ബാങ്ക്, മെറ്റൽ ഓഹരികൾ മുന്നിൽ നിന്ന് നയിച്ചു; സെൻസെക്സിന് 213 പോയിന്റ് നേട്ടം; നിഫ്റ്റി 19,444 ൽ

മെറ്റൽ, ബാങ്ക്, ക്യാപിറ്റൽ ​ഗുഡ്സ്, റിയൽറ്റി ഓഹരികളുടെ കരുത്തിൽ ബുധനാഴ്ച ആഭ്യന്തര സൂചികകളിൽ നേട്ടം. സെൻസെക്സ് 213.27 പോയിന്റ് നേട്ടതിൽ 65,433.30 ൽ ക്ലോസ് ചെയ്തു. നിഫ്റ്റി 47.50 പോയന്റ് ഉയർന്ന് 19,444 ലാണ് വ്യാപാരം അവസാനിപ്പിച്ചത്. സെൻസെക്സ് 81 പോയിന്റ് നേട്ടത്തിൽ 65300 ലാണ് വ്യാപാരം ആരംഭിച്ചത്.

285 പോയിന്റ് ഉയർന്ന് 65504 എന്ന ഇൻട്രാഡേ ഉയർന്ന നിലവാരത്തിലും സെൻസെക്സ് എത്തി. നിഫ്റ്റിയുടെ ഇൻട്രാഡേ ഉയർന്ന നിലവാരം 17472.05 ആണ്. രണ്ടാം പകുതിയിലെ കണ്ട വാങ്ങലിലാണ് ദിവസത്തിന്റെ ഉയർന്ന നിലവാരത്തിനടുത്ത് ക്ലോസ് ചെയ്തത്.

ഹിൻഡാൽകോ ഇൻഡസ്ട്രീസ്, ആക്‌സിസ് ബാങ്ക്, ഐസിഐസിഐ ബാങ്ക്, എസ്‌ബിഐ, എൽആൻഡ്ടി എന്നിവ മുന്നേറ്റമുണ്ടാക്കി. അദാനി എന്റർപ്രൈസസ്, അദാനി പോർട്ട്‌സ്, സൺ ഫാർമ, ഭാരതി എയർടെൽ, ടാറ്റ മോട്ടോഴ്‌സ് എന്നിവ നഷ്ടത്തിൽ ക്ലോസ് ചെയ്തു. സെക്ടറൽ സൂചികളിലും ഈ ഇടിവ് കാണാം.

ബാങ്ക്, മെറ്റൽ, ക്യാപിറ്റൽ ഗുഡ്‌സ്, റിയൽറ്റി സൂചികകൾ 0.4-1 ശതമാനം വീതം ഉയർന്നു. പവർ, എഫ്എംസിജി, ഓയിൽ ആൻഡ് ഗ്യാസ് എന്നിവ 0.3- 1 ശതമാനം ഇടിഞ്ഞു. ബിഎസ്ഇ മിഡ്കാപ് സൂചിക 0.4 ശതമാനവും സ്മോൾകാപ് സൂചിക 0.6 ശതമാനവും ഉയർന്നു. രൂപ ഡോളറിനെതിരെ 25 പൈസ നേട്ടത്തിൽ 82.68 നിലവാരത്തിൽ ക്ലോസ് ചെയ്തു.

ചൊവ്വാഴ്ച 82.93 രൂപ നിലവാരത്തിലാണ് രൂപ വ്യാപാരം അവസാനിപ്പിച്ചത്.ബാങ്കിംഗ് ഓഹരികലിൽ ഐസിഐസിഐ, ആക്സിസ് ബാങ്ക് എന്നിവയിലെ വാങ്ങൽ നിഫ്റ്റിയെ മുന്നോട്ട് നയിച്ചു. ചാന്ദ്രയാൻ ദൗത്യത്തിനുള്ള ഘടകങ്ങളുടെ പ്രധാന വിതരണക്കാരായ ലിൻഡ്, പിടിസി, സെന്റം എന്നി ഓഹരികൾ ബുധനാഴ്ച് നേട്ടമുണ്ടാക്കി. വമ്പൻ ഓർഡർ നേടിയതിന് പിന്നാലെ എൽ ആൻഡ് ടി 2 ശതമാനം ഉയർന്ന് റെക്കോർഡ് ഉയരത്തിലെത്തി.

റെയിൽ പദ്ധതികളിൽ 4,000 കോടി രൂപയുടെ നിക്ഷേപം പ്രഖ്യാപിച്ച ഹിൻഡാൽകോ ഓഹരികളും 2 ശതമാനം ഉയർന്നു. 6 ശതമാനം ഉയർന്ന പേടിഎമ്മിന്റെ മാതൃ കമ്പനിയായ വൺ97 കമ്മ്യൂണിക്കേഷൻ ഓഹരികൾ 6 ശതമാനം നേട്ടത്തിൽ 18 മാസത്തെ ഏറ്റവും ഉയർന്ന നിലയിൽ ക്ലോസ് ചെയ്തു. അദാനി ഗ്രൂപ്പ് ഓഹരികളിൽ 1-7 ശതമാനം വരെ ഇടിഞ്ഞു.

എൻജിനീയേഴ്സ് ഇന്ത്യ, എൽ ആൻഡ് ടി, ഹിന്ദുസ്ഥാൻ എയറോനോട്ടിക്സ്, അതുൽ ഓട്ടോ, സിഎസ്ബി ബാങ്ക്, ഭാരത് ഫോർജ്, ഭാരത് ഇലക്ട്രോണിക്സ്, വൺ 97 കമ്മ്യൂണിക്കേഷൻസ്, കെപിഐടി ടെക്നോളജീസ് എന്നിവയുൾപ്പെടെ 250-ലധികം ഓഹരികൾ 52 ആഴ്ചയിലെ ഏറ്റവും ഉയർന്ന നിലയിലെത്തി.