വീണ്ടും നഷ്ടത്തിലേക്ക് വീണ് വിപണി; നിഫ്റ്റിക്ക് 116 പോയിന്റ് നഷ്ടം; സെൻസെക്സ് 65,512 ൽ

യുഎസിൽ പലിശ നിരക്ക് ആശങ്കകൾക്ക് പിന്നാലെ ഡോളറും യുഎസ് ബോണ്ട് യീൽഡും ശക്തമായതോടെ ചൊവ്വാഴ്ചയും ഇന്ത്യൻ ആഭ്യന്തര സൂചികകൾ ഇടിഞ്ഞു. നിഫ്റ്റി 116 പോയിന്റ് നഷ്ടത്തിൽ 19,522.15 ലും സെൻസെക്സ് 316 പോയിന്റ് ഇടിഞ്ഞ് 65,512.10 ലും ക്ലോസ് ചെയ്തു.

നഷ്ടത്തോടെ 19,622.40 ലാണ് ചൊവ്വാഴ്ച നിഫ്റ്റി വ്യാപാരം ആരംഭിച്ചത്. 19,623.20 എന്ന ഇൻട്രാഡേ ഉയർന്ന നിലവാരത്തിലെത്തിയ നിഫ്റ്റി 19,500 ന് താഴെക്കിറങ്ങി 19,479.65 ൽ ഇൻട്രാഡേ താഴ്ന്ന നിലവാരം തൊട്ടു. ക്യാപിറ്റൽ ​ഗുഡ്സ്, പൊതുമേഖലാ ബാങ്കിംഗ് ഓഹരികളിൽ രണ്ടാം പകുതിയിൽ വാങ്ങൽ നടന്നതോടെയാണ് സൂചിക നഷ്ടം കുറച്ചത്.

ഒഎൻജിസി, ഐഷർ മോട്ടോഴ്‌സ്, ഹിൻഡാൽകോ ഇൻഡസ്ട്രീസ്, മാരുതി സുസുക്കി, ഡോ.റെഡ്ഡീസ് ലബോറട്ടറീസ് തുടങ്ങിയവയാണ് നിഫ്റ്റിയിൽ കൂടുതൽ നഷ്ടം നേരിട്ടത്. ടൈറ്റൻ കമ്പനി, ബജാജ് ഫിനാൻസ്, എൽ ആൻഡ് ടി, ബജാജ് ഫിൻസെർവ് തുടങ്ങിയ ഓഹരികൾ നേട്ടത്തിൽ ക്ലോസ് ചെയ്തു. എഫ്എംസിജി, ഓട്ടോ, പവർ, മെറ്റൽ, ഓയിൽ ആൻഡ് ഗ്യാസ് എന്നിവ 0.5- 1 ശതമാനം ഇടിഞ്ഞു. പൊതുമേഖലാ ബാങ്ക് 2.3 ശതമാനവും ക്യാപ്പിറ്റൽ ​ഗുഡ്സ് ഒരു ശതമാനവും നേട്ടമുണ്ടാക്കി.

തുടർച്ചയായ നികുതി നോട്ടീസിന് പിന്നാലെ ഡെൽറ്റ കോർപ്പറേഷൻ 52 ആഴ്ചയിലെ ഏറ്റവും താഴ്ന്ന നിലയിലെത്തി. ഡോളർ സൂചിക ഉയരുന്നതിനാൽ മെറ്റൽ ഓഹരികൾ ഇടിവിലാണ്. നിഫ്റ്റി മെറ്റൽ ഏകദേശം 1 ശതമാനം ഇടിഞ്ഞു.

പ്രതിമാസ വിൽപ്പനയെ തുടർന്ന് ഐഷർ, മാരുതി ടോപ് എന്നിവ ഇടിഞ്ഞു. ഓട്ടോ ഓഹരികൾ വലിയ തോതിൽ നഷ്ടത്തിലാണ്. ഒറ്റരാത്രികൊണ്ട് ക്രൂഡ് വില കുത്തനെ ഇടിഞ്ഞതോടെ ഒഎൻജിസി നഷ്ടത്തിലായി. ത്രൈമാസ ഫലത്തിന് മുന്നോടിയായി ടൈറ്റൻ കമ്പനി 1 ശതമാനം നേട്ടത്തിലാണ് ക്ലോസ് ചെയ്യുന്നത്.

പിഎസ്‌യു ബാങ്കുകളിൽ പഞ്ചാബ് നാഷണൽ ബാങ്കും യൂണിയൻ ബാങ്ക് ഓഫ് ഇന്ത്യയും 4-5 ശതമാനം വരെ ഇടിഞ്ഞു ജെഎസ്ഡബ്ല്യു എനർജി, ബിഎൽ കശ്യപ് ആൻഡ് സൺസ്, പിഎൻബി ഹൗസിങ് ഫിനാൻസ്, എൽ ആൻഡ് ടി, യൂണിയൻ ബാങ്ക് ഓഫ് ഇന്ത്യ, ജ്യോതി ലാബ്സ്, ജിപിടി ഇൻഫ്രാപ്രോജക്ട്സ്, ഡിബി കോർപ്, കാനറ ബാങ്ക്, ടോറന്റ് പവർ, സൊമാറ്റോ എന്നിവയുൾപ്പെടെ 250-ലധികം ഓഹരികൾ ചൊവ്വാഴ്ച 52 ആഴ്ചയിലെ ഉയർന്ന നിലയിലെത്തി.

കഴിഞ്ഞ സെഷനിൽ മൂന്നാഴ്ചയിലെ ഏറ്റവും താഴ്ന്ന നിലയിലേക്ക് ഇടിഞ്ഞതിന് ശേഷം ക്രൂഡ് ഓയിൽ വില ഇടിഞ്ഞു. ബ്രെന്റ് ക്രൂഡ് ബാരലിന് 91 ഡോളറിനടുത്താണ് വ്യാപാരം നടത്തുന്നത്. രൂപ ഡോളറിനെതിരെ 17 പൈസ ഇടിഞ്ഞ് 83.21 എന്ന നിലയിലാണ് ക്ലോസ് ചെയ്തത്.