ചാഞ്ചാട്ടങ്ങൾക്കൊടുവിൽ വിപണിയിൽ ഫ്ലാറ്റ് ക്ലോസിം​ഗ്; നിഫ്റ്റി 19,674 ൽ; സെൻസെക്സിന് 15 പോയിന്റ് നേട്ടം

ഉയർന്ന പലിശ നിരക്ക് ഭീഷണിയും സാമ്പത്തിക വളർച്ച ആ​ഘാതവും നിലനിൽക്കുന്നതിനാൽ വിപണി വികാരം ദുർബലമായ തിങ്കളായ ഇന്ത്യൻ ഇക്വിറ്റി സൂചികകളായ സെൻസെക്സും നിഫ്റ്റിയും ഫ്ലാറ്റ് ക്ലോസിം​ഗ് നടത്തി. സെൻസെക്‌സ് നേട്ടത്തോടെ 66,082.99 ലാണ് വ്യാപാരം ആരംഭിച്ചത്.

വ്യാപാരത്തിനിടെ 66,225.63 എന്ന ഇൻട്രാഡേ ഉയർന്ന നിലവാരം സൂചിക കുറിച്ചു. 65,764.03 ആണ് തിങ്കളാഴ്ചയിലെ ഏറ്റവും താഴ്ന്ന നിലവാരം. വ്യാപാര അവസാനത്തിൽ സെൻസെക്‌സ് 15 പോയിന്റ് ഉയർന്ന് 66,023.69 ലാണ് ക്ലോസ് ചെയ്തത്.

വെള്ളിയാഴ്ചയിലെ ക്ലോസിം​ഗ് നിലവാരമായ 19,674.25 ന് എതിരെ നേരിയ നേട്ടത്തിൽ 19,678.20 ലാണ് നിഫ്റ്റി വ്യാപാരം ആരംഭിച്ചത്. തിങ്കളാഴ്ച സെഷനിൽ 19,734.15 നിലവാരത്തിലെത്തി ഇൻട്രാഡേ ഉയർ്ന നിലവാരത്തിലും 19,601.55ൽ ഇൻട്രാഡേയിലെ താഴ്ന്ന നിലവാരത്തിലും സൂചികയെത്തി. ഒടുക്കും 19,674.55 ലാണ് നിഫ്റ്റി ക്ലോസ് ചെയ്തത്. നിഫ്റ്റി 0.30 പോയിന്റാണ് ഉയർന്നത്.

സമ്മിശ്ര ആഗോള സൂചനകളുടെ പിൻബലത്തിൽ വിപണി പൊതുവെ ഇടിവിലായിരുന്നു. ഉച്ചകഴിഞ്ഞുള്ള സെഷൻ വീണ്ടെടുക്കൽ കാണിച്ചെങ്കിലും അവസാന മണിക്കൂറിലെ വിൽപ്പനയാണ് ഫ്ലാറ്റ് ക്ലോസിം​ഗിലേക്ക് വിപണിയെ എത്തിച്ചത്. ഇതോടെ തുടർച്ചയായ നാലാം സെഷനിലെ നഷ്ടത്തിന് വിരാമമായി.

ബജാജ് ഫിനാൻസ്, ടാറ്റ കൺസ്യൂമർ പ്രോഡക്ട്‌സ്, അപ്പോളോ ഹോസ്പിറ്റൽസ്, ബജാജ് ഫിൻസെർവ്, കോൾ ഇന്ത്യ തുടങ്ങിയ ഓഹരികൾ നിഫ്റ്റിയിൽ മികച്ച നേട്ടമുണ്ടാക്കി. ഹിൻഡാൽകോ ഇൻഡസ്ട്രീസ്, എസ്ബിഐ ലൈഫ് ഇൻഷുറൻസ്, ഹീറോ മോട്ടോകോർപ്പ്, ഇൻഫോസിസ്, ഡോ.റെഡ്ഡീസ് ലബോറട്ടറീസ് എന്നിവ നഷ്ടത്തിലാണ് വ്യാപാരം അവസാനിപ്പിച്ചത്. ബി‌എസ്‌ഇ മിഡ്‌കാപ് സൂചിക 0.46 ശതമാനം ഉയർന്ന് 32,094.28 ലും ബി‌എസ്‌ഇ സ്‌മോൾകാപ് സൂചിക 0.12 ശതമാനം നേട്ടത്തോടെയുമാണ് ക്ലോസ് ചെയ്തത്.

വിപണി ഫ്ലാറ്റ് ക്ലോസിം​ഗ് ആണെങ്കിലും കോൾ ഇന്ത്യ, മാരുതി സുസുക്കി, ടാറ്റ കൺസ്യൂമർ പ്രോഡക്‌ട്‌സ്, ട്രെന്റ് എന്നിവയുൾപ്പെടെ 195 ഓഹരികൾ തിങ്കളാഴ്ച 52 ആഴ്‌ചയിലെ ഏറ്റവും ഉയർന്ന നിലയിലെത്തി. ധനസമാഹരണത്തിനുള്ള പദ്ധതിക്ക് പിന്നാസെ ബജാജ് ഫിനാൻസ് 5 ശതമാനം ഉയർന്നു. ബജാജ് ഫിൻസെർവും നേട്ടമുണ്ടാക്കി. എംസിഎക്സ് 10 ശതമാനം ഉയർന്നു.

പഞ്ചാസാരയുടെ വില വർധവനവിന് പിന്നാലെ പഞ്ചസാര കമ്പനികളുടെ ഓഹരികൾ 7 ശതമാനം വരെ ഉയർന്നു, ബൽറാംപൂർ ഷു​ഗ‌ർ കാര്യമായ നേട്ടമുണ്ടാക്കി. പുതിയ ഭവന പദ്ധതി ഗോദ്‌റെജ് പ്രോപ്പർട്ടിക്ക് 4 ശതമാനം നേട്ടമുണ്ടാക്കി. വില വർധനയെക്കുറിച്ചുള്ള റിപ്പോർട്ടുകൾക്ക് പിന്നാലെ സിമന്റ് ഓഹരികൾ മുന്നേറി. രാംകോ സിമന്റ് 5.37 ശതമാനം മുന്നേറി.