ഐടി ഓഹരികൾ മുന്നിൽ നിന്ന് നയിച്ചു; രണ്ടാം ദിവസവും 'പച്ചപിടിച്ച്' വിപണി

സമ്മിശ്രമായ ആ​ഗോള സൂചനകൾക്കിടെ രണ്ടാം ദിവസത്തിലും നേട്ടത്തിന്റെ പാതയിൽ തുടർന്ന് ആഭ്യന്തര സൂചികകൾ. മുൻനിര ഐടി ഓഹരികളായ ഇൻഫോസിസ്, ടിസിഎസ്, എച്ച്സിഎൽ ടെക് എന്നിവ നേട്ടത്തോടെ മുന്നിൽ നിന്ന് നയിച്ച വ്യാഴാഴ്ച സെഷനിൽ നിഫ്റ്റി 90 പോയിൻറ് ഉയർന്ന് 19,765.20 ൽ ക്ലോസ് ചെയ്തു. സെൻസെക്സ് 307 പോയിൻറ് നേട്ടത്തോടെ 65,982.48 ലാണ് വ്യാപാരം അവസാനിപ്പിച്ചത്. ഇടിവിൽ ആരംഭിച്ച ബെഞ്ച്മാർക്ക് സൂചികകൾ വീണ്ടെടുക്കുലിന് ശേഷമാണ് നേട്ടമുണ്ടാക്കിയത്.

നിഫ്റ്റിയിൽ ഹീറോ മോട്ടോകോർപ്പ്, ടെക് മഹീന്ദ്ര, ടിസിഎസ്, എച്ച്സിഎൽ ടെക്നോളജീസ്, ഇൻഫോസിസ് എന്നിവരാണ് നേട്ടമുണ്ടാക്കിയ പ്രമുഖർ. ആക്സിസ് ബാങ്ക്, കോൾ ഇന്ത്യ, പവർ ഗ്രിഡ് കോർപ്പറേഷൻ, ടാറ്റ കൺസ്യൂമർ പ്രോഡക്ട്സ്, അദാനി എന്റർപ്രൈസസ് എന്നിവ നഷ്ടത്തിലേക്ക് വീണു.

സെക്ടറൽ സൂചികകളിൽ ഐടി സൂചിക ഏകദേശം 3 ശതമാനം നേട്ടമുണ്ടാക്കി. റിയൽറ്റി, ഓയിൽ ആൻഡ് ഗ്യാസ്, ഓട്ടോ എന്നിവ 1 ശതമാനം വീതം ഉയർന്നു. ബിഎസ്‌ഇ മിഡ്‌ക്യാപ്, സ്‌മോൾകാപ് സൂചികകൾ ഒരു ശതമാനം വീതം നേട്ടത്തോടെയാണ് ക്ലോസ് ചെയ്തത്.

പ്രതീക്ഷിച്ചതിലും മൃദുവായ യുഎസ് പണപ്പെരുപ്പ ഡാറ്റയും ബോണ്ട് വരുമാനം ലഘൂകരിക്കുന്നതും വിപണിക്ക് കരുത്തായി. ഐടി, ഫാർമ തുടങ്ങിയ കയറ്റുമതി അധിഷ്ഠിത മേഖലകൾക്ക് യുഎസിലെ സാഹചര്യം ​ഗുണകരമാകുമെന്നാണ് വിപണി വിലയിരുത്തുന്നത്. ഇന്ത്യൻ ഐടി സേവന കമ്പനികളുടെ പ്രധാന വിപണിയാണ് യുഎസ്. കമ്പനികളുടെ വരുമാനത്തിന്റെ ഗണ്യമായ ഭാഗവും യുഎസിൽ നിന്നാണ്.

രണ്ട് ദിവസത്തെ റാലി നിക്ഷേപകരെ ഏകദേശം 5 ലക്ഷം കോടി രൂപ സമ്പന്നരാക്കി. ബിഎസ്ഇയിൽ ലിസ്റ്റ് ചെയ്തിട്ടുള്ള കമ്പനികളുടെ വിപണി മൂല്യം നവംബർ 13 ലെ 322.1 ലക്ഷം കോടി രൂപയിൽ നിന്ന് ഏകദേശം 327 ലക്ഷം കോടി രൂപയായി ഉയർന്നു. രണ്ട് സെഷനുകളിലായി 4.9 ലക്ഷം കോടി രൂപയാണ് വിപണി മൂല്യത്തിലുണ്ടായ വ്യത്യാസം.

ഹീറോ മോട്ടോകോർപ്പ്, ബെഡ്മുത്ത ഇൻഡസ്ട്രീസ്, വെൽസ്പൺ കോർപ്പറേഷൻ, സാറ്റിൻ ക്രെഡിറ്റ് കെയർ നെറ്റ്‌വർക്ക്, ടാറ്റ കോഫി, എൽ ആൻഡ് ടി ഫിനാൻസ് ഹോൾഡിംഗ്സ്, ശ്രീറാം ഫിനാൻസ്, വണ്ടർല ഹോളിഡേയ്സ്, പെർസിസ്റ്റന്റ് സിസ്റ്റംസ്, വോക്ക്ഹാർഡേയ്‌സ്, വോക്ക്ഹാർഡേറ്റേഴ്‌സ് തുടങ്ങി ബിഎസ്‌ഇയിൽ 300-ലധികം ഓഹരികൾ 52 ആഴ്ചയിലെ ഉയർന്ന നിലയിലെത്തി.

അതേസമയം, ഡിമാൻഡ് കുറയുമെന്ന ആശങ്ക നിലനിൽക്കുന്നതിനാൽ ക്രൂഡ് ഓയിൽ നഷ്ടത്തിലാണ് വ്യാപാരം നടക്കുന്നത്. ബെഞ്ച്മാർക്ക് ബ്രെന്റ് ക്രൂഡ് 0.27 ശതമാനം ഇടിഞ്ഞ് ബാരലിന് 81 ഡോളറിന് സമീപമെത്തി. രൂപ നഷ്ടത്തോടെ 83.23 നിലവാരത്തിൽ ക്ലോസ് ചെയ്തു. ബുധനാഴ്ച 83.14 രൂപയിലായിരുന്നു ക്ലോസിം​ഗ്.