വെള്ളിയാഴ്ച ഫ്ലാറ്റ് ക്ലോസിം​ഗ്; നാലാമത്തെ ആഴ്ചയിലും നേട്ടം തുടർന്ന് വിപണി; ഐടി, എഫ്എംസിജി ഇടിഞ്ഞു

ഐടി, എഫ്എംസിജി ഓഹരികളിലെ ഇടിവിനെ തുടർന്ന് ആഭ്യന്തര ബെഞ്ച്മാർക്ക് ഇക്വിറ്റി സൂചികകളിൽ വെള്ളിയാഴ്ച ഫ്ലാറ്റ് ക്ലോസിം​ഗ്. സെൻസെക്‌സ് 47.77 പോയിന്റ് താഴ്ന്ന് 65,970.04 ലും നിഫ്റ്റി 7.30 പോയിന്റ് നഷ്ടത്തിൽ 19,794.70 ലും ക്ലോസ് ചെയ്തു.

മെറ്റൽ, ഫാർമ ഓഹരികൾ ഉയർന്നു. അദാനി എന്റർപ്രൈസസാണ്, സിപ്ല, ദിവിസ് ലാബ്‌സ്, ഹിൻഡാൽകോ ഇൻഡസ്ട്രീസ്, അദാനി പോർട്ട്‌സ് എന്നിവ നിഫ്റ്റിയിൽ നേട്ടമുണ്ടാക്കി. വിപ്രോ, ടിസിഎസ്, എച്ച്‌സിഎൽടെക്, അപ്പോളോ ഹോസ്പിറ്റൽസ് അടക്കമുള്ള ഓഹരികൾ നഷ്ടം നേരിട്ടു.

നിഫ്റ്റി സ്‌മോൾകാപ് 100 സൂചിക 0.30 ശതമാനവും നിഫ്റ്റി മിഡ്‌ക്യാപ് സൂചിക 0.06 ശതമാനം ഉയർന്നു. ഐടി സൂചികയാണ് ഏറ്റവും കൂടുതൽ നഷ്ടം നേരിട്ടത്. 0.97 ശതമാനം ഇടിഞ്ഞു. എഫ്എംസിജി, പിഎസ്‍യു ബാങ്ക് എന്നിവയും നഷ്ടത്തിലാണ്. 0.87 ശതമാനം ഉയർന്ന് നിഫ്റ്റി ഫാർമയാണ് നേട്ടമുണ്ടാക്കിയത്. നിഫ്റ്റി മെറ്റൽ, നിഫ്റ്റി ഹെൽത്ത് കെയർ എന്നിവയും നേട്ടമുണ്ടാക്കി.

 ശ്രദ്ധേയമായ ഓഹരികൾ

എച്ച്ഡിഎഫ്സി ബാങ്ക്, ഐസിഐസിഐ ബാങ്ക് എന്നിവ നേട്ടത്തിലെത്തിയതോടെ നിഫ്റ്റി ബാങ്ക് 192 പോയിന്റ് ഉയർന്നു. പോസിറ്റീവ് ബ്രോക്കറേജ് റിപ്പോർട്ടുകൾക്ക് പിന്നാലെ സിപ്ല 2 ശതമാനത്തിൽ കൂടുതൽ ഉയർന്നു. ഹിൻഡൻബർഗ് കേസ് ഹിയറിങ് നടക്കുന്നതിനിടെ
മിക്ക അദാനി ഗ്രൂപ്പ് ഓഹരികളും നേട്ടത്തിലാണ്.

പൊതുമേഖലാ ഇൻഷുറൻസ് ഓഹരികളിൽ വലിയ മുന്നേറ്റമുണ്ട്. ന്യൂ ഇന്ത്യ ഇൻഷുറൻസ് 20 ശതമാനവും എൽഐസി ഏകദേശം 10 ശതമാനവും ഉയർന്നു. ബ്ലോക്ക് ഡീൽ വഴി 1.6 കോടി ഓഹരികൾ കൈമാറ്റം ചെയ്യപ്പെട്ട പേടിഎം 3 ശതമാനത്തിലധികം ഇടിഞ്ഞു.

ഏഷ്യൻ വിപണികളിലെ തളർച്ചയും വിദേശ ബാങ്കുകളിൽ നിന്നുള്ള ഡോളറിന്റെ ആവശ്യകതയും മൂലം രൂപയുടെ ഇടിഞ്ഞു. വെള്ളിയാഴ്ച റെക്കോർഡ് താഴ്ച്ചയിലാണ് രൂപ വ്യാപാരം അവസാനിപ്പിച്ചത്. യുഎസ് ഡോളറിനെതിരെ 83.36 നിലവാരത്തിലാണ് രൂപയുടെ ക്ലോസിം​ഗ്. വ്യാഴാഴ്ച് 83.34 രൂപയിലായിരുന്നു ക്ലോസിം​ഗ്.

ഈ ആഴ്ചയിലും നേട്ടം തുടർന്ന് വിപണി

ഈ ആഴ്ചയിലും വിപണി നേട്ടത്തിലാണ് ക്ലോസ് ചെയ്യുന്നത്. സെൻസെക്സും നിഫ്റ്റിയും 0.3 ശതമാനം വീതമാണ് ഈ വാരം ഉയർന്നത്. മിഡ്‌ക്യാപ് സൂചിക 4-ാം ആഴ്ചയിലും നേട്ടത്തിലാണ്. 0.6 ശതമാനമാണ് നേട്ടം. നിഫ്റ്റി ബാങ്ക് 0.5 ശതമാനം ഉയ‍ർന്നു. ഈ വാരം നേട്ടമുണ്ടാക്കിയ സെക്ടറുകൾ റിയൽറ്റി, മെറ്റൽ, ഫാർമ എന്നിവയാണ്.

ഹീറോ മോട്ടോകോർപ്പ്, ബജാജ് ഓട്ടോ, ബിപിസിഎൽ, ദിവിസ് ലാബ്, ഭാരതി എയർടെൽ എന്നിവയാണ് നിഫ്റ്റിയിൽ നേട്ടമുണ്ടാക്കിയത്. സിപ്ല, ഒഎൻജിസി, കോൾ ഇന്ത്യ, ബജാജ് ഫിൻ അൾട്രാടെക് സിമന്റ് എന്നിവ ഇടിഞ്ഞു.