വിപണിയിൽ വൻ ഇടിവ്; ഒറ്റ സെഷനിൽ നിക്ഷേപകർക്ക് നഷ്ടം 8 ലക്ഷം കോടി രൂപ; മിഡ്, സ്മോൾകാപുകളും നഷ്ടത്തിൽ

ബാങ്കിം​ഗ്, എഫ്എംസിജി, മെറ്റൽ ഓഹരികളിൽ കണ്ട വിൽപ്പന സൂചികകളിൽ സമ്മർദം ചെലുത്തിയതിനാൽ തുടർച്ചയായ രണ്ടാം സെഷനിലും ആഭ്യന്തര സൂചികകൾ ഇടിവ് തുടർന്നു. എച്ച്‌ഡിഎഫ്‌സി ബാങ്ക്, റിലയൻസ് ഇൻഡസ്ട്രീസ്, ഹിന്ദുസ്ഥാൻ യുണിലിവർ തുടങ്ങിയ മുൻനിര ഓഹരികൾ 2-4 ശതമാനം ഇടിഞ്ഞത് സൂചികകളെ സമ്മർദത്തിലാക്കി. മിഡ്‌കാപ്, സ്‌മോൾകാപ് ഓഹരികളിലും വിൽപ്പന വ്യക്തമായിരുന്നു. സൂചികകളിൽ കനത്ത ഇടിവ് രേഖപ്പെടുത്തി.

വ്യാപാര ആരംഭത്തിൽ 445 പോയിന്റ് നേട്ടത്തിൽ 71,868.20 ലാണ് സെൻസെക്സ് വ്യാപാരം ആരംഭിച്ചത്. 72,000-ന് മുകളിൽ ഇൻട്രാ ഡേ ഉയരം കുറിച്ചെങ്കിലും സൂചിക 1,800 പോയിന്റ് ഇടിഞ്ഞു. ക്ലോസിം​ഗിൽ സെൻസെക്സ് 1,053 പോയിന്റ് നഷ്ടത്തിൽ 70,370.55 ലാണുള്ളത്. നേട്ടത്തിൽ വ്യാപാരം തുടങ്ങിയ നിഫ്റ്റി 21,750.25 ൽ ഇൻട്രാ ഡേ ഉയർന്നതിന് ശേഷം 550 പോയിന്റിലധികം ഇടിഞ്ഞു. വ്യാപാരം അവസാനിക്കുമ്പോൾ നിഫ്റ്റി 333 പോയിന്റിന്റെ നഷ്ടത്തോടെ 21,238.80 ലാണ്.

നിഫ്റ്റി ഓഹരികൾ

ഇൻഡസ്ഇൻഡ് ബാങ്ക്, കോൾ ഇന്ത്യ, ഒഎൻജിസി, അദാനി പോർട്ട്‌സ്, എസ്ബിഐ ലൈഫ് ഇൻഷുറൻസ് എന്നിവയാണ് നിഫ്റ്റിയിൽ ഇടിവ് നേരിട്ട ഓഹരികളാണ്. സിപ്ല, സൺ ഫാർമ, ഭാരതി എയർടെൽ, ഐസിഐസിഐ ബാങ്ക്, ഡോ.റെഡ്ഡീസ് ലബോറട്ടറീസ് എന്നിവ ചൊവ്വാഴ്ച നേട്ടമുണ്ടാക്കി.

സെക്ടറൽ സൂചികകൾ

ഫാർമ ഒഴികെയുള്ള മേഖലാ സൂചികകളിൽ മറ്റെല്ലാ മേഖലാ സൂചികകളും നഷ്ടത്തിലാണ്. സമീപകാല നേട്ടങ്ങൾക്ക് ശേഷം നിക്ഷേപകർ ലാഭമെടുത്തതോടെ മുൻനിര ബാങ്കിംഗ് ഓഹരികൾ ഇടിഞ്ഞു. എച്ച്‌ഡിഎഫ്‌സി ബാങ്ക്, എസ്ബിഐ തുടങ്ങിയ മുൻനിര ഓഹരികൾ 3 ശതമാനത്തിലധികം നഷ്ടത്തിലേക്ക് വീണു. നിഫ്റ്റി ബാങ്ക് സൂചിക 2 ശതമാനത്തിലധികം താഴ്ന്നു.

എനർജി, മെറ്റൽ, പിഎസ്‍യു ബാങ്ക്, എഫ്എംസിജി, ഇൻഫ്രാ എന്നിവയും നഷ്ടത്തിൽ വീണു. അതേസമയം മികച്ച മൂന്നാം പാദഫലത്തിന് പിന്നാലെ സിപ്ല മുന്നേറി. ഇത് മറ്റു ഫാർമ ഓഹരികൾക്കും നേട്ടമായി. നിഫ്റ്റി ഫാർമ സൂചിക ഏകദേശം 2 ശതമാനം ഉയർന്നു. സീ എന്റർടെയിൻമെന്റ് 32 ശതമാനം ഇടിഞ്ഞതോടെ നിഫ്റ്റി മീഡിയ 12 ശതമാനം നഷ്ടത്തിലേക്ക് വീണു. ബിഎസ്‌ഇ മിഡ്‌കാപ്, സ്‌മോൾകാപ് സൂചികകൾ ഏകദേശം 3 ശതമാനം വീതം ഇടിഞ്ഞു.

ഓഹരികൾ ശ്രദ്ധേയം

പ്രതീക്ഷിച്ചതിലും മികച്ച പാദഫലത്തിൽ ഐസിഐസിഐ ബാങ്ക് നേട്ടം നിലനിർത്തി. ഓഹരി 2 ശതമാനം ഉയർന്നു. ഭാരതി എയർടെൽ 3 ശതമാനം വരെ ഉയർന്നു. സോണി ലയനം അവസാനിപ്പിച്ചെന്ന റിപ്പോർട്ടിൽ സീ എന്റർടെയിൻമെന്റ് 33 ശതമാനം ഇടിഞ്ഞു. 4 വർഷത്തിനിടയിലെ ഏറ്റവും വലിയ തകർച്ചയാണിത്.

മൂന്നാം പാദഫലത്തിന് പിന്നാലെ മിഡ്കാപിൽ ഐ‌ഡി‌എഫ്‌സി ഫസ്റ്റ് ബാങ്ക്, ഒബ്‌റോയ് എന്നിവ ഇടിഞ്ഞു. കമ്പനികളുടെ ആകെ വിപണി മൂല്യം 366 ലക്ഷം കോടി രൂപയായി ഇടിഞ്ഞു. ഒറ്റ സെഷനിൽ നിക്ഷേപ മൂല്യം 8 ലക്ഷം കോടി ഇടിഞ്ഞെന്ന് സാരം.

ഇടിവിനുള്ള കാരണം

ഹെവിവെയ്റ്റ് ഓഹരികളിലെ വിൽപ്പനയാണ് ഇടിവിന് പ്രധാന കാരണമായത്. മിഡിൽ ഈസ്റ്റിലെയും ചെങ്കടലിലെയും പിരിമുറുക്കങ്ങൾക്കൊപ്പം ഉയർന്ന മൂല്യനിർണ്ണയവും സമ്മിശ്ര പാ​ദഫലങ്ങളും കാരണം വിദേശ നിക്ഷേപകർ വിൽപ്പനക്കാരായതും നിക്ഷേപകരെ ലാഭമെടുക്കാൻ പ്രേരിപ്പിച്ചു.

മുൻനിര ഓഹരികളിൽ എച്ച്‌ഡിഎഫ്‌സി ബാങ്ക്, റിലയൻസ് ഇൻഡസ്ട്രീസ്, എസ്‌ബിഐ, കോൾ ഇന്ത്യ, ആക്‌സിസ് ബാങ്ക്, ഇൻഡസ്‌ഇൻഡ് ബാങ്ക്, ടാറ്റ മോട്ടോഴ്‌സ് തുടങ്ങിയവ 2 മുതൽ 4 ശതമാനം വരെയാണ് ഇടിഞ്ഞത്. വിദേശ നിക്ഷേപകർ തുടർച്ചയായി ഒഴുകുന്നത് വികാരത്തെ തളർത്തി. ജനുവരിയിൽ ഇതുവരെ 23,000 കോടി രൂപയിലധികം ഓഹരികളാണ് എഫ്ഐഐകൾ വിറ്റഴിച്ചത്.