാണ് ബെഞ്ച്മാര്‍ക്ക് സൂചികകള്‍ വ്യാപാര ആഴ്ച അവസാനിപ്പിച്ചത്. സ്‌മോള്‍ കാപ് സൂചിക 1 ശതമാനവും മിഡ്കാപ് സൂചിക അര ശതമാനവും ഇടിവിലാണ് ഈ ആഴ്ച അവസാനിപ്പിക്കുന്നത്.

വെള്ളിയാഴ്ച നേട്ടമുണ്ടാക്കിയ പ്രധാന മിഡ്കാപ് ഓഹരികള്‍ വോഡാഫോണ്‍ ഐഡിയ, പിഎന്‍ബി, ഗ്ലാന്‍മാര്‍ക്ക്, യൂണിയന്‍ ബാങ്ക്, ബല്‍റാംപൂര്‍ ഷുഗര്‍ എന്നിവയാണ്. ആക്‌സിസ് ബാങ്ക്, ഭാരതി എയര്‍ടെല്‍, എച്ച്‌സിഎല്‍ ടെക്, മഹീന്ദ്ര ആന്‍ഡ് മഹീന്ദ്ര, ടിസിഎസ്, ടെക് മഹീന്ദ്ര, വിപ്രോ, അള്‍ട്ര ടെക് സിമന്റ് തുടങ്ങി 236 ഓഹരികള്‍ 52 ആഴ്ചയിലെ ഉയര്‍ന്ന നിലവാരം തൊട്ടു.

രൂപ വീണ്ടും ഇടിഞ്ഞു. ഡോളറിനെതിരെ 15 പൈസ നഷ്ടത്തില്‍ 83.18 നിലവാരത്തിലാണ് സ്വര്‍ണത്തിന്റെ ക്ലോസിംഗ്. വ്യാഴാഴ്ച 83.03 രൂപയിലായിരുന്നു വ്യാപാരം അവസാനിപ്പിച്ചത്. ക്രൂഡ് ഓയില്‍ വിലയും ഉയരുകയാണ്. ബ്രെന്‍ഡ് ക്രൂഡ് 3.50 മണിക്ക് ബാരലിന് 94 ഡോളര്‍ നിലവാരത്തിലാണ് വ്യാപാരം നടക്കുന്നത്.