ഹീറോ, ബജാജ് ഓട്ടോ, റിലയൻസ് ഓഹരികൾ നയിച്ചു; ചാഞ്ചാട്ടത്തിനൊടുവിൽ സൂചികകൾ നേട്ടത്തിൽ

പ്രമുഖ ഐടി കമ്പനികളുടെ പാദഫലങ്ങൾക്കും യുഎസ് പണപ്പെരുപ്പ ‍ഡാറ്റയ്ക്കും മുന്നോടിയായി വ്യാഴാഴ്ച ഇന്ത്യൻ ആഭ്യന്തര സൂചികകൾ നേട്ടത്തിൽ ക്ലോസ് ചെയ്തു. സെൻസെക്‌സ് 63.47 പോയിന്റ് ഉയർന്ന് 71,721ലും നിഫ്റ്റി 28.50 പോയിന്റ് നേട്ടത്തിൽ 21,647ലുമാണ് വ്യാപാരം അവസാനിപ്പിച്ചത്.

ഐടി പ്രമുഖരായ ടിസിഎസിന്റെയും ഇൻഫോസിസിന്റെയും ഡിസംബർ പാദ ഫലങ്ങൾ വ്യാഴാഴ്ച വൈകിട്ടോടെ പുറത്ത് വരും. യുഎസ് പണപ്പെരുപ്പ ഡാറ്റയും വ്യാഴാഴ്ചയാണ് പുറത്ത് വരുന്നത്. നിരക്ക് തീരുമാനങ്ങളിൽ സ്വാധീനം ചെലുത്തുന്ന പണപ്പെരുപ്പ ഡാറ്റ നിക്ഷേപകരെ സ്വാധീനിച്ചു.

ചാഞ്ചാട്ടത്തിനൊടുവിലാണ് സൂചികകൾ നേട്ടത്തിൽ തുടർന്നത്. സെൻസെക്സ് ബുധനാഴ്ചയിലെ ക്ലോസിം​ഗിനെതിരെ 250 പോയിന്റ് നേട്ടത്തോടെയാണ് സെൻസെക്സ് വ്യാപാരം ആരംഭിച്ചത്. ഇൻട്രാഡേയിൽ 71,657.71 നും 71,999.47 ഇടയിൽ വ്യാപാരം നടത്തിയ ഓഹരി പോയിന്റുകൾ വലിയതോതിൽ നഷ്ടപ്പെടുത്തിയാണ് ക്ലോസ് ചെയ്തത്. നിഫ്റ്റിയും നേട്ടത്തിലാണ് വ്യാപാരം ആരംഭിച്ചത്.

ഹീറോ മോട്ടോകോർപ്പ്, ബജാജ് ഓട്ടോ, റിലയൻസ് ഇൻഡസ്ട്രീസ് എന്നിവ നിഫ്റ്റിയിൽ കാര്യമായ നേട്ടമുണ്ടാക്കി. ഹിന്ദുസ്ഥാൻ യുണിലിവർ, ഡോ. റെഡ്ഡീസ് ലബോറട്ടറീസ്, എസ്ബിഐ ലൈഫ് ഇൻഷുറൻസ് എന്നിവ നഷ്ടത്തിലും ക്ലോസ്ചെയ്തു. സെക്ടറൽ സൂചികകളിൽ നിഫ്റ്റി ഓട്ടോ സൂചിക നേട്ടമുണ്ടാക്കി. ഒരു ശതമാനത്തിലധികം ഉയർന്ന് പുതിയ റെക്കോർഡ് ഉയരങ്ങളിലെത്തി.

നിഫ്റ്റി എനർജി, നിഫ്റ്റി ബാങ്ക്, നിഫ്റ്റി ഇൻഫ്രാ, നിഫ്റ്റി പിഎസ്‌യു ബാങ്ക് എന്നിവ നേട്ടമുണ്ടാക്കി. നിഫ്റ്റി ഐടി, നിഫ്റ്റി മെറ്റൽ, നിഫ്റ്റി ഫാർമ സൂചികളാണ് ഇടിവിൽ ക്ലോസ് ചെയ്തത്. ബി‌എസ്‌ഇ മിഡ്‌കാപ്, സ്‌മോൾകാപ് സൂചികകൾ 0.7 ശതമാനം നേട്ടത്തോടെ ക്ലോസ് ചെയ്തു.

പാദഫലങ്ങൾക്ക് മുന്നോടിയായി ടാറ്റ കൺസൾട്ടൻസി സർവീസ് നേട്ടത്തിലാണ്. ഇൻഫോസിസ് നഷ്ടത്തിലേക്ക് വീണു. ആദായ നികുതി തിരച്ചലിന് പിന്നാലെ പോളിക്യാബ് ഏറ്റവും വലിയ തിരിച്ചടി നേരിട്ടു. ഓഹരികൾ 22 ശതമാനം ഇടിഞ്ഞു. സിറ്റി ഗ്യാസ് കമ്പനികൾ നേട്ടമുണ്ടാക്കി. ​

ഗുജറാത്ത് ​ഗ്യാസ്, മഹാന​ഗർ ലിമിറ്റ‍ഡ് എന്നിവ 5 ശതമാനം വീതം ഉയർന്നു. അൺസെക്യൂർഡ് വായ്പകളെ പറ്റിയുടെ ആർബിഐ ​ഗവർണറുടെ പ്രസ്താവന ആർബിഎൽ ബാങ്ക്, ഐഡിഎഫ്സി ഫസ്റ്റ് ബാങ്ക് ഓഹരികളെ ഉയർത്തി. ബുധനാഴ്ചയിലെ നഷ്ടം വീണ്ടെടുത്ത മണപ്പുറം ഏകദേശം 4 ശതമാനം നേട്ടത്തിൽ ക്ലോസ് ചെയ്തു.

റിലയൻസ് ഇൻഡസ്ട്രീസ്, ഭാരതി എയർടെൽ, ഇൻഡസ്ഇൻഡ് ബാങ്ക്, ടാറ്റ മോട്ടോഴ്‌സ്, ഹീറോ മോട്ടോകോർപ്പ്, ഇന്റർഗ്ലോബ് ഏവിയേഷൻ, ടാറ്റ പവർ, ടിവിഎസ് മോട്ടോർ കമ്പനി എന്നിവയുൾപ്പെടെ 500-ലധികം ഓഹരികൾ 52 ആഴ്‌ചയിലെ ഏറ്റവും ഉയർന്ന നിലയിലെത്തി.