സെൻസെക്സും നിഫ്റ്റിയും പുതിയ ഉയരത്തിൽ; വിപണിക്കൊപ്പം കുതിച്ച് ഈ ഓഹരികൾ

നിയമസഭാ തിരഞ്ഞെടുപ്പ് ഫലത്തിൽ നാലിൽ മൂന്നും വിജയിച്ച് നേട്ടമുണ്ടാക്കിയ ഭരണ കക്ഷിയായ ബിജെപിയുടെ പ്രകടനത്തിന്റെ പ്രതിഫലനം ഓഹരി വിപണിയിലും. തിങ്കളാഴ്ച വ്യാപാരത്തിൽ പുതിയ ഉയരം താണ്ടിയ സൂചികകളിൽ വലിയ മുന്നേറ്റമാണുണ്ടായത്. നിഫ്റ്റി 419 പോയിന്റ് നേട്ടത്തിൽ 20,686.80 ലും സെൻസെക്സ് 1384 പോയിൻറ് ഉയർന്ന് 68,865.12 ലുമാണ് ക്ലോസ് ചെയ്തത്. സൂചികകളുടെ റെക്കോർഡ് ക്ലോസിം​ഗ് നിലവാരമാണിത്.

നിയമസഭാ തിരഞ്ഞെടുപ്പിലെ മികച്ച വിജയം 2024 ലെ പൊതുതെരഞ്ഞെടുപ്പിൽ ബിജെപി മുന്നിലെന്ന അഭിപ്രായത്തെ ശക്തിപ്പെടുത്തിയതും ഇതുവഴിയുള്ള പോളിസി തുടർച്ചയുമാണ് വിപണിയിൽ ഉണ്ടായ വലിയ മുന്നേറ്റത്തിന് കാരണം.

രാവിലെ 9.30 ഓടെ സെൻസെക്‌സ് 1,000 പോയിന്റ് ഉയർന്ന് 68,525ലും നിഫ്റ്റി 300 പോയന്റ് നേട്ടത്തിൽ 20,600 ലും എത്തിയിരുന്നു. വ്യാപാരത്തിനിടെ നിഫ്റ്റി 20,702.65 ൽ പുതിയ ഉയരം കുറിച്ചു. ഇൻട്രാ ഡേയിൽ 68,918.22 ലേക്ക് കുതിച്ച സെൻസെക്സിന് ഇതാണ് പുതിയ ഉയരം. ഒരു വർഷത്തിനിടെ ഇൻട്രാഡേയിൽ ഏറ്റവും മികച്ച നേട്ടമാണ് സൂചികകളിലുണ്ടായത്.

50 നിഫ്റ്റി ഓഹരികളിൽ 44 എണ്ണവും നേട്ടത്തിലാണ്. വിപണിയിലെ കുതിപ്പിനിടെ ഐഷർ മോട്ടോഴ്‌സ്, അദാനി എന്റർപ്രൈസസ്, അദാനി പോർട്‌സ്, ബിപിസിഎൽ, ഐസിഐസിഐ ബാങ്ക് എന്നിവ നിഫ്റ്റിയിൽ മികച്ച നേട്ടമുണ്ടാക്കി. ഈ സമയത്തും ഇടിവ് നേരിട്ടത് എച്ച്ഡിഎഫ്സി ലൈഫ്, ബ്രിട്ടാനിയ ഇൻഡസ്ട്രീസ്, വിപ്രോ, സൺ ഫാർമ, ടൈറ്റൻ കമ്പനി എന്നി ഓഹരികൾക്കാണ്.

നിഫ്റ്റി ഫാർമയും മീഡിയയും ഒഴികെ മറ്റെല്ലാ സെക്ടറൽ സൂചികകളും നേട്ടത്തിലാണ് ക്ലോസ് ചെയ്തത്. ബിഎസ്‌ഇ മിഡ്‌കാപും സ്‌മോൾകാപും 1 ശതമാനം നേട്ടത്തിൽ ക്ലോസ് ചെയ്തു. നിഫ്റ്റി ബാങ്ക് 2022 ഏപ്രിലിനു ശേഷമുള്ള ഏറ്റവും മികച്ച നേട്ടത്തിൽ 1,617 പോയിന്റ് ഉയർന്ന് 46,431 ൽ എത്തി.

ശ്ര​ദ്ധേയമായ ഓഹരികൾ

അദാനി ഗ്രൂപ്പ് ഓഹരികൾ 10 ശതമാനം വരെ നേട്ടമുണ്ടാക്കി. നിഫ്റ്റി ബാങ്കിലെ എല്ലാ ഓഹരികളും നേട്ടത്തിലാണ്. എച്ച്ഡിഎഫ്സി ബാങ്ക്, ഐസിഐസിഐ എന്നിവയാണ് മുന്നിൽ. നവംബറിലെ വിൽപ്പന പ്രതീക്ഷിച്ചതിലും താഴെയാണെങ്കിലും ഐഷർ മോട്ടോഴ്‌സ് 7 ശതമാനം ഉയർന്നു. നെഗറ്റീവ് ബ്രോക്കറേജ് നോട്ടിൽ മിഡ്‌കാപിൽ സീ എന്റർടെയിൻമെന്റ് നഷ്ടം നേരിട്ടു. ഫാർമ ഓഹരികൾ നഷ്ടത്തിലാണ്. ലുപിൻ ഏറ്റവും വലിയ ഇടിവ് രേഖപ്പെടുത്തി.

ബിഎസ്ഇയിൽ ലിസ്റ്റ് ചെയ്തിട്ടുള്ള കമ്പനികളുടെ വിപണി മൂല്യം കഴിഞ്ഞ സെഷനിലെ 337.7 ലക്ഷം കോടി രൂപയിൽ നിന്ന് ഏകദേശം 343.5 ലക്ഷം കോടി രൂപയായി ഉയർന്നു. ഒറ്റ സെഷനിൽ നിക്ഷേപ മൂല്യം ഏകദേശം 5.8 ലക്ഷം കോടി രൂപ വർധിച്ചു.

കാരണങ്ങൾ

ബിജെപിയുടെ വിജയത്തിനൊപ്പം ആഗോള പശ്ചാത്തലവും അനുകൂലമായിരുന്നു. യുഎസിലെ ബെഞ്ച്മാർക്ക് സൂചികകൾ ഡിസംബർ 1 ന് ശക്തമായ നേട്ടമുണ്ടാക്കുകയും ഏഷ്യൻ വിപണികൾ പകൽ വ്യാപാരത്തിൽ ഉയർന്ന നിലയിലാവുകയും ചെയ്തു. പണപ്പെരുപ്പം കുറയുന്നതിന്റെ സൂചനകൾ ശക്തമായതോടെ യുഎസ് ഫെഡറൽ റിസർവ് ഡിസംബർ 12-13 തീയതികളിൽ പലിശ നിരക്ക് വർധനവിന് അവസാനം വരുത്തുമെന്ന വികാരവും ബോണ്ട് യീൽഡ് കുറയുന്നതും ഇക്വിറ്റി വിപണിയെ ആകർഷമാക്കി.

തുടർച്ചയായി മൂന്ന് മാസം ​വിൽപ്പനക്കാരായ ശേഷം നവംബർ അവസാനത്തോടെ വിദേശ സ്ഥാപന നിക്ഷേപകർ തിരിച്ചെത്തിയതും വിപണി ആഘോഷമാക്കി. 5,795.05 കോടി രൂപയുടെ ഓഹരികളാണ് നവംബറിൽ വിദേശ നിക്ഷേപകർ വാങ്ങിയത്. ഡിസംബറിൽ മാസത്തിലെ ആദ്യ സെഷനിൽ 1,589.61 കോടി രൂപയുടെ ഓഹരികളും വാങ്ങി.